Buffon ហៅអាជ្ញាកណ្ដាល ជាឃាតក មនុស្សគ្មានបេះដូង សម្លាប់ Juventus ទាំងរស់

2018-04-12 01:48:46
ចំនួនមតិ 0 | ចំនួនចែករំលែក 0

ចន្លោះមិនឃើញ

Gianluigi Buffon អ្នកចាំទីក្រុម Juventus បានចាត់ទុកអាជ្ញាកណ្ដាល Michael Oliver ថាជាមនុស្សអត់បេះដូង ជាឃាតកសម្លាប់ក្ដៅស្រមៃរបស់ក្រុមសេះបង្កង់ទាំងរស់។

ត្បិតតែចាញ់ ៣-០ កាលពីជើងទី១កន្លងទៅមែន ប៉ុន្តែនៅជើងទី២យប់មិញនេះ ក្រុម Juventus លេងបានយ៉ាងល្អ ធ្វើឱ្យក្រុម Real Madrid ដែលបាត់បង់ខ្សែការពារសំខាន់ Ramos ផងនោះ ពិបាកទប់មែនទែន។ ការព្យាយាមរបស់ក្រុមលេខ១នៅអ៊ីតាលីពិតជាមិនអត់ប្រយោជន៍មែន ពោលគឺពួកគេអាចវាយបកយកបាន៣គ្រាប់វិញ មុនពេល Cristiano Ronaldo ប៉េណាល់ទីសម្លាប់ក្ដីស្រមៃរបស់ Juventus វិញ នៅនាទី៩០+។ មួយគ្រាប់ចុងម៉ោងដែលឱ្យដោយអាជ្ញាកណ្ដាល Oliver នេះ បានធ្វើឱ្យ Buffon ខឹងយ៉ាងខ្លាំងរហូតតវ៉ាបានកាតក្រហមត្រូវបណ្ដេញចេញពីទីលានផងដែរ។

ក្រោយពីចប់ការប្រកួតនោះទៅ អ្នកចាំទីចាស់វស្សាបានបញ្ជាក់ថារឿងអាជ្ញាកណ្ដាលនេះថា៖ “គេជាឃាតកសម្លាប់ក្ដីស្រមៃរបស់ Juventus ។ គេគ្មានបេះដូងទេ មានតែធុងសំរាមក្នុងដើមទ្រូងរបស់គេ។ គាត់គួរតែសម្រាកនៅផ្ទះ អង្គុយមើលទូរទស្សន៍វិញល្អជាង”។

នេះជាការប្រកួតចុងក្រោយរបស់ Buffon នៅ Champions League ហើយ ដោយសាមីបានបញ្ជាក់ដូច្នេះតាំងពីបើករដូវកាលមកម្ល៉េះ។ ខណៈដែលបុរសវ័យ៤០ឆ្នាំរូបនេះ មានក្ដីស្រមៃតាំងពីដើមមកថាចង់លើកពាន UCL ឱ្យបានម្ដងមុនចូលនិវត្តន៍៕

ប្រភព៖ Dailymail ប្រែសម្រួល៖ មុន្នីរម្យ