នៅទូទាំង USA មានហាងខ្មែរតែប៉ុន្មានប៉ុណ្ណោះ ពេញនិយមបំផុតសម្រាប់សិល្បករខ្មែរ
- 2018-04-25 03:48:30
- ចំនួនមតិ 0 | ចំនួនចែករំលែក 0
នៅទូទាំង USA មានហាងខ្មែរតែប៉ុន្មានប៉ុណ្ណោះ ពេញនិយមបំផុតសម្រាប់សិល្បករខ្មែរ
ចន្លោះមិនឃើញ
មិនមានរបាយការណ៍ច្បាស់លាស់ឡើយ ប៉ុន្តែគេដឹងថា ក្នុង១ឆ្នាំៗ មានសិល្បករខ្មែរមិនតិចនាក់ទេ ទទួលបានឱកាសទៅសម្ដែងនៅសហរដ្ឋអាមេរិក ក្នុងនោះ ពួកគេមិនមែនចេះតែដើរសម្ដែងគ្រប់កន្លែងដែលប្រជាពលរដ្ឋខ្មែររស់នៅទេ ពោលគឺមានភោជនីយដ្ឋានខ្មែរប៉ុន្មានកន្លែងប៉ុណ្ណោះ ដែលពេញនិយមសម្រាប់សកម្មភាពសិល្បៈ។
នៅទីក្រុង ឡុងប៊ិច រដ្ឋកាលីហ្វ័ញ៉ាមានភោជនីយដ្ឋានខ្មែរចំនួន៣ គឺហាង ហាក់ ហៀង ហាង Legend និង La Lune។ នៅទីក្រុងឡូវ៉ែល រដ្ឋបូស្ដុន គឺមានតែ១ប៉ុណ្ណោះ គឺភោជនីយដ្ឋាន ប៉ៃលិន។ ហាងអាហារទាំង៤ នៃរដ្ឋទាំងពីរខាងលើ គឺពេញនិយមបំផុត សម្រាប់សកម្មភាពសិល្បៈ ពោលគឺ សកម្មភាពសម្ដែងរបស់សិល្បករទៅពីកម្ពុជា ស្ទើរទាំងអស់ប្រព្រឹត្តទៅនៅទីកន្លែងទាំងនេះ។
លោក អេនឌី ដែលមានបទពិសោធន៍ទៅសម្ដែងនៅសហរដ្ឋអាមេរិកញឹកញាប់ និងស្គាល់ជាមួយអ្នកឧបត្ថម្ភជាច្រើននៅទីនោះ បានប្រាប់ថា ចំពោះមូលហេតុ មាន២ ទី១គឺដោយសារតែហាងទាំងប៉ុន្មានខាងលើ ស្ថិតនៅក្នុងតំបន់ដែលមានប្រជាពលរដ្ឋខ្មែររស់នៅច្រើន។
ទី២ គឺដោយសារទីនោះ រមែងមានសកម្មភាពសិល្បៈជាប្រចាំរៀងរាល់ថ្ងៃសុក្រ ខុសពីកន្លែងនានាដែលមានប្រជាពលរដ្ឋខ្មែររស់នៅច្រើនដែរ។ “និយាយទៅមានហាងប៉ុន្មានហ្នឹងទេ...នៅរដ្ឋផ្សេងៗទៀត ដែលមានខ្មែរយើងរស់នៅច្រើនដែរ តែពួកគាត់អត់សូវចូលចិត្តសប្បាយ អីចឹងហើយអត់មានហាងណាដែលមានសកម្មភាពសិល្បៈប្រចាំដូចហាងខាងលើទេ"។
អេនឌី បន្តថា រដ្ឋផ្សេងទៀត ក្រៅពី កាលីហ្វ័ញ៉ា និងបូស្តុន ដោយសារតែមិនមានហាងអាហារដែលមានសកម្មភាពសិល្បៈប្រចាំ ដូច្នេះរាល់ពេលមានសិល្បករទៅពីកម្ពុជាទៅសម្ដែងម្ដងៗ ភាគច្រើនគឺទៅជួលហាងរបស់ជនជាតិថៃ ឬអាមេរិកាំង ឬក៏ជួល Hall ដើម្បីរៀបចំ។ ដូច្នេះហើយ ទើបមិនសូវមានសកម្មភាព សិល្បករទៅសម្ដែងឡើយ។
ខុសពីតំបន់ផ្សេង ភោជនីយដ្ឋានទាំង៤ ហាក់ ហៀង ហាង Legend និង La Luneរួមទាំងហាង ប៉ៃលិន ដែលមានម្ចាស់សុទ្ធជាជនជាតិខ្មែរ គឺមានសកម្មភាពសិល្បៈប្រចាំរៀងរាល់សប្ដាហ៍។ ក្រៅពីនេះ គឺមានតារាចម្រៀងល្បីៗ ច្រៀងប្រចាំនៅទីនោះផង។ ដូច្នោះហើយ ទើបជាទីពេញនិយមរបស់សិល្បករទៅពីកម្ពុជា ទៅសម្ដែងនៅទីនោះច្រើន៕