ព្រះអង្គម្ចាស់ George ធ្លាប់ត្រូវក្រុម ISIS ប៉ុនប៉ងធ្វើឃាត ទាំងព្រះជន្មក្មេងខ្ចី

2018-05-24 04:52:54
ចំនួនមតិ 0 | ចំនួនចែករំលែក 0

ចន្លោះមិនឃើញ

ព្រះអង្គម្ចាស់ George ដែលជាបុត្រាច្បងរបស់ព្រះអង្គម្ចាស់ William ធ្លាប់ត្រូវបានក្រុម ISIS ប៉ុនប៉ងធ្វើឃាត ពេលយាងទៅសាលារៀនជាលើកដំបូង។

យោងតាមការប្រកាសរបស់តុលាការអង់គ្លេសឲ្យដឹងថា ភេរវករម្នាក់បានប្រកាសតាមអ៊ីនធឺណិតឲ្យអ្នកគាំទ្ររបស់ខ្លួនដាក់ថ្នាក់បំពុលក្នុងការ៉េមរបស់ព្រះអង្គម្ចាស់ George នៅសាលា Thomas’s Battersea ភាគនិរតីទីក្រុង ឡុងដ៍។ ជាមួយគ្នាដែរ ព្រះរាជអាជ្ញាបន្ថែមថា "ភេរវករឈ្មោះ Husnain Rashid អាយុ ៣១ ឆ្នាំ បានណែនាំបក្សពួករបស់ខ្លួនឲ្យព្យាយាមធ្វើឃាត ព្រះអង្គម្ចាស់ George ដោយប្រើប្រាស់វិធីតាមដែលអាចធ្វើទៅបានដូចជា ដាក់ថ្នាំបំពុល, ប្រើប្រាស់គីមី, បំផ្ទុះគ្រាប់បែក និងប្រើកាំបិតជាដើម។”

(ភេរវករឈ្មោះ Husnain Rashid)

ភេរវកររូបនេះ ត្រូវបានរកឃើញថាផ្ញើសារជាង ២៩០ ០០០ សារទៅក្រុមសន្ទនាក្នុង Telegram ដើម្បីណែនាំពីវិធីរៀបគម្រោងធ្វើឃាតព្រះអង្គម្ចាស់ George។ លើសពីនេះទៀត រូបគេបានបង្ហោះរូបថតរបស់ព្រះអង្គម្ចាស់ George និង ទីតាំងនៃសាលារៀនរបស់ព្រះអង្គរួមជាមួយសារមួយសរសេរថា "សូម្បីតែសែរាជវង្សក៏មិនត្រូវលើកលែងដែរ។”

ទោះយ៉ាងណាក៏ដោយ គម្រោងការនេះមិនបានសម្រេចនោះទេ ដោយសារភេរវកររូបនេះត្រូវបានចាប់ខ្លួនក្នុងផ្ទះរបស់ខ្លួននៅទីក្រុង Nelson កាលពីខែវិច្ឆិកាកន្លងទៅ។ ឥឡូវនេះ តុលាការកំពុងស៊ើបអង្កេតបន្ត និងបានចោទប្រកាន់លោក Rashid ចំនួនបីករណីពីបទផ្សំគំនិតរៀបចំអំពើភេរវកម្ម។

គួរឲ្យដឹងថា ព្រះអង្គម្ចាស់ George បានប្រសូតកាលពីថ្ងៃទី ២២ កក្កដា ឆ្នាំ ២០១៣ ជាបុត្រាច្បងរបស់ព្រះអង្គម្ចាស់ William និងត្រូវជាភាតុបុត្រា (ក្មួយប្រុស) របស់ព្រះអង្គម្ចាស់ Harry ដែលទើបរៀបអភិសេកកាលពីពេលថ្មីៗនេះ៕