ស្ថានីយអវកាសចិន នឹងធ្លាក់មកផែនដី នៅប៉ុន្មានសប្ដាហ៍ទៀត

2018-03-07 08:09:18
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្ថានីយអវកាសដំបូងរបស់ចិនរំពឹងថានឹងធ្លាក់មកលើផែនដីនៅក្នុងរយៈពេលប៉ុន្មានសប្ដាហ៍ទៀត ប៉ុន្តែអ្នកវិទ្យាសាស្ត្រនៅមិនអាចព្យាករណ៍បានទេ ថាស្ថានីយអវកាសទម្ងន់ ៨,៥ តោននេះនឹងធ្លាក់ចំតំបន់ណា។

អង្គភាព Aerospace Corporation បានប៉ាន់ស្មានថាស្ថានីយអវកាស Tiangong-1 នឹងហោះចូលមកស្រទាប់ផែនដីនៅអំឡុងសប្ដាហ៍ទីមួយនៃខែមេសា អាចមុនឬក្រោយមួយសប្ដាហ៍។ ចំណែកឯភ្នាក់ងារអវកាសអឺរ៉ុប ESA និយាយថាស្ថានីយអវកាសនេះនឹងធ្លាក់មក ចន្លោះថ្ងៃទី ២៤ ខែមីនា និងថ្ងៃទី ១៩ ខែមេសា។

កាលពីឆ្នាំ ២០១៦ ប្រទេសចិនបានសារភាពថាបានបាត់បង់ម្ចាស់ការលើស្ថានីយអវកាស Tiangong-1 ហើយមិនអាចគ្រប់គ្រងលើដំណើរហោះចូលមកផែនដីបាននោះទេ។

ដ្យាក្រាមបង្ហាញពីដំណើរស្ថានីយអវកាស

ក្នុងសេចក្ដីប្រកាសរបស់ Aerospace បានលើកឡើងថា មានឱកាសស្ដួចស្ដើងដែលបំណែកនៃស្ថានីយអវកាសអាចប៉ះទង្គិចនឹងភពផែនដី។ អង្គភាពដដែលនេះក៏បានព្រមានថាស្ថានីយអវកាសអាចនឹងមានផ្ទុកនូវសារធាតុពុល និងប្រេងឥន្ធនៈដែលមានសារធាតុគីមីខ្ពស់។

Aerospace បានបង្ហាញដែរថា មានឱកាសខ្ពស់ដែលស្ថានីយអវកាសនេះធ្លាក់ចុះមកនៅតំបន់ខាងជើងនៃប្រទេសចិន, នៅតំបន់មជ្ឈិមបូព៌ា, ចំកណ្ដាលប្រទេសអ៊ីតាលី, ភាគខាងជើងប្រទេសអេស្ប៉ាញ, រដ្ឋខាងជើងនៃសហរដ្ឋអាមេរិក, នូវែលហ្សេឡង់, រដ្ឋ Tasmania ប្រទេសអូស្ត្រាលី, ផ្នែកខ្លះនៃទ្វីបអាមេរិកខាងត្បូង និងអាហ្វ្រិកខាងជើងផងដែរ។

យ៉ាងណាក្ដីអង្គភាពខាងលើបានទទូចថា ឱកាសដែលបំណែកស្ថានីយអវកាសអាចប៉ះពាល់ដល់ជីវិតមនុស្សដែលរស់នៅតំបន់ខាងលើ គឺតិចតួចបំផុត៕

ប្រភព៖ theguardian ប្រែសម្រួល៖ សុខហេង