រៀនត្រឹមថ្នាក់ទី ១២ ច្នៃបង្កើតយន្តហោះ ប្រើត្រឹមគម្របទឹកសុទ្ធ របស់របរប្រើប្រាស់ប្រចាំថ្ងៃ

2018-02-28 02:43:06
ចំនួនមតិ 0 | ចំនួនចែករំលែក 0

ចន្លោះមិនឃើញ

ដោយច្នៃរបស់របរប្រើប្រាស់ប្រចាំថ្ងៃ យុវសិស្សនៅវិទ្យាល័យហ៊ុនសែន វត្តស្វាយ បានច្នៃបង្កើតយន្តហោះមួយឡើង ជាជំហានមួយថ្ងៃក្រោយរំពឹងទុកការស្រមៃនេះអាចក្លាយការពិត។

យុវជន ទត់ សុផាន កំពុងសិក្សាថ្នាក់ទី ១២ នៅវិទ្យាល័យហ៊ុន សែន វត្តស្វាយបានបង្ហាញពីគំរូយន្តហោះដឹកអ្នកដំណើរ ដែលច្នៃពីឧបករណ៍ប្រើប្រាស់ប្រចាំថ្ងៃមានដូចជាគម្របទឹកសុទ្ធ ឈើ ប៉ាងសី កុងតាក់ និងម៉ូទ័រ និងសម្ភារៈមួយចំនួនទៀត។

យុវជនរូបនេះប្រាប់ថា គេប្រើពេលមួយថ្ងៃ និងចំណាយអស់ប្រហែល ១ ម៉ឺនរៀលដើម្បីបង្កើតគំរូយន្តហោះនេះឡើង។

ដោយសារមានចំណូលចិត្តផ្នែកវិទ្យាសាស្ត្រ និងដក់ចិត្តខ្លាំងលើការស្រាវជ្រាវពីយន្តហោះ សុផាន តែងតែទស្សនា YouTube និងការស្រាវជ្រាវបន្ថែមខ្លួនឯងពីបច្ចេកទេសក្នុងការផលិតយន្តហោះ។

ទោះបីវាគ្រាន់តែជាគំរូយន្តហោះដ៏តូចមួយ កើតពីការស្រមើស្រមៃរបស់យុវជនវ័យក្មេងរូបនេះ សុផានប្រាប់ Sabay ថា ទៅថ្ងៃអនាគតគេចង់បង្កើតយន្តហោះពិតៗដែលអាចហោះហើរបាន។ តែមុនអាចសម្រេចមហិច្ឆតាធំហួសមាឌនេះ ជំហានដំបូងត្រូវចាប់ផ្ដើមបង្កើតក្តីស្រមៃជាមុនសិន ដោយព្យាយាមធ្វើបន្តិចម្តងៗតាមលទ្ធភាពដែលអាចធ្វើទៅបាន។