មើលទូរសព្ទ Sony ថ្មី អាចប្រជែង iPhone X និង S9 បានអត់?

2018-02-27 02:20:43
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីល្ងាចម្សិលមិញ Sony បានបង្ហាញចេញស្មាតហ្វូនស៊េរីចុងក្រោយរបស់ខ្លួននៅក្នុងកម្មវិធី MWC ឆ្នាំ ២០១៨ ដែលមានម៉ូដែល Xperia XZ2 និង Xperia XZ2 Compact។

XZ2

ស្មាតហ្វូន Sony ដែលទើបប្រកាសមានរចនាបថថ្មី ខុសប្លែកពីត្រកូល Xperia ដែលបង្ហាញចេញកន្លងមក។ រចនាបថថ្មីនេះមានឈ្មោះថា "Ambient Flow" ដោយមានរាងកោងនិងពយនៅផ្នែកខាងក្រោយ និងមានស៊ុមអេក្រង់ដែលមានកម្រាស់ស្ដើងជាងមុនបន្តិច។ ទ្រនាប់ស្កេនម្រាមដៃបានប្ដូរទីតាំងនៅស្ថិតនៅផ្នែកខាងក្រោយវិញ។

XZ2 Compact

ផ្ទៃអេក្រង់របស់ XZ2 និង XZ2 Compact មានមាត្រដ្ឋាន 18:9 ជាមាត្រដ្ឋានពេញនិយមមួយ ដោយមួយមានអេក្រង់ទំហំ ៥,០ អ៊ីញ និងមួយទៀតអេក្រង់ ៥,៧ អ៊ីញ អាចបង្ហាញរូបភាពក្នុងកម្រិត FullHD+ ដូចគ្នា។ ផ្ទាំងកញ្ចក់នេះទៀតសោតក៏ទ្រាំទ្រនឹងការបង្ហាញរូបភាព HDR ផងដែរ។

កាមេរ៉ាលើស្មាតហ្វូនស៊េរីថ្មីនេះដូចជានៅលើ Xperia XZ1 ដែរ ដោយមានកម្រិត ១៩ MP, មានបច្ចេកវិទ្យា Motion Eye, Aperture f/2.0 រួមនឹងមុខងារពិសេសមួយចំនួនទៀត។ ការរួមបញ្ចូលគ្នានូវបន្ទះឈីបថ្មី Snapdragon 845 ជាមួយនឹង Software អាចឲ្យ XZ2 និង XZ2 Compact បង្កើតបាននូវដំណើរការ Process រូបភាពជំនាន់ថ្មីឈ្មោះ BIONZ។ ការ Process រូបភាពជំនាន់ថ្មីនេះអាចជួយដល់ Color Rendition និងគ្រប់គ្រង់ Noise ពេលថតរូបភាពទីងងឹត។

ចំណុចថ្មីមួយទៀតគឺសមត្ថភាពថតវីដេអូ 4K HDR ដែលជាលើកដំបូងបំផុតគេឃើញមានលើស្មាតហ្វូន។ វាប្រើប្រាស់នូវស្តង់ដារពណ៌ BT.2020 នៅក្នុង Format HEVC 10-Bit ដែលអាចទស្សនាបាននៅលើអេក្រង់ HDR របស់ XZ2 និង XZ2 Compact។ សមត្ថភាពថតវីដេអូបែប Super Slow-Motion នាពេលនេះបានបង្កើតកម្រិតដល់ 1080p ដែលអាចថតនៅល្បឿន ៩៦០ ប្លង់/វិនាទី។

ផ្នែកសំឡេងមានការប្រែប្រួលបន្តិច ដោយរន្ធដោតកាស 3.5 mm ត្រូវបានដកចេញ ត្បិតថាស្មាតហ្វូនថ្មីនេះមានកម្រាស់ក្រាស់ក្ដី។ រន្ធបំពងសំឡេង Stereo នៅដដែល ប៉ុន្តែអាចបញ្ចេញសំឡេងបានឮជាង XZ1 ប្រមាណ ២០%។ Xperia XZ2 មានខ្នងស្រោបដោយកញ្ចក់ ហេតុនេះវាអាចសាកថ្មដោយឥតប្រើខ្សែបាន ចំណែកឯ XZ2 Compact មិនមានមុខងារនេះទេ។

ចូលដល់គ្រឿងក្នុងវិញ មានបំពាក់បន្ទះឈីប Snapdragon 845 RAM, ទំហំ ៤ GB និងអង្គផ្ទុកទិន្នន័យក្នុងម៉ាស៊ីនទំហំ ៦៤ GB អាចពង្រីកទំហំបានតាមមេមូរីកាត។ ប្រភេទ Compact មានថ្មទំហំ ២៨៧០ mAh និងប្រភេទធម្មតាមានថ្មទំហំ ៣១៨០ mAh។

XZ2

XZ2 Compact

ស្មាតហ្វូនទាំងគូនេះនឹងបញ្ចេញលក់លើទីផ្សារនាខែឧសភា ឬ ដើមខែមេសា ដោយមិនទាន់មានការបញ្ជាក់ពីតម្លៃនៅឡើយ។ យ៉ាងណាក្ដីគេដឹងថានៅទីផ្សារប្រទេសអាល្លឺម៉ង់ (តំបន់អឺរ៉ុប) XZ2 មានតម្លៃ ៩៨៦ ដុល្លារ និង XZ2 Compact មានតម្លៃ ៧៤០ ដុល្លារ៕