១០ ចំណុច កុំមើលស្រាលឲ្យសោះ បើមិនចង់ឈឺក្បាលពេលបើកបររថយន្តក្នុងរដូវភ្លៀង

2018-05-22 02:10:00
ចំនួនមតិ 0 | ចំនួនចែករំលែក 0

ចន្លោះមិនឃើញ

រដូវវស្សាឈានចូលមកដល់ ភ្លៀងធ្លាក់ស្ទើរពាសពេញផ្ទៃប្រទេស ធ្វើឲ្យអ្នកធ្វើដំណើរភាគច្រើនត្រូវប្រើប្រាស់រថយន្តផ្ទាល់ខ្លួន ទោះបីជាខ្លួនមានកង់ ឬម៉ូតូសម្រាប់ជិះក៏ដោយចុះ ដើម្បីការពារពីការទទឹកជាយថាហេតុ។

ចំពោះអ្នកប្រើប្រាស់រថយន្តទាំងអស់ រដូវកាលមានភ្លៀងធ្លាក់ជោគជាំ តម្រូវឲ្យរថយន្តរបស់អ្នកត្រូវធ្វើការក្នុងស្ថានភាពសើមច្រើន និងត្រូវការការថែទាំជាប់ជានិច្ច។ ខាងក្រោមនេះ ជាគន្លឹះទាំង ១០ ដែលអ្នកបើកបរ រថយន្តទាំងអស់គួរយល់ដឹងក្នុងរដូវកាលមានភ្លៀងធ្លាក់ច្រើន៖

១. ឆែកមើលសំបកកង់រថយន្ត

ក្រឡានៅលើសំបកកង់រថយន្ត មិនត្រឹមតែជួយឲ្យការខាំជាប់នឹងផ្លូវបានប្រសើរពេលបើកបរតែប៉ុណ្ណោះទេ តែក៏ជួយនាំទឹកចេញពីផ្លូវដើម្បីឲ្យកៅស៊ូកង់ខាំជាប់នឹងផ្លូវពេលបើកបរដែរ។ អ្នកបើកបរគ្រប់រូប គួរពិនិត្យមើលសំបកកង់រកមើលជម្រៅនៃក្រឡាថាតើគួរប្ដូរឬនៅ។ ជម្រៅដែលត្រូវតែប្ដូរចេញតែម្ដង គឺពេលក្រឡាកង់សល់ត្រឹម ១,៦ ម.ម។

ម៉្យាងទៀត អ្នកបើកបរក៏គួរសប់កង់ឲ្យពេញសម្ពាធ ព្រោះកង់ឡានដែលមានខ្យល់គ្រប់គ្រាន់ អាចបាចទឹកចេញបានលឿន នាំឲ្យការបើកបរងាយស្រួលជាងកង់ឡានដែលធូរ។

២. សម្អាតកញ្ចក់ខាងមុខឲ្យបានញឹកញាប់

ពេលមានភ្លៀងច្រើន ទឹកហូរកាត់កញ្ចក់មុខអាចមានលាយធូលី និងកម្ទេចកំទីផ្សេងៗ។ ប្រការល្អអ្នកគួរមានក្រណាត់ស្អាតសម្រាប់ទុកជូតកញ្ចក់មុខ កុំឲ្យមានស្នាមទឹក និងធូលីនៅជាប់លើនោះច្រើន។

៣. ឧស្សាហ៍លាងសម្អាត និងប៉ូលារថយន្ត

អ្នកបើកបរភាគច្រើនគិតថាការលាងរថយន្តនៅរដូវភ្លៀងជារឿងខាតបង់ ក៏ប៉ុន្តែអ្នកមិនបានដឹងពីផលប៉ះពាល់នៃទឹកភ្លៀងចំពោះថ្នាំ និងតួរថយន្តរបស់អ្នកឡើយ។ ទឹកភ្លៀងមានលាយសារធាតុអាស៊ីដចេញពីផ្សែងដែលបញ្ចេញទៅក្នុងបរិយាកាស។ អ៊ីចឹងហើយ ហើយទឹកភ្លៀងប៉ះតួរថយន្តបានយូរប៉ុណ្ណា នោះអត្រានៃការហើរពណ៌ថ្នាំ និងពុកតួក៏កើនឡើងដែរ។ កត្តាដែលល្អ អ្នកគូរលាងរថយន្តរបស់អ្នកជាមួយ ទឹកធម្មតា ហើយត្រូវប៉ូលាវា ព្រោះសារធាតុនៅក្នុងថ្នាំប៉ូលាជួយឲ្យថ្នាំរថយន្តមានសភាពរលោងជាងមុន ធ្វើឲ្យដំណក់ទឹកឆាប់រអិលធ្លាក់ចុះអស់ ដែលវាអាចការពារថ្នាំ និងតួរថយន្តរបស់អ្នកបានច្រើនជាងមុន។

៤. ពិនិត្យមើលផ្លិតទឹករថយន្ត

បើសិនផ្លិតទឹករបស់អ្នកចាស់ខ្លាំង និងកៅស៊ូវាមានស្នាមរហែកហើយនោះ អ្នកគួរតែប្ដូរវាចោលទៅ ដោយសារតែផ្លិតទឹកចាស់ ហើយរហែកមិនអាចសម្អាតកញ្ចក់មុខបានស្អាតឡើយ។ អ្នកគួរប្ដូរផ្លិតទឹក រៀងរាល់មួយឆ្នាំម្ដង ដើម្បីប្រាកដថាវាអាចបោសវាសកញ្ចក់មុខបានស្អាតពេលដែលអ្នកត្រូវការ។

៥. លាងសម្អាតរន្ធបាញ់ទឹកលាងកញ្ចក់

ដោយសារតែខែភ្លៀងធ្លាក់ច្រើន មិនត្រឹមតែទឹកភ្លៀងធម្មតាទេ សូម្បីតែភក់ក៏មានខ្ទាតមកលើរថយន្តដែរ ហើយជួនកាលវាអាចធ្វើឲ្យស្ទះរន្ធបាញ់ទឹកលាងកញ្ចក់។ វិធីល្អបំផុតគឺអ្នកគួរយកម្ជុលទៅឆ្កឹះ មុខរន្ធបាញ់ទឹកលាងកញ្ចក់បើសិនជាទឹកបាញ់ស្ទះចេញមិនសូវច្រើន។ បើធូលីច្រើនពេករហូតមិនអាចយកម្ជុលមកឆ្កឹះបាន អ្នកគូរប្ដូរក្បាលទឹកបាញ់កញ្ចក់នោះចោលទៅ។

៦. រកមើលកន្លែងលេចធ្លាយ

រកមើលស្នាមខូចខាតតាមជ័រទប់ទឹកភ្លៀង តាមទ្វារ ឃ្លុបក្រោយ និងដំបូលរថយន្តជាដើម ដើម្បីប្រាកដថារថយន្តរបស់អ្នកមិនសាចទឹកចូល ពេលមានភ្លៀងធ្លាក់មកខ្លាំងនោះ។ បើមានធូលីច្រើន អ្នកអាចលាងវាចេញ ឬប្រើក្រណាត់ស្អាតមកជូតតាមផ្នែកទាំងនោះ។

៧. មើលគ្រឿងក្រោម

ពេលភ្លៀងធ្លាក់ខ្លាំង វាតែងតែមានទឹកដក់ក្នុងជង្ហុក ឬក៏នៅពាសពេញផ្លូវតែម្ដង។ ពេលបើកបរកាត់ទឹកទាំងនោះ វាអាចបង្កជាការលេចជ្រាបចូលទៅក្នុងជ័រ ដែលគ្របគ្រឿងក្រោម និងបន្ថយសមត្ថភាពរបស់ហ្រ្វាំងរថយន្តផងដែរ។ ប្រការល្អ អ្នកគូរលាងសម្អាតរថយន្តជាមួយទឹកធម្មតា ពេលអ្នកបើកបរកាត់ទឹកភក់ ឬទឹកដែលគគ្រិចខ្លាំង។

៨. មើលខ្សែពានម៉ាស៊ីន

ដោយសារខ្សែពានទាំងនេះធ្វើមកពីកៅស៊ូ អ៊ីចឹងហើយប្រសិនបើវាដាច់ ឬរហែក ម៉ាស៊ីនទាំងអស់ក្នុងរថយន្តនឹងលែងដំណើរការ។ កត្តាមួយទៀត គឺពេលដែលខ្សែពានទាំងនេះត្រូវទឹក វាបង្កើតជារំអិល និងមានភាពលំបាកក្នុងការអូសម៉ាស៊ីន។ ដូច្នេះហើយ អ្នកគួរឧស្សាហ៍ឆែកមើលខ្សែពានម៉ាស៊ីនកុំឲ្យមានការលេចធ្លាយទឹកពីគម្របរថយន្តចូលទៅខាងក្នុង និងគួរប្ដូរវាចោលពេលដែលវាមានភាពចាស់ខ្លាំង។

៩. ឆែកមើលអាគុយ

ជានិច្ចកាល អាគុយឡានមានអាយុកាលរហូតដល់ទៅ ៥ឆ្នាំ តែបើសិនមានភ្លៀងច្រើន និងមានការលេចជ្រាបទឹកប៉ះអាគុយទៀតនោះ វាអាចមានអាយុកាលប្រហែល ១ ទៅ ២ ឆ្នាំ តែប៉ុណ្ណោះ។ អាកាសធាតុសើម ហើយត្រជាក់ធ្វើឲ្យចរន្តអាគុយដើរមិនស្រួល ហើយសំណើមអាចធ្វើឲ្យប៉ូលអាគុយឆាប់ឡើងស្នឹមមិនចម្លងអគ្គិសនី។ ដូចនេះ បើសិនជាអាគុយរថយន្តលោកអ្នក មានលេចចេញសញ្ញាទាំងនោះ អ្នកគួរតែប្ដូរអាគុយថ្មីហើយ។

១០. ដាក់របស់មានមានប្រយោជន៍តាមរថយន្ត

ឆត្រ អាវភ្លៀង ឆ្នាំងសាកទូរសព្ទ ពិល ឧបករណ៍ដូយអាគុយឡាន ក្បាលសណ្ដោង សុទ្ធតែជារបស់មានប្រយោជន៍ក្នុងពេលភ្លៀង ពិសេសនៅពេល ដែលរថយន្តរបស់អ្នករលត់ពេលភ្លៀងខ្លាំង លេចជ្រាបចូលក្នុងប្រព័ន្ធភ្លើង ឬម៉ាស៊ីន។ អ្នកបើកបរគ្រប់រូប គប្បីមានរបស់ទាំងនេះតាមខ្លួននារដូវភ្លៀង ព្រោះវាអាចជួយអ្នកបានច្រើនលើសពីអ្វីដែលអ្នកគិត។