កីឡាអាស៊ីបន្ថយមេដាយមាសត្រឹម៤៦២គ្រឿង ខណៈ E-Sports បង្ហាញខ្លួនលើកដំបូង

2018-04-20 02:56:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ព្រឹត្តិការណ៍កីឡាធំប្រចាំទ្វីបអាស៊ី Asian Games នឹងចាប់ដំណើរការប្រកួតពីថ្ងៃទី១៨ ខែសីហា ដល់ថ្ងៃទី២ ខែកញ្ញា ឆ្នាំ២០១៨ខាងមុខនេះនៅប្រទេសឥណ្ឌូណេស៊ីដែលចំនួនមេដាយមាសត្រូវបានកាត់បន្ថយ និងកីឡាសម័យទំនើប E-Sports ត្រូវបានដាក់ឲ្យបង្ហាញខ្លួនជាលើកដំបូងក្នុងប្រវត្តិសាស្ត្រព្រឹត្តិការណ៍កីឡានេះ។

តាមសេចក្តីប្រកាសដំបូងរបស់ក្រុមប្រឹក្សាអូឡាំពិកអាស៊ីកាលពីខែមីនា ឆ្នាំ២០១៧ថា ព្រឹត្តិការណ៍កីឡាធំទ្វីបអាស៊ី Asian Games នឹងមានចំនួន៤២ប្រភេទកីឡាដែលមាន៤៨៤វិញ្ញាសាស្មើនឹងមេដាយមាស៤៨៤គ្រឿង។ យ៉ាងណា កីឡាមួយចំនួនត្រូវកាត់បន្ថយដោយផ្អែកហេតុផលលើការចំណាយ។

សេចក្តីប្រកាសចុងក្រោយរបស់ក្រុមប្រឹក្សាអូឡាំពិកអាស៊ីកាលពីខែកញ្ញា ឆ្នាំ២០១៧បង្ហាញថា ចំនួនមេដាយមាសត្រូវបានកាត់បន្ថយមកសល់ត្រឹម៤៦២គ្រឿងសម្រាប់ប្រកួតប្រជែងឆ្នាំនេះ។ យ៉ាងណា ចំនួនវិញ្ញាសានេះបានក្លាយជាចំនួនធំបំផុតលំដាប់ទីពីរក្នុងប្រវត្តិសាស្ត្រព្រឹត្តិការណ៍កីឡានេះ។ វិញ្ញាសាច្រើនបំផុតក្នុងព្រឹត្តិការណ៍កីឡានេះគឺនៅឆ្នាំ២០១០មានរហូតដល់៤៧៦ពេលដែលចិនទទួលធ្វើម្ចាស់ផ្ទះលើកទី២។

សេចក្តីប្រកាសផ្លូវការពីការដាក់កីឡា E-Sports

អ្វីដែលគួរឲ្យចាប់អារម្មណ៍គឺប្រភេទកីឡាអេឡិចត្រូនិក ឬ E-Sports ដែលជាកីឡាសម័យទំនើបប្រើប្រាស់តាមបច្ចេកវិទ្យាសុទ្ធនោះនឹងបង្ហាញខ្លួនជាលើកដំបូងក្នុងព្រឹត្តិការណ៍កីឡាធំទ្វីបអាស៊ីនេះ ហើយក៏ជាលើកដំបូងរបស់ E-Sports ដែលមានមុខក្នុងព្រឹត្តិការណ៍ធំៗបែបនេះ។ យ៉ាងណា ការបង្ហាញខ្លួននេះគឺគ្រាន់តែជាការប្រកួតសម្តែងផ្លូវការតែប៉ុណ្ណោះ ប៉ុន្តែមិនមែនជាកីឡាប្រកួតដើម្បីដណ្តើមយកមេដាយដូចកីឡាផ្សេងៗទៀតឡើយ។

រឹតតែពិសេសសម្រាប់កីឡា E-Sports គឺប្រទេសចិនបានប្រកាសជាផ្លូវការដាក់កីឡាអេឡិចត្រូនិកនេះឲ្យចូលរួមប្រកួតដណ្តើមយកមេដាយដូចកីឡាផ្សេងៗទៀតដែរនៅពេលចិនទទួលរៀបចំធ្វើម្ចាស់ផ្ទះកីឡា Asian Games ឆ្នាំ២០២២ខាងមុខនេះនៅទីក្រុង Hangzhou។

ក្រុមកីឡា E-Sports កម្ពុជាធ្លាប់ឈ្នះជើងឯកនៅប្រទេសចិន

សូមបញ្ជាក់ថា កីឡាការិនីតេក្វាន់ដូជម្រើសជាតិកម្ពុជា ស៊ន សៀវម៉ី បានបង្កើតកំណត់ត្រាប្រវត្តិសាស្ត្រលើកដំបូងពីការឈ្នះមេដាយមាសពីព្រឹត្តិការណ៍កីឡាទ្វីបអាស៊ីនេះកាលពី៤ឆ្នាំមុនគឺឆ្នាំ២០១៤នៅពេលប្រទេសកូរ៉េខាងត្បូងរៀបចំធ្វើម្ចាស់ផ្ទះ។ ឆ្នាំ២០១៨នេះ កម្ពុជាក៏គ្រោងបញ្ជូនអត្តពលិករបស់ខ្លួនចូលរួមប្រកួតដែរ៕