Galaxy Note 9 គ្មានទេមុខងារពិសេស ដូចស្មាតហ្វូនចិន VIVO

2018-03-11 02:10:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាក្យចចាមអារ៉ាមកន្លងទៅធ្លាប់បញ្ជាក់ប្រាប់ត្រកូល Galaxy Note ឆ្នាំ ២០១៨ នឹងបញ្ចូលនូវទ្រនាប់ស្កេនខ្ចៅដៃបង្កប់ក្រោមអេក្រង់ ប៉ុន្តែថ្មីៗនេះរឿងគ្រប់យ៉ាងត្រូវបានបញ្ចប់ ដោយសូម្បីលោក Ming-Chi Kuo ធ្លាប់ទស្សន៍ទាយដំណឹងនេះ ក៏ផ្លាស់ប្ដូរការគិតថាវាមិនអាចទៅរួច។

បង្ហើបពីភ្នាក់ងារនៃក្រុមហ៊ុន KGI ប្រាប់ឲ្យដឹង SAMSUNG បានបរាជ័យក្នុងការបំពេញតម្រូវការបច្ចេកទេស មិនថាតែលើប្រភេទបន្ទះ Ultrasonic Reader របស់ Qualcom ឬ Optical Reader របស់ SAMSUNG LSI។ ក្រៅពីក្រុមហ៊ុនយក្សកូរ៉េខាងត្បូងក៏ទំនងមានក្រុមហ៊ុនច្រើនទៀតចាប់អារម្មណ៍លើ Sensor ប្រភេទនេះ ទាំងដែលដឹងថាមានតម្លៃថ្លៃជាង Sensor ធម្មតា ដល់ ៤-៦ ដង។

ប៉ុន្តែបើសង្កេតតាមការមើលឃើញបច្ចុប្បន្ន មានត្រឹមក្រុមហ៊ុន VIVO របស់ប្រទេសចិនមួយគត់ ដែលត្រៀមផលិតនូវគំរូទូរសព្ទ APEX មានប្រើបច្ចេកវិទ្យា Synaptic Optical Sensor ធ្លាប់បង្ហាញជោគជ័យក្នុងពិព័រណ៍ CES អំឡុងដើមឆ្នាំ។

រូបតំណាងបច្ចេកវិទ្យានៃក្រុមហ៊ុន VIVO

យ៉ាងណាមិញចំពោះមតិលោក Kuo នៅបន្តជឿជាក់យ៉ាងមុតមាំ ទៅថ្ងៃមុខរាល់ក្រុមហ៊ុនផលិតស្មាតហ្វូន Android នឹងសម្រេចយកបច្ចេកវិទ្យាស្កេនផ្ទៃមុខ ជាជាងការស្កេនខ្ចៅដៃក្រោមអេក្រង់ ហើយក៏កាន់តែរីកដូចផ្សិតក្នុងប៉ុន្មានឆ្នាំបន្ទាប់។