Ariana Grande និយាយថាការវាយប្រហារនៅ Manchester នៅតែតក់ស្លុតដក់ជាប់ក្នុងបេះដូងនាង

2018-05-18 03:15:00
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀង Ariana Grande បានបញ្ជាក់ពីអារម្មណ៍នាងក្នុងរយៈពេលមួយឆ្នាំកន្លងមកនេះ បន្ទាប់ពីការវាយប្រហារបោកគ្រាប់បែកដែលកើតឡើងក្នុងកម្មវិធីប្រគំតន្ត្រីរបស់នាងកាលពីខែឧសភាឆ្នាំមុន។

“មានមនុស្សជាច្រើនបានឆ្លងកាត់ការឈឺចាប់និងការបាត់បង់សមាជិកដែលជាទីស្រលាញ់។ ដូច្នេះហើយដំណាក់កាលនៃការធ្វើទឹកចិត្តឲ្យល្អឡើងវិញគឺត្រូវចំណាយពេលយូរខ្លាំងណាស់។" តារាចម្រៀងវ័យ២៤ឆ្នាំបាននិយាយដូច្នេះនៅក្នុងកិច្ចសម្ភាសន៍មួយរបស់ទស្សនាវដ្ដី Time។

នាងបានបន្តទៀតថា៖ "វាជារឿងដ៏អាក្រក់មួយដែលបានកើតឡើងចំពោះមនុស្សគ្រប់គ្នា។ ហេតុដូច្នេះហើយទើបខ្ញុំខិតខំប្រឹងប្រែងធ្វើអ្វីគ្រប់យ៉ាងដែលខ្ញុំអាចធ្វើបាន ដើម្បីឲ្យអ្នកគាំទ្ររបស់ខ្ញុំដឹងថាទោះបីជារឿងអាក្រក់បែបនេះកើតឡើងក៏ដោយ ក៏យើងមិនត្រូវចុះចាញ់ដែរ។"

គូសបញ្ជាក់ដែរថា ក្រោយហេតុការណ៍នេះកើតឡើង Ariana បានបង្កើតការប្រគំតន្ត្រីដ៏ធំមួយ ដើម្បីរៃអង្គាសរកប្រាក់ចំណូលទៅជួយគ្រួសារជនរងគ្រោះ ដែលមានចូលរួមពីសំណាក់តារាល្បីៗជាច្រើនដូចជា Katy Perry, Justin Bieber និង Miley Cyrus ជាដើម៕