ទីកម្សាន្តបែបធម្មជាតិដ៏ស្រស់ស្អាតមួយ ម៉ានិច ឆ្ងល់ថា ហេតុអ្វី អត់មានអ្នកទៅលេង?

2018-05-23 04:53:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយពីបានទៅដល់រមណីយដ្ឋានថ្មីមួយស្ថិតនៅក្នុងភូមិសាស្ត្រខេត្តកំពង់ឆ្នាំង ម៉ានិច បានកត់សម្គាល់ថា ទីនោះជាទីឋានធម្មជាតិសម្រាប់ការកម្សាន្តដ៏ស្រស់ស្អាតមួយ ប៉ុន្តែនាងឆ្ងល់ថា ហេតុអ្វីបានជាមិនសូវមានអ្នកទៅលេង?

រមណីយដ្ឋានដែលកញ្ញា ដួង ម៉ានិច លើកមកនេះ មានឈ្មោះថា "វត្តភ្នំព្រះធាតុ" ជាទីឋានកម្សាន្តតាមបែបធម្មជាតិ និងភ្ជាប់និស្ស័យជាមួយព្រះពុទ្ធសាសនា អាថ៌កំបាំងមួយ។ នៅទីនោះមានវត្តអារាម២ គឺវត្តព្រះធាតុក្រោមនៅជើងភ្នំ និងវត្តព្រះធាតុលើនៅលើកំពូលភ្នំ សុទ្ធតែមានបារមីពូកែស័ក្ដិសិទ្ធិ។

ម៉ានិច ជាតារាសម្ដែងមួយរូប បានទៅដល់តំបន់នោះលើកដំបូងកាលពីថ្មីៗ ថតរឿង "ដែនដីស្នេហ៍អាថ៌កំបាំង"របស់នាង។ នាង បានស្នាក់ថតនៅទីនោះ រយៈពេល ៤ខែ ទើបនឹងបញ្ចប់ថ្មីៗ។នាងថា បានអះអាងថា ទីរមណីយដ្ឋានវត្តភ្នំព្រះធាតុ មានទេសភាពធម្មជាតិដ៏ស្រស់មនោរម្យ ខ្យល់ឱកាសល្អបរិសុទ្ធទាក់ចិត្តនាង។

"មិនត្រឹមប៉ុណ្ណឹងទេ គឺស័ក្ដិសិទ្ធិទៀត ខ្ញុំទៅនៅហ្នឹង ៤ខែខ្ញុំដឹង នៅទីនោះមានបារមីលោកយាយលក្ខណ៍ ស័ក្ដិសិទ្ធិណាស់ សុំអីបានហ្នឹង ខ្ញុំឃើញគេទៅសែនលាមាត់លាកមិនដាច់ទេ!”។

តារាស្រីរូបនេះ បន្តទៀតថា សម្រាប់វត្តព្រះធាតុលើ មានអ្នកទៅលេងច្រើនគួរសម តែវត្តព្រះធាតុក្រោម គឺមិនសូវមានអ្នកទៅលេងទេ។ "ទីនោះស្អាត ហើយស័ក្ដិសិទ្ធិទៀត ប៉ុន្តែខ្ញុំឆ្ងល់ម៉េចបានមិនសូវមានទៅលេង ប្រហែលឆ្ងាយមើលទៅ...នៅវត្តក្រោមមានលោកតែ២អង្គទេ ល្អដែរបើបងចុះផ្សាយ ក្រែងមានអ្នកទៅលេងច្រើនទៅ នឹងបានចូលបច្ច័យទុកគ្រាន់កសាងវត្តផង!”។

តាមការសាកសួរអ៊ុំប្រុស "នឿន" វ័យ ៦៨ឆ្នាំជាអ្នកចាំអាស្រមបារមីលោកតា "បញ្ចាគី" ក្នុងចំណោមទីកន្លែងបារមីជាច្រើនទៀត នៅវត្តព្រះធាតុលើ បានឲ្យដឹងស្រដៀងគ្នាថា ទីឋានវត្តភ្នំព្រះធាតុ មានអ្នកមកលេងច្រើនតែពេលមានបុណ្យធំៗ ដូចជាចូលឆ្នាំ ភ្ជុំបិណ្ឌជាដើម។ ដោយឡែកថ្ងៃចុងសប្ដាហ៍ ឬថ្ងៃធម្មតា មិនសូវមានទេ។

សកម្មភាព ម៉ានិច ថតរឿង "ដែនដីស្នេហ៍អាថ៌កំបាំង" នៅទីឋាន វត្តភ្នំព្រះធាតុ

ជាងនេះទៀតសោត ក្នុងចំណោមអ្នកមកកម្សាន្តនៅវត្តភ្នំព្រះធាតុ ភាគច្រើនជាប្រជាពលរដ្ឋក្នុងតំបន់ ឬខេត្ត ដោយឡែកអ្នកចម្ងាយ ដូចជាភ្នំពេញ និងខេត្តនានា គឺមានតិចតួច។ បើទោះមានទាំងទេសភាពស្អាត ខ្យល់អាកាសបរិសុទ្ធជាសក្ដានុពល ប៉ុន្តែលោក អ៊ុំបន្តថា ប្រជាពលរដ្ឋដែលមកដល់វត្តភ្នំព្រះធាតុ ភាគច្រើនបំផុត គឺមកក្នុងបំណងតែបន់ស្រន់ជាង ដើរកម្សាន្ត ព្រោះពួកគេមានជំនឿលើបារមីដែលមាននៅទីនេះ។

បញ្ហានេះ អ៊ុំប្រុសលើកឡើងថា ប្រហែលជាប្រជាពលរដ្ឋមិនទាន់ដឹងទូលំទូលាយ និងថាចម្ងាយផ្លូវអាចជាឧបសគ្គផង។ យ៉ាងណាក៏ដោយ លោកអ៊ុំចង់ឲ្យមាន ពុទ្ធបរិស័ទជិតឆ្ងាយ មកកម្សាន្ត និងភ្ជាប់និស្ស័យតាមពុទ្ធសាសនាឲ្យកាន់តែច្រើន។

រមណីយដ្ឋាន "វត្តភ្នំព្រះធាតុ" ស្ថិតនៅក្នុងភូមិច្រកកូវ ឃុំពាម ស្រុកសាមគ្គីមានជ័យខេត្តកំពង់ឆ្នាំង មានចម្ងាយប្រមាណ ៧០គីឡូម៉ែត្រពីរាជធានីភ្នំពេញ។ ប្រិយមិត្តអាចធ្វើដំណើរទៅបានតាមផ្លូវជាតិលេខ ៥ ពីភ្នំពេញ ទៅដល់ផ្សារត្រាច បត់ខាងឆ្វេងតាមផ្លូវលំចាក់កៅស៊ូមានចម្ងាយ ៣៥គីឡូម៉ែត្រ។ ប្រិយមិត្តធ្វើដំណើរប្រមាណ កន្លះម៉ោងនឹងដល់ ដែលផ្លូវមួយខ្សែនេះ គឺបុកទៅចំទីឋានវត្តភ្នំព្រះធាតុតែម្ដង។

មុនប្រមាណជា ៥គីឡូម៉ែត្រទៅដល់ ប្រិយមិត្តនឹងបានឃើញដុំថ្មភ្នំមួយដុំធំស្ថិតនៅលើកំពូលភ្នំ ខ្ពស់ផុតព្រៃដូចគេលើកបន្តុប។ ដុំថ្មដ៏ធំនោះ ជាទីសក្ការបូជាសំខាន់របស់ទីឋាន និងមានប្រវត្តិទាក់ទងថែមទៀត។

វត្តភ្នំព្រះធាតុលើ ថតពីវត្តព្រះធាតុក្រោម(រូបភាព៖ ផ្ដល់ដោយ ម៉ានិច)

អ៊ុំប្រុស នឿន ដែលចេះចាំតៗគ្នា បានតំណាលថា ដើមឡើយគឺមានអ្នកមានបារមី២នាក់ គឺបង និងប្អូនបាន ភ្នាល់គ្នា ដាំដើមផ្កា(ដាំនៅភ្នំមួយស្ថិតនៅភូមិព្រៃខ្មែរ ឃុំរលាប្អៀរ ឃុំរលាប្អៀរខេត្តកំពង់ឆ្នាំង ដូច្នេះហើយទើបភ្នំនោះឈ្មោះ "ភ្នំដើមផ្កា") ដោយសន្យាថា ផ្កានរណាចេញផ្កាមុន អ្នកនោះ នឹងបានត្រាស់មុន។

ក្រោយមក ដើមផ្ការបស់បង ចេញផ្កាមុន ប៉ុន្តែត្រូវប្អូនមកលួចកាច់យកទៅធ្វើជារបស់ខ្លួន ហើយក៏ហៅបងទៅមើល។ បារមីជាបង ទៅមើលហើយនិយាយថា "បើផ្កាប្អូនឯងចេញផ្កាមុនហើយ ប្អូនឯងត្រាស់មុនចុះ ប៉ុន្តែសាសនាប្អូនឯង មិនសូវសុខសប្បាយទេ មានលួច មានកិបកេងបន្លំជាដើម"។ដោយសារតែបារមីជាបង បានដឹងរួចទៅហើយថា ផ្កានោះជាផ្ការបស់ខ្លួន ដែលប្អូនលួចយកទៅ។

ថ្មប្អូនដែលប្រិយមិត្តអាចមើលឃើញតាំងពិចម្ងាយ

ក្រោយមក ដោយសារឈឺចិត្តនឹងការចាញ់កលប្អូន បារមីជាបង ក៏ធ្លាក់ខ្លួនឈឺ ៧យប់៧ថ្ងៃ ខ្ទររញ្ជួយដល់ស្រុកសៀម។ ក្រោយលឺដំណឹងនេះ ព្រះសង្ឃ ៥០០រយ បានប្រមូលគ្នាមកសូត្រធម៌ទ្រថ្មភ្នំជាបង តែទ្រមិនឈ្នះ ថ្មជាបងនោះ ក៏រលំបាក់សង្កត់លើព្រះសង្ឃទាំង ៥០០អង្គសុគតទៅ។ ដោយឡែកថ្មប្អូនដែលត្រាស់នោះ បានឈរលើកំពូលភ្នំមកដល់សព្វថ្ងៃ ដែលប្រិយមិត្តអាចមើលឃើញតាំងពីចម្ងាយ៕