Mark Zuckerberg គួរតែចុះចេញពីតំណែងជា CEO Facebook

2018-03-21 02:50:14
ចំនួនមតិ 0 | ចំនួនចែករំលែក 0

ចន្លោះមិនឃើញ

នេះជាការលើកឡើងរបស់លោក Jason Calacanis អ្នកបណ្ដាក់ទុនលើផ្នែកបច្ចេកវិទ្យាមួយរូប ដែលបានលើកឡើងក្នុងបទសម្ភាសន៍ជាមួយសារព័ត៌មាន CNBC កាលពីម្សិលមិញ។

Jason Calacanis

លោក Jason បាននិយាយថា សមត្ថភាពដោះស្រាយនឹងវិបត្តិរបស់ Mark គឺអន់ណាស់ ហើយបានបន្ថែមថាដល់វេនដែលអ្នកស្រី Sheryl Sandberg ដែលបច្ចុប្បន្នមានតំណែងជាប្រធានប្រតិបត្តិ ឡើងធ្វើជានាយកប្រតិបត្តិវិញម្ដង។

Facebook បានកើតមានបញ្ហាធំ ក្រោយពីមានការរាយការណ៍ថាក្រុមហ៊ុនស្រាវជ្រាវ Cambridge Analytica អាចចូលមើលទិន្នន័យគណនី Facebook ចំនួន ៥០ លានគណនី មុនការបោះឆ្នោតរើសប្រធានាធិបតីនៅឆ្នាំ ២០១៦។

លោក Jason ដែលជានាយកប្រតិបត្តិនៃ Insider.com និងជាអ្នកបណ្ដាក់ទុនលើសេវាកម្ម Uber បាននិយាយថាទង្វើរបស់ Mark គឺបង្ហាញពីការបរាជ័យលើភាពជាអ្នកដឹកនាំ និងបានលើកសរសើរលោកស្រី Sheryl ថា អាចដោះស្រាយលើបញ្ហាបែបនេះបានល្អជាង Mark។

Sheryl Sandberg

កាលពីថ្ងៃចន្ទ ក្រោយផ្ទុះរឿងអាស្រូវ Facebook បាននិយាយថាជួលភ្នាក់ងារឲ្យត្រួតពិនិត្យលើក្រុមហ៊ុនស្រាវជ្រាវ Cambridge Analytica និងបានប្រកាសថាបិទមិនឲ្យក្រុមហ៊ុននេះចូលទៅក្នុងបណ្ដាញរបស់ខ្លួន។

លោក Jason បាននិយាយថាដំណោះស្រាយរបស់ Mark លើបញ្ហានេះ បានធ្វើឲ្យ Facebook មានបញ្ហាកាន់តែធំ ហើយគិតថា Facebook កំពុងប្រឈមនឹងស្ថានភាពដ៏តឹងតែងមួយ៕

ចុចអាន៖

ប្រភព៖ CNBC ប្រែសម្រួល៖ សុខហេង