ផ្ទុះការវិភាគពេញបណ្ដាញសង្គម លើរដ្ឋមន្ត្រីក្រសួងកសិកម្មថាអ្នករិះគន់ជា «ជនអគតិ»

2018-05-17 07:00:51
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីថ្ងៃទី១៦ ខែឧសភា ឆ្នាំ២០១៨ ឯកឧត្ដម វេង សាខុន រដ្ឋមន្ត្រីក្រសួងកសិកម្ម បានផ្ដល់បទសម្ភាសន៍ដល់អង្គភាពព័ត៌មាន Fresh News ជុំវិញអ្នកឃ្លាំមើលបញ្ហាសង្គម និងប្រជាពលរដ្ឋខ្មែរ បង្ហាញពីការព្រួយបារម្ភក្រោយវៀតណាម មានបំណងវិនិយោគដាំបន្លែ ផ្លែឈើ ដើម្បីនាំចេញ និងផ្គត់ផ្គង់ក្នុងស្រុក។ ឃ្លាមួយដែលធ្វើឲ្យប្រជាពលរដ្ឋផ្ទុះប្រតិកម្មជាខ្លាំងនោះ គឺឯកឧត្ដម បានលើកឡើងថា៖ «ការមានបំណងវិនិយោគនេះ គឺផ្ទុយទាំងស្រុងទៅនឹងការឃោសនាអកុសលរបស់ជនអគតិ ចង់កេងចំណេញខាងនយោបាយ»។

សម្រង់សម្ដីរបស់ឯកឧត្ដម វេង សាខុន

ការឆ្លើយតបរបស់ឯកឧត្ដម វេង សាខុន បានក្លាយជាប្រធានបទដ៏ក្ដៅគគុកនៅក្នុងសង្គមកម្ពុជាបច្ចុប្បន្ន ដែលកំពុងតែមានការព្រួយបារម្ភជាខ្លាំង រឿងបន្លែ ផ្លែឈើ នាំចូលពីវៀតណាមមានសារធាតុគីមីច្រើន។ ក្នុងនោះមានប្រជាពលរដ្ឋជាច្រើន បានចែករំលែក និងវែកញែកយ៉ាងផុលផុស ជុំវិញពាក្យ៖ «ជនអគតិ» របស់រដ្ឋមន្ត្រីក្រសួងកសិកម្ម មកលើអ្នករិះគន់។ ក្នុងនោះបុគ្គលល្បីៗនៅលើបណ្ដាញសង្គមក៏បានវិភាគជាបន្តបន្ទាប់ ទៅលើការលើកឡើងរបស់រដ្ឋមន្ត្រីក្រសួងកសិកម្ម ដូចជា លោក ផែង វណ្ណៈ និងលោក William Guang ជាដើម។

ផ្ដល់បទសម្ភាសន៍ជាមួយ Sabay នៅព្រឹកនេះ លោក សន ជ័យ ប្រធានអង្គការសម្ព័ន្ធគណនេយ្យភាពសង្គម លើកឡើងថា អ្នកដែលព្រួយបារម្ភពីរឿងវៀតណាមចង់មកដាំបន្លែនៅកម្ពុជា ដើម្បីផ្គត់ផ្គង់តម្រូវការក្នុងស្រុក និងនាំចេញនោះ សុទ្ធតែជាពលរដ្ឋខ្មែរសាមញ្ញ ។លោកមើលឃើញថា មិនមែនជាអ្នកចង់កេងចំណេញខាងនយោបាយអ្វីនោះទេ។ លោក បន្តថា ពលរដ្ឋខ្មែរកំពុងព្រួយបារម្ភរឿងបន្លែកំប៉ិកកំប៉ុកសព្វគ្រប់ សុទ្ធតែនាំចូលពីវៀតណាម និងមានសារធាតុគីមី។ ដូចនេះពេលដែលឮដំណឹងថា វៀតណាមចង់មកដាំផ្ទាល់ទៀត គឺពួកគាត់កាន់តែព្រួយបារម្ភខ្លាំងឡើង។

អ្នកឃ្លាំមើលពីបញ្ហាសង្គមរូបនេះបន្តថា រដ្ឋមន្ត្រីក្រសួងកសិកម្មត្រូវតែទទួលស្គាល់ទៅលើចំណុចនេះ មិនគួរចោទប្រកាន់ទៅលើពលរដ្ឋខ្មែរបែបនេះឡើយ។ លោកថា គ្រាន់បន្លែដូចជាម្ទេសងាយស្រួលដាំបំផុត ហេតុអ្វីត្រូវការវៀតណាមមកវិនិយោគ? ហេតុអ្វីក៏មិនត្រួតពិនិត្យលទ្ធភាពក្នុងការការដាំដុះដោយខ្លួនឯង?

លោក សន ជ័យ សង្កត់ធ្ងន់ថា ជំនួសឲ្យពាក្យអគតិដែលប្រើទៅលើអ្នករិះគន់ ជាដំណោះស្រាយសមស្របបំផុត ក្រសួងកសិកម្មគួរបដិសេធចំពោះសំណើរបស់វៀតណាម ហើយរៀបចំ និងពិនិត្យមើលលទ្ធភាពរបស់ខ្លួនក្នុងការដោះស្រាយបញ្ហាក្នុងវិស័យកសិកម្មដែលកំពុងប្រឈមខ្លាំង។

លោកនិយាយដូច្នេះថា៖ «វៀតណាមចង់មកដាំបន្លែនៅខ្មែរ មកពីគេដឹងថា នៅខ្មែរយើងសល់ដីទំនេរច្រើនអាចដាំដុះបាន ហើយអាចមានលទ្ធភាពក្នុងការនាំចេញទៅក្រៅប្រទេសទៀត។ ហេតុអ្វីបានគាត់ (ឯកឧត្ដម វេង សាខុន) មិននឹកឃើញមធ្យោបាយបែបហ្នឹង? នេះគឺជាចំណុចដែលក្រសួងកសិកម្មត្រូវទទួលស្គាល់ មិនមែនទទួលស្គាល់ដោយការបោះពាក្យសម្ដីបែបនេះទេ។»

ប្រធានអង្គការសម្ព័ន្ធគណនេយ្យភាពសង្គមបានកត់សម្គាល់ឃើញថា មានបញ្ហា៣សំខាន់ៗកំពុងប្រឈមខ្លាំងក្នុងវិស័យកសិកម្មដែលក្រសួងត្រូវតែដោះស្រាយដូចជា៖

១. ការចាត់ចែងការដឹកនាំ៖ ក្រសួងគួរដោះស្រាយបែបណាឲ្យប្រជាពលរដ្ឋមានលទ្ធភាពពេញលេញក្នុងការដាំដុះ ប្រកបដោយភាពកក់ក្ដៅ។ លោកថា កសិករនៅតែបន្តធ្វើកសិកម្ម ក្នុងភាពផ្សងព្រេងនៅឡើយ។

២. ប្រព័ន្ធធារាសាស្ត្រ សម្រាប់ស្រោចស្រពបន្លែបង្ការ នៅមិនទាន់គ្រប់គ្រាន់នឹងតម្រូវការរបស់កសិករទូទាំងប្រទេសនៅឡើយទេ។

៣. តម្លៃផលិតផលកសិកម្មរបស់កសិករ នៅតែមានតម្លៃទាប។ ដូច្នេះក្រសួងគួរស្វែងរកទីផ្សារសម្រាប់កសិករ ដែលផ្ដល់តម្លៃសមរម្យ។ ដោយសារទទួលបានតម្លៃទាប បានធ្វើឲ្យប៉ះពាល់ដល់ជីវភាពរបស់កសិករ។ កសិករអាចផលិតស្រូវ អង្ករបាន តែមិនមានទីផ្សារសម្រាប់នាំចេញ។ លោកថា ផែនការនាំស្រូវអង្ករចេញរបស់កម្ពុជា នៅតែមានបញ្ហារអាក់រអួលមិនទាន់ដោះស្រាយបាន៕

អត្ថបទ៖ វឌ្ឍនៈ