Galaxy S9/S9+ គ្រឿងក្នុងខ្លាំងជាងមុន ប៉ុន្តែតម្លៃមិនឡើងសូម្បីបន្តិច

2018-02-26 02:13:40
ចំនួនមតិ 0 | ចំនួនចែករំលែក 0

ចន្លោះមិនឃើញ

Samsung បានប្រកាសចេញជាផ្លូវការស្មាតហ្វូន Galaxy S9/S9+ នៅក្នុងទីក្រុងបាសេឡូណា ប្រទេសអេស្ប៉ាញ កាលពីយប់មិញ ដោយមានបន្ថែមបច្ចេកវិទ្យាថ្មីៗ ជាពិសេសមានកាមេរ៉ាសមត្ថភាពខ្លាំងកប់ជាងមុន។

ដំបូងនិយាយពីរូបរាង វាមិនខុសពី Galaxy S8/S8+ នោះទេ ដោយមានរចនាបថអេក្រង់ Infinity Display ដដែល ប៉ុន្តែ Samsung បានកាត់តម្រឹមស៊ុមផ្នែកខាងក្រោមនៃអេក្រង់ឲ្យមានទំហំតូចជាងមុនបន្តិច។ ចំណុចផ្លាស់ប្ដូរតូចៗទាក់ទងនឹងការឌីហ្សាញមានដូចជាការប្ដូរទីតាំងទ្រនាប់ស្កេនម្រាមដៃឲ្យនៅចំកណ្ដាល, កាមេរ៉ាស្កេនប្រស្រីភ្នែកដែលបង្កប់បានយ៉ាងល្អ និងរន្ធបំពងសំឡេងប្រែប្រួលបន្តិច។

អេក្រង់ Infinity Display ដែលជាប្រភេទ Super AMOLED មានទំហំ ៥,៨ អ៊ីញ លើ Galaxy S9 និងទំហំ ៦,២ អ៊ីញ លើ Galaxy S9+ អាចបង្ហាញរូបភាពក្នុងកម្រិត QuadHD រូបភាពដែលច្បាស់ដូចធម្មជាតិ។

ស្មាតហ្វូនទាំងពីរមានបន្ទះឈីប Snapdragon 845 និង Exynos 9810 ជាបេះដូងដ៏សំខាន់ និងមានថាមពលខ្លាំងក្លាបំផុត។ បន្ទះឈីប Exynos 9810 នេះមាន ៤ គ្រាប់ល្បឿន ២,៨ GHz និង ៤ គ្រាប់ទៀតល្បឿន ១,៧ GHz ចំណែក GPU ជាប្រភេទ Mali-G72 GPU 18-core និងមាន RAM ៤ GB លើ Galaxy S9 / ៦ GB លើ Galaxy S9+។

កាមេរ៉ាជាផ្នែកផ្លាស់ប្ដូរដ៏ធំមួយនៅលើ Galaxy S9/S9+ ដោយពេលនេះអាចថតវីដេអូកំពូលយឺត (Super Slow-Motion) និងអាចប្រែប្រួល Aperture បានទៅតាមស្ថានភាព។ Galaxy S9 មានកាមេរ៉ាតែមួយគ្រាប់ ចំណែកឯ S9+ មានកាមេរ៉ាដល់ពីរគ្រាប់ដូចជា Note8 ដោយមានឡេន Telephoto លាយជាមួយឡេនធម្មតា។

ចំពោះ Aperture របស់កាមេរ៉ាមេដែលមានកម្រិត ១២ MP នេះ គឺអាចប្រែប្រួលពី f/1.5 ចុះមក f/2.4។ នៅពេលដែលអ្នកថតរូបភាពក្នុងទីដែលមានពន្លឺមិនគ្រប់គ្រាន់ Aperture នៃកាមេរ៉ានឹងបើកធំដើម្បីឲ្យពន្លឺចូលបានកាន់តែច្រើនដើម្បីអាចថតរូបភាពបានក្នុងល្បឿនលឿន (Shutter Speed) និងមិនបាច់ភ័យរឿងរូបភាពព្រាល។ ចំណុចនេះក៏ជួយធ្វើឲ្យវីដេអូបែប Slow-Motion ដែលថតនៅទីងងឹតមានគុណភាពល្អផងដែរ។ ដោយឡែកនៅពេលថតរូបភាពនៅពេលមានថ្ងៃវិញ Aperture របស់កាមេរ៉ានឹងបង្រួមតូច ជួយឲ្យរូបភាពមានភាពដិតល្អ។

ការវីដេអូ Super Slow-Mo ជាមុខងារគួរចាប់អារម្មណ៍មួយទៀត ដែលអាចថតយកវីដេអូក្នុងល្បឿនយឺតដល់ ៩៦០ ប្លង់/វិនាទី នៅក្នុងកម្រិត 720p ដូចជា Xperia XZ Premium ដែរ។

មួយវិញទៀតកាមេរ៉ាខាងមុខរបស់ S9/S9+ អាចដំណើរការមុខងារ "AR Emoji” ជាមុខងារដែលបង្កើតរូបតុក្កតាបែប 3D ដោយផ្អែកលើទម្រង់មុខអ្នកប្រើប្រាស់។ មុខងារដែលស្រដៀងគ្នានឹង Animoji របស់ iPhone X នេះពិសេសត្រង់ថាអាចច្នៃជា Sticker ដោយស្វ័យប្រវត្តិដើម្បីយកទៅប្រើក្នុងកម្មវិធីផ្ញើសារដទៃទៀត។

រន្ធបំពងសំឡេងរបស់ S9/S9+ បានអាប់ដេតទៅជាប្រភេទ Stereo ម៉ាក AKG ដែល Samsung និយាយថាអាចបញ្ចេញសំឡេងឮជាង S8/S8+ ដល់ទៅ ៤០% ឯណោះ។ ថាមពលថ្មមិនមានការប្រែប្រួលខុសពីមុនឡើយដោយមានទំហំ ៣០០០ mAh និង ៣៥០០ mAh ដដែល ចំណែកប្រព័ន្ធសុវត្ថិភាពកាន់តែខ្លាំងជាងមុន ដោយប្រើប្រាស់ការស្កេនផ្ទៃមុខ និង ការស្កេនប្រស្រីភ្នែកលាយបញ្ចូលគ្នា។

ការកុម្ម៉ង់ទិញ S9/S9+ លើទីផ្សារសហរដ្ឋអាមេរិកចាប់ផ្ដើមថ្ងៃទី ២ ខែមីនា ដែលនឹងចេញលក់នាថ្ងៃទី ១៦ ខែមីនា ក្នុងតម្លៃ ៧១៩ ដុល្លារ ចំពោះ Galaxy S9 និង ៨៣៩ ដុល្លារ ចំពោះ Galaxy S9+ ជាតម្លៃលក់ដូច Galaxy S8/S8+ ឆ្នាំមុនដែរ៕