ស្ងាត់ៗ អ្នកលេងគុនខ្មែរ វណ្ណៈ វ៉ៃសកល៦ទឹកឈ្នះថៃនៅដីរបស់ថៃ

2018-05-20 03:42:16
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកលេងគុនខ្មែរពូកែវ៉ៃកែង រឿម វណ្ណៈបានចេញទៅប្រកួតប្រដាល់សកលនៅប្រទេសថៃលក្ខណៈអាជីព៦ទឹក ហើយទទួលបានលទ្ធផលគួរជាទីគាប់ប្រសើរទៅលើកីឡាករថៃដែលជាម្ចាស់ផ្ទះ។

កីឡាប្រដាល់សកល កម្ពុជាមានកម្រិតទាបជាងថៃឆ្ងាយណាស់ បើប្រៀបធៀបគ្នា។ ថៃមានកីឡាករប្រដាល់សកលច្រើនទាំងកម្រិតពាក់កណ្តាលអាជីព និងអាជីពដែលមានកីឡាករឈ្នះខ្សែក្រវាត់កម្រិតពិភពលោកទៀតផង។ ផ្ទុយទៅវិញ កម្ពុជាមិនបាច់និយាយដល់ការប្រកួតអន្តរជាតិទេ សូម្បីប្រកួតសកលក្នុងស្រុកក៏មានមិនសូវមានផង។

កីឡាករ រឿម វណ្ណៈ

ទោះបីជាបែបនេះក្តី អ្នកលេងគុនខ្មែរ រឿម វណ្ណៈទទួលបានជ័យជម្នះដោយពិន្ទុលើកីឡាករថៃដែលជាម្ចាស់ផ្ទះក្នុងកម្មវិធីប្រដាល់សកល Work Point Thai ។ ក្នុងការប្រកួត៦ទឹកដែលជាកម្រិតអាជីព កីឡាករកម្ពុជាបានព្យាយាមដើរចូលវ៉ៃរហូត ហើយជារឿយៗវ៉ៃចំគោលដៅបានល្អ។ ចំណែកកីឡាករម្ចាស់ផ្ទះក៏វ៉ៃចូលវណ្ណៈដែរ ប៉ុន្តែចូលចំគោលដៅមិនច្រើនទេ។ ចប់ការប្រកួត៦ទឹកឃើញថា វណ្ណៈមានពិន្ទុនាំមុខដែលជាការកាត់សេចក្តីដោយចៅក្រម។

មែនទែនទៅ កម្ពុជាក៏មានកីឡាករដែលមានទេពកោសល្យ និងសមត្ថភាពផ្នែកប្រដាល់សកលមិនចាញ់បរទេសប៉ុន្មានដែរ ប៉ុន្តែខ្វះខាតតែឱកាស និងមិនមានកម្មវិធីប្រកួតច្រើនប៉ុណ្ណោះ។ ប្រសិនបើកម្ពុជាមានកម្មវិធីប្រដាល់សកលកាន់តែច្រើន នឹងកាន់តែល្អ ពីព្រោះប្រដាល់សកលនេះជាប្រភេទកីឡាមានក្នុងព្រឹត្តិការណ៍សំខាន់ៗលើពិភពលោក។

តោះមើលការវ៉ៃរបស់ វឿម វណ្ណៈទាំង៦ទឹក