នារីថៃប្រើស្នាមញញឹមក្លែងក្លាយ ចាំបំពាក់កម្រងផ្កាភ្ញៀវ ពេលនេះជួបរឿងធំ (មានវីដេអូ)

2018-05-12 08:48:24
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្ត្រី២នាក់ ធ្វើការនៅព្រលានយន្តហោះ ដនមឿង ប្រទេសថៃ មានតួនាទីស្លៀកសំលៀកបំពាក់បែបប្រពៃណីថៃចាំទទួលភ្ញៀវទេសចរ ត្រូវបានគេផ្អាកពីការងារបណ្តោះអាសន្ន ដោយសារតែភ្ញៀវទេសចរចិនថតវីដេអូរបស់ពួកគេ យកទៅសើចចំអក (Troll) ពេញបណ្ដាញសង្គម។ នេះបើតាមសារព័ត៌មានក្នុងស្រុកប្រទេសថៃ The Coconuts ទើបបានចុះផ្សាយ។

ប្រទេសថៃត្រូវគេប្រសិទ្ធិនាមថាជា ដែនដីនៃស្នាមញញឹម។ នារីដែលគេមិនបង្ហាញអត្តសញ្ញាណទាំង២នាក់ខាងលើ មានការងារចាំស្វាគមន៍ក្រុមទេសចរចិន។ វីដេអូឃ្លីប របស់ពួកគេត្រូវភ្ញៀវចិនថតហើយយកទៅ Troll ពេញបណ្ដាញសង្គម ដោយសើចចំអកថា ពួកគេមិនញញឹមឲ្យគ្រប់គ្រាន់ ហើយអ្នកប្រើប្រាស់បណ្ដាញសង្គមជាច្រើនបានថតត្រាប់តាមឡើងវិញក្នុងន័យសើចចំអក។

នៅក្នុងវីដេអូឃ្លីបបង្ហាញឲ្យឃើញ ពួកគេចាំពាក់កម្រងផ្កាឲ្យភ្ញៀវដោយស្នាមញញឹម ប៉ុន្តែទឹកមុខញញឹមនោះប្រែជាធម្មតាវិញភ្លាមៗ បន្ទាប់ពីភ្ញៀវម្នាក់ៗឡើងឡានក្រុងរួច។

នៅក្នុងសន្និសីទកាសែតមួយ ធ្វើឡើងនៅស្នងការដ្ឋានប៉ូលីសទេសចរណ៍ថៃ នារីទាំង២នាក់បានសុំទោសជាសាធារណៈ។ ម្នាក់ក្នុងចំណោមពួកគេបាននិយាយថា ដោយសារនាងអស់កម្លាំងខ្លាំងពេក ហើយថ្ងៃនោះមេឃក្តៅខ្លាំងផង។

“ថ្ងៃនោះពិតជាក្តៅខ្លាំង ហើយភ្ញៀវទេសចរចិនខ្លះបានសើចចំអកខ្ញុំ ប៉ុន្តែខ្ញុំមិនបានដឹងថា ពួកគេកំពុងតែថតវីដេអូឡើយ។ ខ្ញុំសុំទោសសាធារណជនចំពោះសកម្មភាពមិនសមរម្យរបស់នាងខ្ញុំ"។ នាងបាននិយាយ។

សូមទស្សនាវីដេអូខាងក្រោម៖