បន្ទាប់ពីរំសាយដែនជម្រកសត្វព្រៃ២តំបន់ ឥឡូវសម្រេចបង្កើតថ្មីនៅខេត្តពិសេស១

2018-04-10 09:58:02
ចំនួនមតិ 0 | ចំនួនចែករំលែក 0

ចន្លោះមិនឃើញ

រដ្ឋាភិបាលកម្ពុជា បានចេញអនុក្រឹត្យចុះថ្ងៃទី០៥ មេសា ២០១៨ បង្កើតដែនជម្រកសត្វព្រៃថ្មីមួយមានឈ្មោះថា "សង្ឃរុក្ខាវ័ន" ដែលមានផ្ទៃដីសរុបចំនួន ៣០ ២៥៤ហិកតា។ ដែនជម្រកនេះមានទីតាំងស្ថិតនៅក្នុងភូមិសាស្ត្រស្រុកអន្លង់វែង ស្រុកចុងកាល និងក្រុងសំរោង ខេត្តឧត្ដរមានជ័យ។

ការបង្កើតដែនជម្រកសត្វព្រៃនេះឡើង មានគោលបំណងសំខាន់មានដូចជា៖

ដើម្បីធានាឲ្យមានការថែទាំទីជម្រកសត្វព្រៃ និងប្រព័ន្ធអេកូឡូស៊ី សារព័ន្ធមជ្ឈដ្ឋានធម្មជាំតិ ព្រមទាំងធានាឲ្យមានការបំពេញលក្ខខណ្ឌចាំបាច់សម្រាប់ប្រភេទណាមួយនៃសត្វព្រៃ រុក្ខជាតិ និងជីវៈចម្រុះ
រក្សាលំនឹងបរិស្ថាន ការពារ និងអភិរក្សធនធានធម្មជាតិ និងរួមចំណែកកាត់បន្ថយការប្រែប្រួលអាកាសធាតុ និងហានិភ័យគ្រោះមហន្តរាយធម្មជាតិ
ផ្ដល់ផលិតផល និងសេវាកម្មធម្មជាតិ សម្រាប់ការប្រើប្រាស់ដោយនិរន្តរភាព
លើកទឹកចិត្តឲ្យមានការចូលរួមរបស់សហគមន៍មូលដ្ឋាន ក៏ដូចជាអ្នកពាក់ព័ន្ធក្នុងការថែរក្សាការពារអភិរក្ស និងការប្រើប្រាស់ធនធានធម្មជាតិដោយនិរន្តរភាព។

គួររំឭកថា សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា កាលពីខែមីនាកន្លងទៅ បានចេញព្រះរាជក្រឹត្យរំសាយដែនជម្រកសត្វព្រៃស្នួល ស្ថិតក្នុងខេត្តក្រចេះ ដែលមានផ្ទៃដីចំនួន ៧៥ ០០០ហិកតា និងដែនជម្រកសត្វព្រៃរនាម ដូនសំ ក្នុងខេត្តបាត់ដំបង ដែលមានផ្ទៃដីចំនួន ៣៩ ៩៦១ហិកតា។ សូមបញ្ជាក់ថា នៅក្នុងព្រះរាជក្រឹត្យរបស់ព្រះមហាក្សត្រ ពុំបានបញ្ជាក់នូវមូលហេតុនៃការរំសាយដែនជម្រកទាំង២កន្លែងនេះទេ៕

អត្ថបទ៖ ស៊ិន សាវ៉េត