Depay ឆ្លើយម៉ាអេម ទាក់ទិនមូលហេតុធ្លាក់ទម្រង់លេងកាលនៅ Man Utd
- 2018-03-20 13:05:55
- ចំនួនមតិ 0 | ចំនួនចែករំលែក 0
Depay ឆ្លើយម៉ាអេម ទាក់ទិនមូលហេតុធ្លាក់ទម្រង់លេងកាលនៅ Man Utd
ចន្លោះមិនឃើញ
ខ្សែប្រយុទ្ធ Memphis Depay ក្នុងថ្ងៃនេះ បានបង្ហើបពីមូលហេតុដែលខ្លួនធ្លាក់ទម្រង់លេង ពេលលេងឲ្យ Manchester United។ កីឡាករហុល្លង់លើកឡើងថា មកពីខ្លួនមិនសប្បាយចិត្តនឹងខ្លួនឯង។
ក្នុងបទសម្ភាសន៍ជាមួយសារព័ត៌មាន Canal+ កីឡាករ Depay បាននិយាយថា៖ "ខ្ញុំដឹងច្បាស់ថា ខ្ញុំមិនអាចក្លាយជាកីឡាករផ្សេង ក្រៅពីខ្លួនខ្ញុំនោះឡើយ។ ដូច្នេះ ខ្ញុំជាអ្នកទទួលខុសត្រូវ ពេលដែលខ្ញុំលេងមិនសូវបានល្អ"។
កីឡាករហុល្លង់បន្តទៀតថា៖ "កាលនៅលេងនៅ Manchester ហ្នឹង ខ្ញុំខំណាស់ ប៉ុន្តែខ្ញុំមិនសប្បាយនឹងខ្លួនឯងសោះ។ ខ្ញុំសួរខ្លួនឯង ថាតើខ្ញុំអាចក្លាយជាកំពូលកីឡាករយ៉ាងម៉េចកើត បើខ្ញុំមិនទាំងសប្បាយនឹងខ្លួនឯងផងនោះ"។
Depay មិនបានបញ្ជាក់ឲ្យច្បាស់ ថាមូលហេតុអ្វីដែលនាំឲ្យកីឡាករវ័យ ២៤ ឆ្នាំមិនសប្បាយចិត្តនោះឡើយ កាលលេងឲ្យបិសាចក្រហម។
យ៉ាងនេះក្ដី ខ្សែប្រយុទ្ធហុល្លង់ បានគូសបញ្ជាក់ថា ឥឡូវសប្បាយចិត្តនឹងខ្លួនឯងវិញហើយ តាំងពីដូរមក Lyon។
សូមបញ្ជាក់ផងដែរថា Memphis Depay បានផ្ទេរមកចូលពីក្លឹប PSV មកចូលរួមបិសាចក្រហមកាលពីពាក់កណ្ដាលឆ្នាំ ២០១៥ ក្រោមក្ដីរំពឹងយ៉ាងខ្ពស់ពីសំណាក់អ្នកគាំទ្រ។ ទោះជាយ៉ាងណា កីឡាករហុល្លង់បានធ្លាក់ទម្រង់លេងយ៉ាងគំហុក។ Depay លេងបានត្រឹមតែ ៥៣ ប្រកួតប៉ុណ្ណោះ (គ្រប់កម្មវិធី) ឲ្យក្លឹប និងស៊ុតចូលបាន ៧គ្រាប់ មុនពេលចាកចេញទៅ Lyon នៅខែមករា ឆ្នាំមុន។
ក្នុង Ligue 1 រដូវកាលនេះ ខ្សែប្រយុទ្ធហុល្លង់រកបាន ១០ គ្រាប់ និងបញ្ជូនបាល់ឲ្យមិត្តរួមក្រុមបាន ៦លើកហើយឲ្យក្លឹបបារាំង៕