កម្ពុជានឹងមិនខ្វះគ្រឿងបន្លាស់រថយន្តប្រើទេ ក្រោយជប៉ុនលូកដៃជួយ
- 2018-05-23 07:35:09
- ចំនួនមតិ 0 | ចំនួនចែករំលែក 0
កម្ពុជានឹងមិនខ្វះគ្រឿងបន្លាស់រថយន្តប្រើទេ ក្រោយជប៉ុនលូកដៃជួយ
ចន្លោះមិនឃើញ
ក្រុមហ៊ុនជប៉ុន Sanyo Parts បានចុះអនុសារណៈយោគយល់គ្នាជាមួយសាលាមធ្យមសិក្សាបច្ចេកទេស JVC ពីកិច្ចសហប្រតិបត្តិការផ្តល់ការបណ្តុះបណ្តាលបច្ចេកវិទ្យាកែច្នៃឡើងគ្រឿងបន្លាស់រថយន្ត។ ពិធីនេះ ធ្វើឡើងនៅទីស្តីការក្រសួងការងារ និងបណ្តុះបណ្តាលវិជ្ជាជីវៈ កាលពីថ្ងៃទី ២២ ខែឧសភា ឆ្នាំ២០១៨។
លោក Keiji Sakai នាយកប្រតិបត្តិក្រុមហ៊ុន Sanyo Part បានឱ្យដឹងថា ក្រុមហ៊ុនលោកបានបង្កើតឡើងនៅក្នុងឆ្នាំ១៩៦៨ ដែលជាក្រុមហ៊ុនបោះដុំគ្រឿងបន្លាស់រថយន្ត។ ក្រុមហ៊ុនបានផលិតគ្រឿងបន្លាស់រថយន្តក្នុងប្រទេសចិន និងចែកចាយក្នុងប្រទេសជប៉ុន។
លោកបន្តថា កាលពី៤ឆ្នាំមុន ក្រុមហ៊ុនរបស់លោកបានមកសិក្សាស្រាវជ្រាវពីទីផ្សារកម្ពុជា។ ក្រុមហ៊ុនបានរកឃើញថា កម្ពុជាបានប្រើប្រាស់រថយន្តជាច្រើន ដែលផលិតនៅជប៉ុន។ ប៉ុន្តែសម្រាប់ការប្រើប្រាស់គ្រឿងបន្លាស់រថយន្តនៅកម្ពុជា គឺនិយមប្រើប្រាស់គ្រឿងបន្លាស់មួយទឹក ដែលពុំមានបទដ្ឋានស្តង់ដាច្បាស់លាស់ ដើម្បីធានាសុវត្ថិភាពឡើយ។
ក្រុមហ៊ុនរបស់លោក សហការជាមួយសាលា JVC ដើម្បីបង្កើតបច្ចេកវិទ្យាមួយ ក្នុងការកែច្នៃគ្រឿងបន្លាស់រថយន្តចាស់ៗឱ្យក្លាយទៅជាថ្មី និងមានស្តង់ដា ដើម្បីរក្សាបរិស្ថានស្អាត និងកាត់បន្ថយគ្រោះថ្នាក់ចរាចរណ៍ដែលបណ្តាលមកពីកំហុសបច្ចេកទេស ដោយសារការប្រើប្រាស់គ្រឿងបន្លាស់រថយន្តមួយទឹក។
លោក ពេជ្រ សោភ័ន រដ្ឋលេខាធិការក្រសួងការងារ បានមានប្រសាសន៍ថា នេះជាឱកាសមួយសម្រាប់ប្រជាពលរដ្ឋកម្ពុជា ដែលចង់មានជំនាញច្បាស់លាស់ ពាក់ព័ន្ធនឹងគ្រឿងបន្លាស់រថយន្ត។ បច្ចុប្បន្នទីផ្សារកម្ពុជា កំពុងតែត្រូវការជាចាំបាច់នូវជំនាញច្បាស់លាស់ក្នុងការផលិត និងជួសជុលគ្រឿងយន្ត៕
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
