ក្រុមចំនួន ៨ ដែលបានឈ្នះពានអឺរ៉ុប តែលេងមិនបានល្អក្នុងលីគរបស់ខ្លួន

2018-05-23 13:02:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ខណៈ Champions League វគ្គផ្ដាច់ព្រ័ត្រកាន់តែខិតជិតមកដល់ អត្ថបទនឹងបង្ហាញក្រុមបាល់ទាត់ចំនួន ៨ ដែលលេងមិនបានល្អក្នុងលីគរបស់ខ្លួន តែបានលើកពានអឺរ៉ុប។

សូមបញ្ជាក់ផងដែរថា ពានអឺរ៉ុបរួមមាន ពាន European Cup (ត្រូវបានប្ដូរឈ្មោះទៅជា Champions League តាំងពីឆ្នាំ ១៩៩២) ខណៈ ពាន UEFA Cup (ត្រូវបានប្ដូរឈ្មោះទៅជា Europa League ចាប់ពីឆ្នាំ ២០០៩)។

ក្រុមបាល់ទាត់ទាំង ៨ នោះគឺ៖

១. Real Madrid រដូវកាល ១៩៥៥/៥៦៖ ក្រុមបានបញ្ចប់រដូវកាល La Ligaក្នុងចំណាត់ថ្នាក់លេខ ៣ ឃ្លាត ១០ ពិន្ទុពី Athletic Bilbao ដែលជាម្ចាស់ជើងឯក និង ៩ ពិន្ទុ ពី Barcelona។ ទោះជាយ៉ាងណា នៅក្នុងក្របខ័ណ្ឌ Real Madrid បានធ្វើបានសម្រេចក្នុងការលើកពាន European Cup លើកដំបូងរបស់ខ្លួន បន្ទាប់ពីបានឈ្នះ ៤-៣ លើក្លឹបបារាំង Stade de Reims ក្នុងវគ្គផ្ដាច់ព្រ័ត្រ។

២.Eintracht Frankfurt រដូវកាល ១៩៧៩/៨០៖ ក្រុមលេងបានត្រឹមចំណាត់ថ្នាក់លេខ ៩ ក្នុង Bundesliga ហើយដាច់ពី Bayern Munich ដែលជាក្រុមជើងឯក ដល់ទៅ ១៨ ពិន្ទុឯណោះ។ យ៉ាងនេះក្ដី ងាកមកមើលក្នុង UEFA Cup ក្រោយការប្រកួតវគ្គផ្ដាច់ព្រ័ត្រពីរជើង ក្លឹប Frankfurt បានយកឈ្នះក្នុងលក្ខខណ្ឌ Away Goal លើ Borrussia Monchengladbach ក្នុងលទ្ធផល ៣-៣។

៣.Tottenham Hotspur រដូវកាល ១៩៨៣/៨៤៖ ក្រុមបានបញ្ចប់រដូវកាលក្នុងចំណាត់ថ្នាក់លេខ ៨ ក្នុងលីគកំពូលអង់គ្លេស (ដាច់ពី Liverpool ដែលជាក្រុមជើងឯកដល់ទៅ ១៩ ពិន្ទុ)។ ចំណាត់ថ្នាក់នេះមិនអាចជួយឲ្យ Spurs លេងបាល់អឺរ៉ុបបានឡើយ។ ទោះជាយ៉ាងណា ស្ថានភាពនេះត្រូវបានស្ដារឡើងវិញ ក្រោយក្រុមបានយកឈ្នះក្នុងវគ្គ Penalty Shootout ទៅលើក្លឹបបែលហ្សិក Anderlecht ក្នុងវគ្គផ្ដាច់ព្រ័ត្រ UEFA Cup រដូវកាលនោះ។

៤.Inter Milan រដូវកាល ១៩៩៣/៩៤៖ Inter Milan មិនដែលត្រូវបានកាត់ចោលពី Serie A ឡើយ តែក្លឹបស្ទើរតែជួបស្ថានភាពបែបនេះទៅហើយនៅរដូវកាល ១៩៩៣/៩៤។ ក្លឹបលេងបានត្រឹមចំណាត់លេខ ១៣ ក្នុងលីគ (លើស ១ ពិន្ទុពីតំបន់ត្រូវកាត់ចោល)។ យ៉ាងនេះក្ដី ក្នុងរដូវកាលនោះ ក្លឹបបានលើកពាន UEFA Cup ក្រោយឈ្នះ Salzburg ក្នុងវគ្គផ្ដាច់ព្រ័ត្រ។

៥.Schalke រដូវកាល ១៩៩៦/៩៧៖ ធ្លាក់ដល់ទៅលេខ ១២ ក្នុងលីគកំពូលអាល្លឺម៉ង់ជាមួយគម្លាតពិន្ទុដល់ទៅ ២៨ ពីក្លឹបជើងឯក Bayern។ ដូច Spurs កាលពីឆ្នាំ១៩៨៣/៨៤ ក្រុម Schalke បានយកឈ្នះ Inter ក្នុងវគ្គ Penalty Shootout ហើយលើកពាន UEFA Cup។

៦.Liverpool រដូវកាល ២០០៤/០៥៖ បើទោះជាធ្វើការវាយបកដ៏ល្បីល្បាញយកឈ្នះ AC Milan លើកពាន Champions League លើកទី ៥ របស់ខ្លួនកាលនោះ Liverpool បានបង្ហាញទម្រង់លេងមិនសូវបានល្អទេក្នុង Premier League។ ក្លឹបបានត្រឹមលេខ ៥ ដែលជាចំណាត់ថ្នាក់ក្រោមក្លឹបគូប្រជែង Everton ដែលលេងបានលេខ ៤ ក្នុងរដូវកាលនោះ។

៧.AC Milan រដូវកាល ២០០៦/០៧៖ មានពិន្ទុដាច់ពីក្លឹបគូប្រជែង Inter ដល់ទៅ ៣៦ ក្នុងលីគកំពូលអ៊ីតាលី។ យ៉ាងនេះក្ដី ក្រុមបានយកឈ្នះ Liverpool ក្នុងវគ្គផ្ដាច់ព្រ័ត្រ Champions League ក្នុងលទ្ធផល ២ ទល់នឹង ១ លើកពានកម្មវិធីជាលើកទី ៧ ក្នុងប្រវត្តិសាស្ត្រខ្លួន។

៨. Chelsea រដូវកាល ២០១១/១២៖ បានបញ្ចប់ចំណាត់ថ្នាក់លេខ ៦ ក្នុងលីគ មានពិន្ទុតិចជាងក្រុមជើងឯក Manchester United ដល់ទៅ ២៥ ពិន្ទុ។ ទោះជាយ៉ាងណា ក្រុមតោខៀវ បានបង្ហាញទម្រង់លេងល្អក្នុង Champions League។ ក្លឹបបានទម្លាក់ Napoli Benfica និង Barcelona ក្នុងវគ្គជម្រុះ ហើយបន្តឈ្នះ Bayern ក្នុងវគ្គផ្ដាច់ព្រ័ត្រ ដើម្បីលើកពានកម្មវិធីនេះជាលើកដំបូងក្នុងប្រវត្តិសាស្ត្រខ្លួន៕