ផ្លូវល្បឿនលឿនដំបូងរបស់កម្ពុជា ដឹងចំណុចចាប់ផ្ដើមសាងសង់ហើយ

2018-02-26 02:30:46
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រសួងសាធារណការ និងដឹកជញ្ជូន ថ្មីៗនេះបានបញ្ជាក់ពីទីតាំងចាប់ផ្ដើមនៃការសាងសង់ផ្លូវល្បឿនលឿនដំបូងនៅកម្ពុជា គឺនឹងត្រូវយកពីចំណុចផ្លូវក្រវាត់ក្រុងទី៣ ឆ្ពោះផ្លូវជាតិលេខ៤ ទៅកាន់ខេត្តព្រះសីហនុ។

ផ្លូវក្រវាត់ក្រុងទី៣ មានប្រវែងសរុបចំនួន៥២គីឡូម៉ែត្រ ត្រង់ចំណុចទំនប់កប់ស្រូវ ដែលតភ្ជាប់ពីផ្លូវជាតិលេខ៥ និងឆ្លងកាត់ផ្លូវជាតិលេខ៤ ផ្លូវជាតិលេខ៣ ផ្លូវជាតិលេខ២ និងផ្លូវជាតិលេខ១។ ផ្លូវនេះ មានលក្ខណៈពិសេសធ្វើពីបេតុងសរសៃដែក ដែលក្នុងនោះ៤៧គីឡូម៉ែត្រជា ផ្លូវបួនគន្លង ពីរទៅពីរមក មានទទឹងប្រវែង២៥ម៉ែត្រ និង៥គីឡូម៉ែត្រទៀតមានពីរគន្លងសម្រាប់ចូល ទៅកាន់កំពង់ផែព្រះសីហនុ។

(ឯកឧត្តម ស៊ុន ចាន់ថុល កំពុងពិភាក្សាផ្លូវក្រវាត់ក្រុង)

លោក វ៉ាស៊ីម សូរិយា អ្នកនាំពាក្យក្រសួងសាធារណៈការ និងដឹកជញ្ជូនបានថ្លែងថា គម្រោងនេះ អាចនឹងបើកការដ្ឋានសាងសង់នៅដើមឆ្នាំ២០១៨ និងចាត់ទុកថា នេះគឺជាមោទនភាពមួយសម្រាប់កម្ពុជាដែលមានផ្លូវល្បឿនលឿនទំហំធំបែបនេះ។

កន្លងមក ឯកឧត្តម ស៊ុន ចាន់ថុល មន្ត្រីជាន់ខ្ពស់នៃក្រសួងសាធារណការ បានបញ្ជាក់ថា ផ្លូវល្បឿនលឿនទីមួយរបស់កម្ពុជាតម្លៃជាង ១៦០០លានដុល្លារ នឹងសាងសង់ប្រវែងជាង ១៩០គីឡូម៉ែត្រ អាចធ្វើដំណើរត្រឹមរយៈពេល២ម៉ោងប៉ុណ្ណោះ។ អ្នកធ្វើដំណើរតាមផ្លូវល្បឿនលឿននេះ មិនត្រឹមតែចំណេញពេលវេលាតិច ហើយមិនកកស្ទះចរាចរណ៍ប៉ុណ្ណោះទេ ថែមទាំងមានសុវត្ថិភាពខ្ពស់ទៀតផង។ ជាងនេះទៀត មិនបាច់បារម្ភមានគោក្របីឆ្លងកាត់ ព្រោះផ្លូវនេះបិទរបងជិត និងមានប្រព័ន្ធបច្ចេកវិទ្យាទំនើបដែលក្រុមហ៊ុនចិនកំពុងសិក្សា ៕

អត្ថបទ៖ ស៊ិន សាវ៉េត