ទើបចេញក្ដៅៗ HTC U12+ មិនខ្ចីប្រើក្បាលឆក ប៉ុន្តែថែមកាមេរ៉ាភ្លោះមុខ/ក្រោយ

2018-05-23 10:10:19
ចំនួនមតិ 0 | ចំនួនចែករំលែក 0

ចន្លោះមិនឃើញ

មុននេះ HTC ទើបបានបញ្ចេញស្មាតហ្វូនកំពូលថ្មី HTC U12+ ដើម្បីដណ្ដើមទីផ្សារស្មាតហ្វូន សម្រាប់ឆ្នាំ ២០១៨ នេះ។

គួរឲ្យភ្ញាក់ផ្អើលនោះគឺ HTC U12+ មិនមានរចនាបថក្បាលឆកដូចទូរសព្ទ Android កំពូលដទៃ ហើយជាស្មាតហ្វូន HTC ដំបូងមានបំពាក់កាមេរ៉ាភ្លោះ ចាប់តាំងពី HTC One M8 មក។

ម៉ូដែលថ្មីនេះមានតួខ្លួនដែលមិនខុសពី U11+ ប៉ុន្មាននោះទេ ដោយមានសមត្ថភាពធន់នឹងទឹកកម្រិត IP68។ ប៉ុន្តែអេក្រង់ទំហំ ៦ អ៊ីញប្រភេទ Super LCD6 របស់ស្មាតហ្វូននេះអាចទ្រាំទ្រនឹងការបង្ហាញរូបក្នុងកម្រិត HDR10 បាន។ តួខ្លួនរបស់វានៅតែមានចំណុចពិសេស ដោយអាចច្របាច់ដើម្បីដំណើរការមុខងារណាមួយ។

កាមេរ៉ាភ្លោះនៅផ្នែកខាងក្រោយមានមួយកម្រិត ១២ MP និងមួយទៀតមានកម្រិត ១៦ MP អាចធ្វើការ Optical Zoom បានពីរដង។ កាមេរ៉ាមេមាន Aperture ទំហំ f/1.8 ដែលមានបំពាក់ដោយបច្ចេកវិទ្យារក្សាលំនឹង OIS។

កាមេរ៉ារបស់ U12+ អាចថតវីដេអូបានដល់កម្រិត 4K នៅល្បឿន ៦០ ប្លង់/វិនាទី និងវីដេអូកម្រិត ១០៨០ ភីកសែលក្នុងល្បឿន ២៤០ ប្លង់/វិនាទី។ កាន់តែពិសេសនោះ កាមេរ៉ា Selfie ខាងមុខក៏ជាប្រភេទកាមេរ៉ាភ្លោះដែលមានកម្រិត ៨ MP។

U12+ មានប្រើបន្ទះឈីប Snapdragon 845 អមដោយ RAM ទំហំ ៦ GB និងមានជម្រើសអង្គផ្ទុកទិន្នន័យទំហំ ៦៤ ឬ ១២៨ GB ហើយមានកន្លែងដាក់មេមូរីកាតទៀតផង។ ប្រព័ន្ធប្រតិបត្តិការ Android 8.0 Oreo នឹងមានមកស្រាប់លើស្មាតហ្វូននេះ។

U12+ មានបន្ថែមសមត្ថភាពសាកថ្មឥតប្រើខ្សែ ប៉ុន្តែថាមពលថ្មបានថយចុះមកនៅត្រឹម ៣៥០០ mAh (U11+ មានថ្មទំហំ ៣៩៣០ mAh) ប៉ុណ្ណោះ។ ចំណុចពិសេសផ្សេងទៀតមានដូចជារន្ធបំពងសំឡេងបែបស្ទេរីអូ និងអាចបញ្ចេញសំឡេងគុណភាពច្បាស់ល្អពេលប្រើកាស។