មិននឹកស្មានរថភ្លើង គីម ជុងអ៊ុន ជិះទៅចិន មានលក្ខណៈពិសេសអស្ចារ្យដល់ម្លឹង!

2018-03-28 07:17:55
ចំនួនមតិ 0 | ចំនួនចែករំលែក 0

ចន្លោះមិនឃើញ

រថភ្លើងដ៏អាថ៌កំបាំងមួយគ្រឿង បានចូលចតនៅស្ថានីយរថភ្លើងកណ្ដាលក្រុងប៉េកាំង ប្រទេសចិន កាលពីយប់ថ្ងៃច័ន្ទ កន្លងទៅនេះ ហើយត្រូវគេដឹងថា វាបានដឹកមេដឹកនាំកូរ៉េខាងជើង លោក គីម ជុងអ៊ុន ដើម្បីមកធ្វើការពិភាក្សាសម្ងាត់ជាមួយសមភាគីចិន។

រថភ្លើងដែលដឹកលោក គីម ជុងអ៊ុន មានពណ៌បៃតង និងកញ្ចក់ពណ៌ខ្មៅ ហើយថែមទាំងអាចការពារគ្រាប់កាំភ្លើងទៀតផង។

បើយោងតាមរបាយការណ៍ព័ត៌មានរបស់កូរ៉េខាងត្បូង គេជឿជាក់ថា យ៉ាងហោចណាស់មានទូរថភ្លើងសុវត្ថិភាព ៩០ គ្រឿង នៅក្នុងការធ្វើដំណើររបស់មេដឹកនាំផ្ដាច់ការខាងលើ។

ទូរថភ្លើងនិមួយៗសុទ្ធសឹងតែអាចការពារគ្រាប់កាំភ្លើងបាន ធ្វើឲ្យវាមានទម្ងន់កាន់តែធ្ងន់ជាងរថភ្លើងធម្មតា។ វាអាចធ្វើដំណើរបានយឺតបំផុត ពោលគឺត្រឹមល្បឿន ៦០ គីឡូម៉ែត្រក្នុងមួយម៉ោងប៉ុណ្ណោះ។

ព័ត៌មានលម្អិតអំពីរថភ្លើងខាងលើ គឺបានមកពីការស៊ើបការណ៍សម្ងាត់ , លិខិតអនុញ្ញាតឲ្យធ្វើដំណើរមុនៗ និង ខ្សែវីដេអូព័ត៌មានដ៏កម្ររបស់រដ្ឋ។

យ៉ាងណាមិញ លោក គីម ជុងអ៊ុន ត្រូវបានគេដឹងថា ប្រើប្រាស់ការធ្វើដំណើរស្រដៀងគ្នាជាមួយឪពុក គឺ លោក គីម ជុងអ៊ីល ចំពោះការចេញទៅក្រៅប្រទេសដ៏កម្រម្ដងម្កាល។ កាលពីសម័យលោក គីម ជុងអ៊ីល កាន់តំណែង រថភ្លើងតែងដឹកមន្ត្រីសន្តិសុខ ១០០ នាក់ , ត្រួតពិនិត្យស្ថានីយរថភ្លើងក្រែងមានគ្រាប់បែក និង ការគំរាមកំហែងដទៃទៀត រួមទាំង សាកល្បងសុវត្ថិភាពនៃផ្លូវដែកជាមុនផងដែរ។

លើសពីនេះទៅទៀត ឧទ្ធម្ភាគចក្រ និងយន្តហោះយោធា នឹងហោះពីលើរថភ្លើងដើម្បីផ្ដល់សុវត្ថិភាពបន្ថែមទៀត។ មិនតែប៉ុណ្ណោះ ស្ថានីយរថភ្លើងចំនួន ២០ កន្លែង ត្រូវបានគេសាងសង់ឡើងនៅទូទាំងប្រទេសកូរ៉េខាងត្បូង សម្រាប់ការប្រើប្រាស់ផ្ទាល់ខ្លួនរបស់មេដឹកនាំ៕