អាហារូបករណ៍បណ្ដុះសិល្បករថ្មីគាំទ្រដោយក្រុមក្មេងខ្មែរ និងឡូរ៉ាម៉ម ជិតឈប់ទទួលពាក្យហើយ

2018-03-30 11:31:12
ចំនួនមតិ 0 | ចំនួនចែករំលែក 0

ចន្លោះមិនឃើញ

ដំណឹងល្អ សម្រាប់សិល្បករ ឬអ្នកនិពន្ធចម្រៀងខ្មែរវ័យក្មេង ដែលចង់អភិវឌ្ឍសមត្ថភាពឲ្យកាន់តែខ្លាំង ព្រោះឥឡូវគម្រោង The Sound Initiative ដែលមានឡូរ៉ាម៉ម និងក្រុមក្មេងខ្មែរជាទូតសុឆន្ទៈ បានប្រកាសបើកកម្មវិធីបណ្ដុះបណ្ដាលតន្ត្រីរយៈពេល១ឆ្នាំ នៅខែមិថុនាខាងមុខនេះ។ អ្នកចម្រៀង-អ្នកនិពន្ធបទចម្រៀង ៥នាក់ និងផលិតករតន្ត្រី ៥នាក់នឹងត្រូវជ្រើសរើសសម្រាប់កម្មវិធីអាហារូបករណ៍១០កន្លែង ក្រោមការឧបត្ថម្ភពីក្រុមហ៊ុនធានារ៉ាប់រងអាយុជីវិត Prudential។

វគ្គសិក្សានេះផ្ដោតសំខាន់ទៅលើការរៀននិពន្ធបទចម្រៀង និងជំនាញចាំបាច់ដែលបានប្រើប្រាស់ដោយអ្នកនិពន្ធបទចម្រៀងល្បីៗកន្លងមក ហើយក្រោយបញ្ចប់វគ្គសិក្សា ពួកគេនឹងត្រូវបំពាក់បំប៉នជំនាញបន្ថែមទៀតជាច្រើនដើម្បីចាប់ផ្ដើមថត និង mix បទភ្លេង។

កញ្ញា ឡូរ៉ាម៉ម ម្ចាស់ពានរង្វាន់អន្តរជាតិស្ត្រីឆ្នើម ផ្នែកសិល្បៈ និងវប្បធម៌ ២០១៨ពីកម្មវិធី “ស្ត្រីនៃពេលអនាគតក្នុងតំបន់អាស៊ីភាគអាគ្នេយ៍” បានឲ្យដឹងថា៖ «កម្មវិធីនេះនឹងផ្ដល់ឲ្យថាសិល្បករយើងនូវជំនាញដែលពួកគេត្រូវការបំផុតដើម្បីអាចអភិវឌ្ឍន៍វិស័យតន្រ្តីខ្មែរឲ្យកាន់តែរីកចម្រើនថែមមួយកម្រិតទៀត»។

ក្រុមក្មេងខ្មែរ បានឲ្យដឹងថា៖ «កម្មវិធីនេះមិនមែនសម្រាប់តែសិល្បករថ្មីៗប៉ុណ្ណោះទេ ប៉ុន្តែក៏សម្រាប់តន្រ្តីករដូចពួកយើងដែលចង់សិក្សា និងអភិវឌ្ឍខ្លួនបន្ថែមទៀតដែរ”។

លោក Laura Baker ដែលជាតន្រ្តីករអង់គ្លេស និងជាស្ថាបនិកនៃកម្មវិធី The Sound Initiative បានឲ្យថា៖ «សម័យនេះតន្រ្តីករខ្មែរគួរតែមានពហុជំនាញផ្សេងៗគ្នា។ ការអប់រំ និងការបង្ហាត់បង្រៀនផ្នែកតន្ត្រីនេះ នឹងជួយពួកគេឲ្យបង្កើនសមត្ថភាពច្នៃប្រឌិត មានភាពបត់បែននៅក្នុងវិថីសិល្បៈ បង្កើនលទ្ធភាពក្នុងការទទួលបានការគាំទ្រ បច្ចេកវិទ្យា និងជំនាញបច្ចេកទេសដើម្បីបង្កើតតន្រ្តីខ្មែរ original ប្រកបដោយលក្ខណៈវិជ្ជាជីវៈ»។

ការស្នើសុំអាហារូបករណ៍ នឹងទទួលពាក្យរហូតដល់ថ្ងៃទី០១ មេសា ២០១៨។

ចាប់អារម្មណ៍ចូលរួម សូមចូលទៅកាន់វេបសាយ Sound Initiative៖ www.thesoundinitiative.com/apply៕

ដោយ ៖ ដេត លីដា