ទិញឡានមួយទឹកជិះ អ្នកជំនាញបង្ហើបប្រាប់តម្លៃថ្លៃឬថោក កុំឲ្យទិញហើយខកចិត្តស្អិតទ្រូង

2018-05-24 02:53:26
ចំនួនមតិ 0 | ចំនួនចែករំលែក 0

ចន្លោះមិនឃើញ

មានលុយល្មមៗចង់ទិញឡានមួយទឹកជិះ ក៏មិនមែនជារឿងងាយស្រួលដែរបើមិនចេះមើលពីគុណភាពឡាននេះដូចជាគុណភាព ស៊េរីឆ្នាំ និងភាពពេញនិយម។ ឡានតម្លៃរាប់ពាន់ដុល្លារបើទិញមកខុសហើយគឺនឹងធ្វើឲ្យយើងស្ដាយក្រោយ និងខាតលុយជាមិនខាន។

អ្នកជំនាញមើលឡានមួយទឹកជួនភ្ញៀវរាប់មិនអស់ លោក សៅរិទ្ធី បានបង្ហើបប្រាប់ពីបទពិសោធន៍មើលឡានមួយទឹកដែលអ្នកគួរទិញជិះ ឬមិនគួរទិញជិះ។

ឡានមួយទឹកដែលការាសបានដាក់លក់ ឬអ្នកគួកជេរតែងទិញជាទូទៅលោកប្រាប់ថាគេចែកជា ៣ប្រភេទគឺ Grade A ឡាននៅស្អាតល្អ B ឡានកម្រិតមធ្យម និង C ឡានដែលយកមកធ្វើបន្ថែម។

ឡានមួយទឹកប្រភេទ Grade A ជាឡានដែលមានទឹកថ្នាំស្អាត ជើងក្រោយនៅល្អ មិនមានច្រេះ មិនមានបុកខាងមុខ ខាងក្រោយ ម៉ាស៊ីនស្ងាត់ កង់ហ្ស៊ីន និងមានគ្រឿងតុបតែងមកពីនាយ។

ចំពោះឡានប្រភេទ Grade B ជាឡានដែលស្ទើរម៉ាស៊ីន តួឡានសាច់ដែក និងបាតក្រោមមានច្រេះបន្តិចបន្តួច ចំពោះទឹកថ្នាំនៅស្អាតអាចទទួលយកបាន។

ឡានប្រភេទ Grade C ជាឡានដែលនាំចូលមកមានបុក បាញ់ថ្នាំថ្មី មានពុកជើងក្រោមសាច់ដែកច្រេះ ឬជាឡានកាត់តជាដើម ហើយគេយកមកធ្វើថ្មី។ លោកប្រាប់ថាឡានប្រភេទនេះមិនគួរទិញជិះឡើយ។ ឡានប្រភេទGrade C នេះភាគច្រើនគេតែផុសលក់នៅលើហ្វេសបុក ដាក់តម្លៃថោកជាដើម។

លោកបន្តថាអ្នកទិញគួរតែមានជំនាញមើលឡានមួយទឹកទៅជួយទិញទើបអាចមើលដឹង។ ចំពោះតម្លៃវិញប្រភេទ Grade A, B និង C នេះអាចមានតម្លៃខុសគ្នាចន្លោះពី ២ ០០០ ទៅ ៣ ០០០ ដុល្លារ ។

ក្រៅពីមើលគុណភាពរូបរាងឡាន និងម៉ាស៊ីនហើយពណ៌ក៏ជាកត្តាសំខាន់មួយដែរ ព្រោះវាជាការពេញនិយម ភាពហ៊ឺហា ទាន់សម័យ មានទីផ្សារខ្ពស់ និងងាយស្រួលលក់ចេញវិញពេលចង់ប្ដូរស៊េរី។

ពណ៌ឡានដែលអ្នកប្រើប្រាស់តែនិយមជិះមាន ពណ៌ស ទឹកមាស និងពណ៌ទឹកប្រាក់។ ចំពោះតម្លៃវិញលោកបញ្ជាក់ប្រាប់ថា ខុសគ្នាប្រមាណជា ១ ៥០០ ទៅ ២ ០០០ ដុល្លារ ពីពណ៌ស ទៅ ពណ៌ទឹកមាស និង ប្រមាណជា ១ ០០០ ទៅ ១ ៥០០ ដុល្លារ ពីពណ៌ទឹកមាស ទៅ ពណ៌ទឹកប្រាក់ សម្រាប់ស៊េរីឆ្នាំ គុណភាព និង Option តែមួយ ។

សម្រាប់ពណ៌ដែលមិនពេញនិយមក្រៅពីពណ៌ទាំង ៣នេះតម្លៃអាចខុសគ្នាប្រមាណជា ២ ៥០០ ទៅ ៣ ០០០ ដុល្លារ ឯណោះ។

លោកបានណែនាំអ្នកចង់ទិញឡានមួយទឹកជិះគួរគិតពីស៊េរីឆ្នាំក៏ល្អម្យ៉ាងដែរព្រោះអាចទាក់ទងនឹងគុណភាពរបស់ឡានច្រើន សម្រាប់ Lexus គួរទិញ ចាប់ពី ឆ្នាំ ២០០១ និង Highlander ចាប់ពីឆ្នាំ ២០០៣ ឡើងមានការកែប្រែគ្រឿងម៉ាស៊ីន និងប្រព័ន្ធសុវត្ថិភាពច្រើន ណាមួយគុណភាពក៏អាចនៅល្អផងដែរ៕

ចុច Like និង See First ដើម្បីទទួលព័ត៌មានបច្ចេកវិទ្យាមុនគេ......

អានអត្ថបទបន្ត៖

អត្ថបទ៖ ម៉េងងី