អស្ចារ្យណាស់! សិល្បករខ្មែររួមសម្តែងល្ខោនអូប៉េរ៉ាបុរាណ ៦ប្រទេសលើកដំបូងនៅភ្នំពេញ
- 2018-03-11 06:26:16
- ចំនួនមតិ 0 | ចំនួនចែករំលែក 0
អស្ចារ្យណាស់! សិល្បករខ្មែររួមសម្តែងល្ខោនអូប៉េរ៉ាបុរាណ ៦ប្រទេសលើកដំបូងនៅភ្នំពេញ
ចន្លោះមិនឃើញ
«ល្ខោនអូប៉េរ៉ាបុរាណ» ដែលរួមសម្តែងដោយសិល្បករខ្មែរ និងបរទេសចំនួន ៥ ប្រទេសទៀត ដូចជា ចិន វៀតណាម ថៃ កូរ៉េខាងត្បូង និងប្រទេសម៉ាឡេស៊ី ប្រព្រឹត្តិទៅយ៉ាងជោគជ័យនៅភ្នំពេញ ក្នុងសាលសន្និសីទចតុម្មុខ លើកដំបូង។
ល្ខោននេះ គឺជាការច្របាច់បញ្ចូលគ្នារវាងវង់តន្ត្រីបុរាណខ្មែរ-អឺរ៉ុប និងមានអ្នកចម្រៀងអូប៉េរ៉ា ក្រុមរាំ សម្ដែងរួមគ្នា យ៉ាងរស់រវើក ជាមួយការពិព៌ណនាជាភាសាខ្មែរដោយសិល្បករខ្មែរអំពីសាច់រឿង។ កម្មវិធីនេះ មានអ្នកចូលរួមទស្សនាយ៉ាងច្រើនកុះករ ដែលភាគច្រើនជាភ្ញៀវជនជាតិបរទេស និងគណៈអង្គទូត ពិសេសក៏មានវត្តមាន លោកជំទាវ ភឿង សាកុណា រដ្ឋមន្ក្រ្តីក្រសួងវប្បធម៌ និងវិចិត្រសិល្បៈចូលរួមទស្សនាជាកិត្តិយសថែមទៀត។
លោកជំទាវ បានថ្លែងបើកកម្មវិធីសម្តែង A Cambodia Magic Flute ថា នេះជាលើកទីមួយដែលមានការសម្តែងសិល្បៈអូប៉េរ៉ាបុរាណនេះ។ លោកជំទាវបន្តថា តួអង្គទាំងអស់នឹងស្លៀកពាក់ជាទំរង់សិល្បៈបុរាណខ្មែរ ហើយសាច់រឿង «A Cambodia Magic Flute» ឬ «ខ្លុយវេទមន្ត» នេះជាសាច់រឿងបែបមនោសញ្ចេតនា ជាការច្នៃប្រឌិតបញ្ចូលគ្នាជាមួយ សិល្បៈបុរាណកម្ពុជា ដែលមិនធ្លាប់មាន និងគួរជាទីចាប់អារម្មណ៍។
ល្ខោនអូប៉េរ៉ាបុរាណ នេះមិនខុសប៉ុន្មានពីល្ខោនយីកេ ឬល្ខោនបុរាណខ្មែរ ដែលជាការសម្តែង រួមជាមួយនឹងចម្រៀង និទានជាសាច់រឿងដ៏ជក់ចិត្ត អំពីអ្នកក្លាហាន ឬព្រះរាជបុត្រានៃនគរមួយ ទៅជួយសង្គ្រោះព្រះរាជិនី ហើយឆ្លងកាត់ឧបសគ្គ និងភាពអស្ចារ្យជាច្រើន។ អ្វីដែលប្លែកចម្លែកអារម្មណ៍នោះ គឺការច្នៃបញ្ចូលគ្នារវាង តន្រ្តីបុរាណខ្មែរ និង វង់ភ្លេងអូប៉េរ៉ា ហើយតួអង្គស្លៀកពាក់បុរាណខ្មែរ រាំច្រៀងតាមតន្រ្តីអូប៉េរ៉ា។
បើតាមអ្នករៀបចំកម្មវិធីដ៏ធំនេះបញ្ជាក់ថា ល្ខោនអូប៉េរ៉ាបុរាណនេះ ក៏គ្រោងនឹងរៀបចំការសម្ដែងឆាកខ្នាតធំនៅលើទឹកដីអង្គរ ខេត្តសៀមរាប នៅក្នុងឆ្នាំ ២០១៩ខាងមុខ ផងដែរ៕