កាន់តែក្ដៅ អ៉ឹង និមល ប្រតិកម្មចំពោះការរិះគន់ ថាសិល្បករស្លៀកពាក់បុរាណ គឺស្លៀកតាមរឿង "បុព្វេសន្និវាស"

2018-04-21 08:52:52
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាបង្ហាញម៉ូដខ្ពស់ស្រលះ អ៉ឹង និមល បានប្រតិកម្មទៅនឹងអ្នករិះគន់ប៉ុន្មានថ្ងៃនេះ ដែលថាអ្នកស្លៀកពាក់បុរាណព្រោងព្រាតថតបង្ហោះប៉ុន្មានថ្ងៃនេះថាចម្លងតាម រឿង «បុព្វេសន្និវាល»នោះ ថា នោះជាទម្រង់សិល្បៈបុរាណរបស់ខ្មែរពិតប្រាកដ។

អំណះអំណាងនេះ និមល លើកទឡ្ហីករណ៍ ទម្រង់សិល្បៈបុរាណ ដែលប្រិយមិត្តបានឃើញប៉ុន្មានថ្ងៃនេះ គឺធ្លាប់បានបង្ហាញ ទាំងសម្តែងក្នុងរឿងខ្មែរ លើរោងកុន និងតាមទូរទស្សន៍មុននឹងរឿងនេះល្បីទៅទៀត។

កញ្ញា អ៉ឹង និមល បានបង្ហោះថាដូចច្នេះថា៖ «សូមមានមតិយោបលបន្តិច សំរាប់ទម្រង់បុរាណ សិល្បករសិល្បការនី ក៍ដូចជាអ្នកដឹកនាំ តែងតែយកមកសម្តែងក៍ដូចជាផលិតជារឿយៗក្នុងបទចម្រៀង ខ្សែរភាពយន្ត ក៍ដូចជាកម្មវិធីផ្សេងៗមុននឹងមាន(រឿងបុព្វេសន្និវាស) ទៅទៀត តែសម្រាប់អ្នកចាំតែរិះគន់ជាន់ពន្លិចមួយចំនួនតូចដែលតែងតែបញ្ចេញមតិដោយមិនគិតពិចារណា...»។

ការបញ្ចេញមតិសារធារណៈបែបធ្វើឡើងបន្ទាប់ពី មានរូបភាពរបស់កញ្ញា និងក្រុមមិត្តសិល្បកររបស់កញ្ញា ជាច្រើនបានបង្កើតកម្មវិធីខួបកំណើត វ័យ ២៩ ឆ្នាំកាលពីម្សិលមិញ ដោយគ្រប់គ្នាបានស្លៀកពាក់សំលៀកបំពាក់បែបសម័យ ឧដុង្គ របស់ខ្មែរបង្កើតជាបរិយាកាសប្លែកភ្នែក និងធ្វើឱ្យសិល្បកររូបនេះរំភើបយ៉ាងខ្លាំង។

ប៉ុន្តគាប់ជួនភាពយន្តភាគថៃរឿង "បុព្វេសន្និវាល" ដែលសាច់រឿងមានបង្ហាញទម្រង់សំលៀកបំពាក់ស្រដៀងគ្នាកំពុងចាក់ផ្សាយលើកញ្ចក់ទូរទស្សន៍ក្នុងស្រុកដែរនោះ ក៏បានធ្វើឱ្យមានការរិះគន់លើការស្លៀកពាក់នេះថា ជាសមិទ្ធផល បានពីឥទ្ធិពលនៃខ្សែរឿងរបស់ប្រទេសជិតខាងមួយនេះទៅវិញ។

ចំពោះបញ្ហានេះ កញ្ញា ក៏បន្ថែមពាក្យធ្ងន់ដាក់អ្នករិះគន់ខ្លះទៀតថា ជាការរិះគន់ជាន់ពន្លិច មិនស្គាល់ពីទម្រង់សិល្បៈរបស់ខ្មែរ។ កញ្ញា អ៉ឹង និមល សរសេរបន្តថា ៖ «ហើយមិនដែលបើកភ្នែកមើលទេ គឺបើកតែមាត់ចាំរិះគន់ក្នុងន័យជាន់ពន្លិច មិនដឹងគិតអីរាល់ថ្ងៃហ្នឹង ហើយសម្រាប់សំលៀកបំពាក់សម័យដើមដែលខ្មែរយើងយកមកប្រើតែងតែថាចំលងពីសៀម សួរថាមានស្គាល់ខ្មែរខ្លួនឯងច្បាស់ទេមុននឹងចេញមករិះគន់ហ្នឹង?»

ជាចុងក្រោយ សិល្បករសម្តែង និងជាតារាបង្ហាញម៉ូដម្នាក់នេះ លើកឡើងថា ជាជាតិខ្មែរគួរគប្បីលើកតម្លៃជាតិសាសន៍ខ្លួនឯង ព្រោះមិនមានជាតិសាសន៍ណាមកឱ្យតម្លៃជំនួសខ្លួនទេ។ "បើខ្មែរយើងមិនអោយតម្លៃគ្នាឯងផងតើមានជាតិសាសន៍ណា គេមកអោយតម្លៃយើង! សូមគិតនឹងពិចារណាម្តងទៀតសម្រាប់ខ្មែរមួយចំនួនតូច ដែលមិនចេះអោយតម្លៃសម្រាប់ខ្មែរគ្នាឯងហ្នឹង!" កញ្ញា អ៉ឹង និមល បន្ថែម៕