រន្ធត់ណាស់! បាក់ស្រុតស្ពានអាកាសនៅឥណ្ឌា សម្លាប់មនុស្សច្រើននាក់
- 2018-05-16 01:54:21
- ចំនួនមតិ 0 | ចំនួនចែករំលែក 0
រន្ធត់ណាស់! បាក់ស្រុតស្ពានអាកាសនៅឥណ្ឌា សម្លាប់មនុស្សច្រើននាក់
ចន្លោះមិនឃើញ
យ៉ាងហោចណាស់មានមនុស្សចំនួន ១៨នាក់បានស្លាប់ និងជាច្រើននាក់ផ្សេងទៀតជាប់គាំង នៅក្នុងទីក្រុង Varanasi ប្រទេសឥណ្ឌា បន្ទាប់ពីស្ពានអាកាសមួយខ្សែបានបាក់ស្រុតចុះមក សង្កត់លើរថយន្តជាច្រើនគ្រឿងនៅខាងក្រោមវា។
ស្ពានអាកាសនោះកំពុងស្ថិតក្រោមការសាងសង់នៅឡើយ នៅពេលដែលផ្នែកមួយនៃស្ពានបានបាក់ស្រុតចុះមក។ ហេតុការណ៍នេះបានកើតឡើង កាលពីថ្ងៃអង្គារ ទី១៥ ខែឧសភា ឆ្នាំ២០១៨ ម្សិលមិញ។
សាក្សីម្នាក់បានប្រាប់អ្នកយកព័ត៌មានថា យ៉ាងហោចណាស់មានរថយន្តចំនួន ៤គ្រឿង , ម៉ូតូកង់បីឥណ្ឌាមួយគ្រឿង និង រថយន្តក្រុងធុនតូចមួយគ្រឿង ត្រូវស្ពានបាក់សង្កត់ពីលើ។
ទូរទស្សន៍ឥណ្ឌា NDTV ក៏បានរាយការណ៍ឲ្យដឹងដែរថា ជនរងគ្រោះដែលត្រូវស្ពានសង្កត់លើ ភាគច្រើនគឺជាកម្មករសំណង់ ដែលកំពុងសាងសង់ស្ពានអាកាសនោះ។ ទោះបីជាយ៉ាងណាក៏ដោយ គេនៅមិនទាន់ដឹងពីមូលហេតុដែលបណ្ដាលឲ្យស្ពានបាក់ឡើយ។
យ៉ាងណាមិញ ការបាក់ស្រុតអគារ ឬ សំណង់ផ្សេងៗនៅក្នុងប្រទេសឥណ្ឌា មិនមែនជារឿងចម្លែកឡើយ ដោយសារតែស្តង់ដារសំណង់របស់ប្រទេសនេះ នៅខ្សោយជាងបណ្ដាប្រទេសលោកខាងលិច៕