Bayern ដាក់លក់អាវមហាសែនចម្លែក ក្រោយឈ្នះពានលីគ ៦ឆ្នាំជាប់គ្នា

2018-04-10 12:30:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ដើម្បីអបអរការឈ្នះពាន Bundesliga ៦ឆ្នាំជាប់គ្នារបស់ខ្លួន ក្លឹប Bayern Munich បានដាក់លក់អាវមួយចំនួនដល់អ្នកគាំទ្រខ្លួន។ ក្នុងចំណោមនោះមានអាវមួយ មានលក្ខណៈប្លែកខុសគេ។

អាវមួយនេះ ជាប្រភេទអាវយឺតធម្មតា មានរូប Logo ក្លឹបនៅផ្នែកខាងលើនៃអាវ ហើយនៅខាងក្រោមនោះមានសរសេរជាភាសាអាល្លឺម៉ង់ថា Deutscher Meister (ជើងឯកអាល្លឺម៉ង់)។ ខាងក្រោម Deustcher Meister មានសរសេរពាក្យ SIXPACK (សាច់ដុំ ៦កង់) និងឆ្នាំ ២០១៣,២០១៤, ២០១៥, ២០១៦ , ២០១៧, ២០១៨ ដែលជាបណ្ដាឆ្នាំទាំង ៦ជាប់គ្នា Bayern Munich ឈ្នះលីគកំពូលអាល្លឺម៉ង់។

អ្វីដែលគួរឲ្យចាប់អារម្មណ៍នោះ គឺបន្ថែមពីការសរសេរ SIXPACK ក៏មានការបង្ហាញតែម្ដងនូវរូបភាពសាច់ដុំ ៦កង់។ ការណ៍នេះ ធ្វើឲ្យអាវមានសភាពខុសប្លែកខ្លាំងពីម៉ូតអាវដែលក្លឹបដាក់លក់រាល់ដង។

អាវនេះត្រូវបានដាក់លក់ក្នុងគេហទំព័រផ្លូវការរបស់ក្លឹបយក្សអាល្លឺម៉ង់មួយនេះ និងមានតម្លៃ ២៤,៩៥ អឺរ៉ូ (ប្រមាណ ៣០ ដុល្លារសហរដ្ឋអាមេរិក)។

សូមបញ្ជាក់ផងដែរថា បន្ទាប់ពីឈ្នះ Augsburg ៤-១ កាលពីចុងសប្ដាហ៍កន្លងទៅ ក្លឹប Bayern Munich បានលើកពានលីគកំពូលអាល្លឺម៉ង់លើកទី ២៨របស់ខ្លួន ទាំងនៅសល់ ៥ប្រកួតក្នុងដៃ។ ប្រការនេះធ្វើឲ្យក្លឹបលើកពានមុនគេ ក្នុងចំណោមក្លឹបកំពូលតារាងផ្សេងទៀត នៅបណ្ដាលីគធំៗអឺរ៉ុបទាំង ៥៕