កីឡាករល្បីៗបីរូប នឹងត្រូវលេងប៉ះក្លឹបចាស់ខ្លួនវិញ ក្នុង UCL ពាក់កណ្ដាលផ្ដាច់ព្រ័ត្រនេះ
- 2018-04-24 13:10:48
- ចំនួនមតិ 0 | ចំនួនចែករំលែក 0
កីឡាករល្បីៗបីរូប នឹងត្រូវលេងប៉ះក្លឹបចាស់ខ្លួនវិញ ក្នុង UCL ពាក់កណ្ដាលផ្ដាច់ព្រ័ត្រនេះ
ចន្លោះមិនឃើញ
យ៉ាងហោចណាស់ មានកីឡាករល្បីៗចំនួន ៣ រូប នឹងត្រូវលេងប៉ះក្លឹបចាស់ខ្លួន ក្នុង Champions League វគ្គពាក់កណ្ដាលផ្ដាច់ព្រ័ត្រលើកនេះ។
កីឡាករទីមួយ គឺ ខ្សែបម្រើប្រយុទ្ធ James Rodriguez។ កីឡាករកូឡុំប៊ី បានលេងនៅក្លឹបReal Madrid រយៈពេល ៣រដូវកាល មុនពេលចាកចេញមកលេងនៅ Bayern Munich កាលពីឆ្នាំមុន ក្នុងនាមជាកីឡាករខ្ចីជើងរយៈពេល ២ រដូវកាល ក្រោយមិនអាចមាននាទីលេងបានច្រើននៅក្លឹបយក្សអេស្ប៉ាញ។ James អាចនឹងបង្ហាញខ្លួនពេលប៉ះ Real Madrid នៅវេលារំលងអាធ្រាត្រយប់ស្អែកនេះ ក្រោយបានបង្ហាញទម្រង់លេងបានល្អនៅ Bayern ជាពិសេសក្រោយក្លឹបត្រូវបានដឹកនាំដោយអ្នកចាត់ការ Jupp Heynckes។ ខ្សែបម្រើប្រយុទ្ធកូឡុំប៊ីរកបាន ៦ គ្រាប់ និងបញ្ជូនបាល់ឲ្យមិត្តរួមក្រុមស៊ុតដល់ទៅ ១០លើក ក្នុងលីគកំពូលអាល្លឺម៉ង់រដូវកាលនេះ។
ម្នាក់ទៀតគឺ ខ្សែស្លាប Mohamed Salah។ កីឡាករអេហ្ស៊ីបលេងឲ្យ Roma ពីឆ្នាំ ២០១៥ ដល់ឆ្នាំ ២០១៧។ ក្នុងអំឡុងពេលនោះ Salah បានអភិវឌ្ឍខ្លួនរហូតក្លាយជាកីឡាករបង្គោលមួយរូបរបស់ក្លឹបអ៊ីតាលី។ ពីររដូវកាលនៅ Roma កីឡាករ Salah បានរកបាន ៣៤ គ្រាប់។ ក្រោយចាកចេញទៅ Liverpool កាលពីដើមរដូវកាលនេះ Mohamad Salah រឹតតែបង្ហាញទម្រង់លេងកាន់តែល្អ។ គិតមកទល់ពេលនេះ កីឡាករស៊ុតចូល ៤១ គ្រាប់ឲ្យក្លឹបហង្សក្រហម។ បើតាមសម្ដីអ្នកចាត់ការ Jurgen Klopp ខ្សែស្លាប Salah នឹងមានវត្តមានប៉ះក្លឹបចាស់ខ្លួន Roma ក្នុងប្រកួត UCL យប់នេះនៅកីឡដ្ឋាន Anfield។
កីឡាករទី ៣ គឺខ្សែបម្រើ Toni Kroos។ Kroos លេងឲ្យ Bayern តាំងពីនៅឈុតយុវជនម្ល៉េះ និងបានឈ្នះពានធំៗជាច្រើនជាមួយក្លឹបអាល្លឺម៉ង់ (ក្នុងនោះមានពាន Champions League រដូវកាល ២០១២/១៣)។ នៅឆ្នាំ ២០១៤ ខ្សែបម្រើ Kroos បានចាកចេញពី Bayern ទៅចូលរួម Real Madrid ក្នុងតម្លៃផ្ទេរប្រមាណ ៣០ លានអឺរ៉ូ។ តាំងពីពេលនោះមក កីឡាករអាល្លឺម៉ង់ បានអភិវឌ្ឍខ្លួនរហូតស្ថិតក្នុងចំណោមខ្សែបម្រើល្អបំផុតលើលោកនាពេលបច្ចុប្បន្ន។ ដោយ Kroos ជាកីឡាករបង្គោលមួយរបស់ Real Madrid ក្រោមការដឹកនាំរបស់អ្នកចាត់ការ Zinedine Zidane ឱកាសខ្សែបម្រើរូបនេះនឹងលេងក្នុងប្រកួតរំលងអាធ្រាត្រយប់ស្អែកពេលប៉ះក្លឹបចាស់ Bayern គឺមានខ្ពស់៕