កុនខ្មែរ១រឿងនេះ អ្នកជំនាញពោលសរសើរពីគុណភាព តែបែរជាខ្សត់អ្នកទៅមើល (វីដេអូ)

2018-04-23 08:11:29
ចំនួនមតិ 0 | ចំនួនចែករំលែក 0

ចន្លោះមិនឃើញ

«វិបល្លាស/រចនា» ជាភាពយន្តនិយាយពីជំងឺផ្លូវចិត្ត ស្នេហា លាយឡំកំប្លុកកំប្លែង ទើបចាក់បញ្ចាំងនៅរោងកុនថ្មីនេះ ត្រូវបានអ្នកជំនាញខាងកុនអះអាងដូចៗគ្នាថា ជារឿងដែលល្អ មានធ្លាប់បានឃើញពីមុនមក តែបែរជាមិនសូវមានអ្នកទៅទស្សនាទៅវិញ។

អ្នកដឹកនាំរឿង «កោះពេជ្រ» «លោក ជូ ដាវី បានលើកឡើងថា លោកមានការភ្ញាក់ផ្អើលខ្លាំងទៅលើគុណភាពនៃការសម្តែង និងគុណភាពរឿងទាំងមូល បើទោះជាក្រុមអ្នកផលិតថ្មីៗក៏ដោយ។

ស្រដៀងគ្នានេះដែរ អ្នកដឹកនាំរឿង «គ្រាប់ពេជ្រ» លោក សុខ វិសាល មើលឃើញថា រឿង «វិបល្លាស/រចនា» ប្លែកពីរឿងផ្សេង ទៀតដែលបានផលិតនៅស្រុកខ្មែរ ដោយលោកបញ្ជាក់ថា អ្នកផលិតរឿងនេះមានភាពក្លាហានក្នុងការយកខ្សែរឿងនេះមកផលិត។ ជារួមលោកវាយតម្លៃថា រឿងនេះពោពេញដោយការអប់រំ ភាពច្នៃប្រឌិត និងការកម្សាន្តរួមបញ្ចូលគ្នា។

ងាកមកប្រធានសមាគមភាពយន្តកម្ពុជា និងជាចាងហ្វាងផលិតកម្មដើមត្នោត លោក ឆាយ បូរ៉ា ក៏បានវាយតម្លៃលើការផលិត និងដឹកនាំរឿងដោយក្រុមផលិតភាពយន្តវ័យក្មេង ហើយថែមទាំងទទួលស្គាល់នូវទេពកោសល្យល្អឯករបស់ពួកគេ។ លោកថា ខ្សែភាពយន្តខ្មែរមួយនេះ ជារបត់នៃផ្លូវដែលត្រូវផ្លាស់ប្តូរមួយក្នុងវិស័យភាពយន្តខ្មែរ ដែលកំពុងធ្លាក់ក្នុងភាពច្រំដែល។

ត្បិតមានការពោលសរសើរទាំងខ្លឹមសារសាច់រឿង បច្ចេកទេសនៃការថត និងសំឡេងក្តី តែរឿង «វិបល្លាស/រចនា» បែរជាមិនទីចាប់អារម្មណ៍របស់អ្នកទស្សនានៅស្រុកខ្មែរទៅវិញ ដោយទើបតែចាក់បញ្ចាំងសោះ បែរគ្មានអ្នកទៅទស្សនាទៅវិញ។

ប្រការនេះធ្វើឲ្យលោក Deependra Gauchan ផលិតករប្រតិបត្តិរបស់ផលិតកម្ម Come Together Films បាក់ទឹកចិត្តក្នុងការផលិត រហូតដល់ថ្នាក់សម្រេចចិត្តថា ឈប់ផលិតបន្តទៀត ដោយនេះគឺជារឿងចុងក្រោយសម្រាប់ពលរដ្ឋខ្មែរ។ ក្នុងនោះលោកក៏ទទួលស្គាល់ពីរសនិយមរបស់ពលរដ្ឋខ្មែរ គឺមិនចូលចិត្តទស្សនាភាពយន្តដែលបង្កប់ដោយន័យអប់រំ និងគំនិតបង្កើតថ្មីឡើយ។

លោក Deependra Gauchan

យុវជនវ័យជាង២០ឆ្នាំមួយរូបដែលបានទស្សនារឿង «វិបល្លាស/រចនា» ពីដើមដល់ចប់ បានបង្ហាញពីចំណាប់អារម្មណ៍ចំពោះ រឿងនេះថា ទាំងប្លង់ថត បច្ចេកទេស និងសំឡេង គឺល្អដាច់គេ ចំណែកសាច់រឿងក៏ល្អដែរ តែមានរសនិយមបរទេសបន្តិច អ្នកទស្សនានៅស្រុកខ្មែរភាគច្រើនមិនសូវជាចូលចិត្តប៉ុន្មាននោះទេ គឺចូលចិត្តតែរឿងបែបសប្បាយ ភ័យរន្ធត់ ដូចជារឿង ខ្មោច និងកំប្លែងជាដើម។

«វិបល្លាស/រចនា» គឺជាស្នាដៃដឹកនាំរឿងដំបូងរបស់ផលិតករវ័យក្មេង លោក សាង ច័ន្ទវិសាល ជយលាភីភាពយន្តខ្លីឆ្នើមរបស់មហោស្រពភាពយន្តជាតិ ដែលភាពយន្តខ្លីនោះមានចំណងជើងថា «២០ ដុល្លារ»។ លោកថា មានតែទស្សនិកជនជាអ្នកទស្សនាប៉ុណ្ណោះ ដែលជាអ្នកកាត់សេចក្តីនូវអាជីពរបស់លោក តែគួរបន្ត ឬបញ្ឈប់។ «ប្រសិនបើពួកគេទៅទស្សនារឿងច្រើន នោះខ្ញុំនឹងបន្តការផលិតកុនថ្មីៗជាច្រើនទៀត ប៉ុន្តែបើពួកគេមិនទៅមើលទេ ខ្ញុំុំគ្មានលទ្ធភាពដឹកនាំសម្តែងបន្តទៀតទេ» អ្នកដឹកនាំរឿងវ័យក្មេងថ្លែង។

ភាពយន្តស្នេហាបែបយុវវ័យ ដែលប្លែកពីស្នេហាធម្មតាមួយនេះ គឺជាភាពយន្តថ្មីរបស់ផលិតកម្្ម Come Together Films ក្រុមផលិតទាំងអស់សុទ្ធវ័យក្មេង អាយុក្រោម៣០ឆ្នាំ៕

ទស្សនា Trailer រឿង «វិបល្លាស/រចនា» ខាងក្រោមនេះ៖

អត្ថបទ៖ ដេត ធន្នី