តាមពិតមុនទៅ PSG កីឡាករ Mbappe ចង់ទៅលេងក្លឹបមួយ ក្នុងចំណោមពីរនេះសោះ
- 2018-05-07 13:17:39
- ចំនួនមតិ 0 | ចំនួនចែករំលែក 0
តាមពិតមុនទៅ PSG កីឡាករ Mbappe ចង់ទៅលេងក្លឹបមួយ ក្នុងចំណោមពីរនេះសោះ
ចន្លោះមិនឃើញ
អ្នកចាត់ការក្លឹប PSG លោក Unai Emery បានបង្ហើបថា Kylian Mbappe ចង់ទៅលេងនៅ Real Madrid ឬ Barcelona មុនមកចូលរួមក្លឹបបារាំងដែលមានមូលដ្ឋាននៅប៉ារីស។
លោក Emery បាននិយាយប្រាប់សារព័ត៌មាន SFR Sportថា៖ "តាមពិតទៅ មុនដំបូង Mbappe ចង់ទៅ Real Madrid ឬ Barcelona។ នៅពេលនោះ បើសិនជាគេចាកចេញពីបារាំងមែនក្នុងនាមជាកីឡាករវ័យ ១៨ឆ្នាំ ប្រទេសមួយនេះគួរតែមានមោទនភាព"។
ទោះជាយ៉ាងណា អ្នកចាត់ការសញ្ជាតិអេស្ប៉ាញ បានបន្តថា នៅទីបំផុត ខ្លួនអាចបញ្ចុះបញ្ចូលកីឡាករ Mbappe ឲ្យបន្តនៅបារាំង ហើយមកចូលរួមជាមួយ PSG។
លោក Emery មិនបានបញ្ជាក់ពីវិធីសាស្ត្រដែលលោកប្រើ ដើម្បីបញ្ចុះបញ្ចូលកីឡាករបារាំងរូបនេះឡើយ។
សូមបញ្ជាក់ផងដែរថា កាលពីអំឡុងរដូវកាលដោះដូរខែក្ដៅលើកមុន សារព័ត៌មាន Marca បានបញ្ជាក់យ៉ាងច្បាស់ថា Real Madrid ពិតជាបានទាក់ទង Mbappe ទាក់ទងនឹងរឿងផ្ទេរពិតប្រាកដមែន។ បន្ថែមពីលើនេះ មុនទិញ Ousmane Dembele ក៏មានរបាយការណ៍ជាច្រើនទៀតបានចុះផ្សាយថា Mbappe ស្ថិតក្នុងចំណោមបេក្ខភាពជួរមុខដែល Barcelona ចង់បានដើម្បីយកជំនួស Neymar ផងដែរ។
គួររម្លឹកផងដែរថា Mbappe បានចូលរួមជាមួយ PSG កាលពីចុងខែសីហាកន្លងទៅក្នុងនាមជាកីឡាករខ្ចីជើង។ កីឡាករបានលេង ៤១ ប្រកួតឲ្យក្លឹប គិតគ្រប់កម្មវិធីទាំងអស់ និងស៊ុតចូលសរុប ២១គ្រាប់៕