ហួសចិត្ត! ផ្ទុះការតវ៉ាខ្លាំងពេក លោក ត្រាំ បែរទៅធ្វើរឿងមួយយ៉ាងព្រងើយទៅវិញ

2018-03-25 05:54:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ខណៈមនុស្សរាប់លាននាក់ កំពុងប្រមូលផ្ដុំគ្នានៅតាមផ្លូវដើម្បីតវ៉ាឲ្យមានការគ្រប់គ្រង់កាំភ្លើងនៅក្នុងប្រទេស លោក ដូណាល់ ត្រាំ បែរជាទៅវាយកូនហ្គោលយ៉ាងព្រងើយទៅវិញ។

ក្បួនរថយន្តរបស់ប្រធានាធិបតីរូបនេះ ត្រូវបានគេឃើញធ្វើដំណើរតាមផ្លូវ Palm Beach រដ្ឋ Florida ឆ្ពោះទៅកាន់ Mar-a-Lago ដោយគ្មានការខ្វល់ខ្វាយពីពួកអ្នកតវ៉ាបន្តិចណាសោះ។ ជាធម្មតា រៀងរាល់ព្រឹកថ្ងៃសៅរ៍ គឺជាពេលវេលាដ៏សំខាន់មួយសម្រាប់ប្រធានាធិបតីក្នុងការធ្វើសេចក្តីថ្លែងការណ៍អំពីបញ្ហាដែលមានក្នុងចិត្តរបស់លោក។

ផ្ទុយទៅវិញ លោក ត្រាំ មិនត្រឹមតែមិនខ្វល់ខ្វាយពីការតវ៉ានោះទេ លោកបែរជាបង្ហោះសារមួយនៅក្នុងបណ្ដាញសង្គម Twitter ពាក់ព័ន្ធនឹងការវាយប្រហាររបស់ក្រុម ISIS នៅផ្សារទំនើបប្រទេស បារាំង កាលពីថ្ងៃសុក្រ ដែលសម្លាប់មនុស្ស ៣ នាក់ទៅវិញ។

គួរឲ្យដឹងថា នៅមិនឆ្ងាយប៉ុន្មានពីសេតវិមាន មនុស្សប្រហែលកន្លះលាននាក់ ប្រមូលផ្ដុំគ្នានៅវិថី Pennsylvania ដើម្បីប្រឆាំងនឹងអំពើហិង្សាដោយកាំភ្លើង។ ក្រៅពីនេះ ហ្វូងបាតុករធំៗ ត្រូវបានគេសង្កេតឃើញមាននៅក្រុងវ៉ាស៊ីនតោន អាត្លង់តា បូស្តុន ស៊ីកាហ្គោ ដាឡាស ដេនវើ ឡូស អ៊ែនជើឡេស ម៉ាអាមី មីនណេសូតា ស៊ីអាថល ញូវយ៉កនិងទីក្រុងផ្សេងទៀតផងដែរ៕