ទើបដឹង! បុគ្គលល្បីៗក្នុងបាល់ទាត់ទាំងនេះធ្លាប់លេងក្នុងក្រុមតែមួយ

2018-04-17 11:01:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ខាងក្រោមគឺជាឈ្មោះបណ្ដាបុគ្គលល្បីៗក្នុងបាល់ទាត់ ដែលលោកអ្នកប្រហែលមិនធ្លាប់ដឹងថា ពួកគេធ្លាប់លេងក្នុងក្រុមតែមួយមានដូចតទៅ៖

១.ខ្សែស្លាប Riyad Mahrez និង ខ្សែការពារ Benjamin Mendy៖ ពួកគេទាំងពីរធ្លាប់ជាមិត្តរួមក្រុមនឹងគ្នា នៅក្លឹប Le Havre។ Mahrez លេងឲ្យក្លឹបបារាំងជាផ្លូវការពីឆ្នាំ ២០១១-២០១៤ ខណៈខ្សែការពារស្លាប Mendy លេងពីឆ្នាំ ២០១១ ដល់ឆ្នាំ ២០១៣។ បច្ចុប្បន្នពួកគេលេងនៅអង់គ្លេសទាំងពីរ មួយនៅ Leicester City ហើយមួយទៀតនៅ Manchester City។

២.អ្នកចាត់ការ Mauricio Pochettino និង អតីតកីឡាករ Ronaldinho៖ ពូកគេធ្លាប់លេងជាមួយគ្នានៅក្លឹប PSG ពីឆ្នាំ ២០០១ ដល់ ២០០៣។ នៅឆ្នាំ ២០០៣ អតីតខ្សែការពារ Pochettino បានចាកចេញទៅលេងនៅក្លឹបបារាំង Bordeaux ចំណែកឯ Ronaldinho ទៅចូលរួមជាមួយ Barcelona នៅអេស្ប៉ាញ។ Pochettinho បានចាប់ផ្ដើមអាជីពជាអ្នកចាត់ការ ពីឆ្នាំ ២០០៩ ហើយបច្ចុប្បន្នកំពុងដឹកនាំក្លឹប Tottenham Hotspurខណៈ វីរបុរសបាល់ទាត់ Ronaldinho ទើបប្រកាសចូលនិវត្តន៍ពីបាល់ទាត់កាលពីដើមឆ្នាំនេះ។

៣.ខ្សែប្រយុទ្ធ Eden Hazard និង Pierre-Emerick Aubameyang៖ កីឡាករទាំងពីរធ្លាប់ជាមិត្តរួមក្រុមគ្នា កាលនៅលេងឲ្យក្លឹប Lille។ កីឡាករបែលហ្សិក Hazard លេងឲ្យក្លឹបបារាំងពីឆ្នាំ ២០០៧ រហូតដល់ឆ្នាំ ២០១២ មុនចាកចេញមក Chelsea។ ខ្សែប្រយុទ្ធ Aubameyang វិញ លេងនៅទីនោះ ក្នុងនាមជាកីឡាករខ្ចីជើងពី AC Milan នៅរដូវកាល ២០០៩/១០។ ដូច Mahrez និង Mendy ដែរ ឥឡូវពួកគេទាំងពីរសុទ្ធតែលេងនៅក្នុងលីគកំពូលអង់គ្លេសដូចគ្នា មួយនៅ Arsenal មួយទៀតនៅ Chelsea។

៤.អ្នកចាត់ការ Diego Simeone និងខ្សែប្រយុទ្ធ Fernando Torres៖ Simeone និង Torres ធ្លាប់លេងជាមួយគ្នាក្នុងនាមជាមិត្តរួមក្រុម នៅ Atletico Madrid។ អតីតខ្សែបម្រើការពារ Simeone លេងឲ្យក្លឹបអេស្ប៉ាញពី ២០០៣-២០០៥ ខណៈ Torres ពីឆ្នាំ ២០០១-២០០៧។ ក្រោយមក Torres បានដូរទៅលេងនៅអង់គ្លេស និងអ៊ីតាលី ហើយត្រលប់មកក្លឹបចាស់វិញនៅឆ្នាំ ២០១៥ ខណៈលោក Simeone បានចាប់អាជីពជាអ្នកចាត់ការនៅឆ្នាំ ២០០៦ ហើយបានដឹកនាំ Atletico ពីឆ្នាំ ២០១១មក។

៥.Dani Alves និង Sergio Ramos៖ កីឡាករទាំងពីរធ្លាប់លេងជាមួយគ្នានៅ Sevilla នៅរដូវកាល ២០០៤/០៥។ នៅឆ្នាំ ២០០៥ Ramos បានចេញទៅ Real Madrid រីឯ Alves បន្តលេងឲ្យក្លឹបរហូតដល់ឆ្នាំ ២០០៨ មុនផ្ទេរមកលេងឲ្យ Barcelona រហូតដល់ឆ្នាំ ២០១៦។ បច្ចុប្បន្ន ខ្សែការពារ Ramos នៅតែបន្តលេងឲ្យក្លឹបអធិរាជពណ៌សនៅអេស្ប៉ាញ ខណៈកីឡាករប្រេស៊ីល Alves លេងឲ្យ PSG ក្រោយលេងបានមួយរដូវកាលឲ្យ Juventus បន្ទាប់ពីចេញពី Barca។

៦.Mesut Ozil និង Ivan Rakitic៖ កីឡាករសញ្ជាតិអាល្លឺម៉ង់ និងខ្សែបម្រើសញ្ជាតិក្រូអាតធ្លាប់ជាមិត្តរួមក្រុមគ្នា កាលលេងឲ្យក្លឹបអាល្លឺម៉ង់ Schalke រដូវកាល ២០០៧/០៨។ នៅឆ្នាំ ២០០៨ Ozil បានចាកចេញពីក្លឹបទៅចូលរួម Werder Bremen មុនដូរទៅ Real Madrid ២ ឆ្នាំបន្ទាប់។ Rakitic វិញ នៅលេងឲ្យ Schalke ដល់ឆ្នាំ ២០១១ មុនមក Sevilla។ បច្ចុប្បន្ន ខ្សែបម្រើប្រយុទ្ធ Ozil លេងនៅ Arsenal ខណៈ ខ្សែបម្រើក្រូអាត Rakitic លេងឲ្យ Barcelona៕