នាយ កុយ ប្រទះឃើញអតីតតារាសម្ដែងឆ្នាំ ៩០ ចៅ ចាន់ណារី ក្នុងសភាពគួរឲ្យអាណិតពន់ពេក

2018-04-05 04:43:58
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ជួង ជី ហៅនាយ កុយ បានបញ្ចេញឲ្យដឹងថា លោកបានប្រទះនឹងអតីតតារាសម្ដែងក្នុងទសវត្សរ៍៩០ លោក ចៅ ចាន់ណារី ថ្មីៗនេះ នៅតំបន់ខាងខេត្តក្រចេះក្នុងសភាពមើលទៅគួរឲ្យអាណិតពន់ពេក។

រូបភាព៖ ផ្ដល់ដោយនាយ កុយ

លោក ជួង ជី ប្រាប់ថា ពេលជួបអតីតតារាសម្ដែងខាងលើនាពេលនោះ លោកមើលអត់ចង់ស្គាល់...ដោយសារតែភាពជាក់ស្ដែង លោក ចៅ ចាន់ណារី មានរូបរាងចាស់ខ្លាំង ហើយសុខភាពក៏មិនអំណោយផលទៀត។

“មើលទៅគាត់ឡើងស្រម៉ក មើលទៅអាណិតពន់ពេក ខ្ញុំថា បងឯងម៉េចមិនឡើងមកភ្នំពេញមករកសម្ដែងអីហ្នឹងគេ...គាត់ថា ហ៊ឺ...អត់ហ៊ានឡើងយើងអត់អីចឹង...ខ្លាចខ្មាសគេ ដល់គាត់និយាយចឹង រិតតែអាណិតគាត់ទៀត"។

រូបភាព៖ ផ្ដល់ដោយនាយ កុយ

ដោយសារតែមានការងារបន្ទាន់ដែរ លោក ជួង ជី ប្រាប់ថា មិនបានសួរនាំអតីតតារាសម្ដែងច្រើនទេ បានត្រឹមតែសុំថតរូប ២-៣ប៉ុស្ដិ៍ប៉ុណ្ណោះ។ ដំណឹងនេះ លោកក៏បានបញ្ជូនមកសមាគមសិល្បករស្ម័គ្រចិត្តដែរ ក្នុងនោះ ថ្នាក់ដឹកនាំសមាគម ក៏បានឯកភាព និងត្រៀមក្រុមការងារចាំជួបជាមួយលោក ចៅ ចាន់ណារី មុនសម្រេចថា មានអ្វីអាចជួយលោកបាន។

តាមប្រភពពីតារាកំប្លែងខាងលើដដែល អតីតតារាសម្ដែងជើងចាស់ គ្រោងនឹងឡើងមកភ្នំពេញឆាប់ៗ នៅមុនបុណ្យចូលឆ្នាំខ្មែរនេះ ដើម្បីមកព្យាបាលជំងឺ។ លោក ចៅ ចាន់ណារី គឺជាអតីតតារាសម្ដែងក្នុងទសវត្សរ៍ទី ៩០ ជាមួយអ្នកស្រី អម្ពរ ទេវី ទេព រិនដារ៉ូ ជាដើម។ ក្រោយបាត់ដំណឹងរាប់ឆ្នាំ លោកធ្លាប់លេចមុខម្ដងដែរនៅឆ្នាំ ២០១៥ គ្រាដែលលោកឡើងមកព្យាបាលជំងឺស្ទះសរសៃឈាមនៅមន្ទីរពេទ្យកាល់ម៉ែត្រ៕

អត្ថបទ៖ ទារិកា