ការប្រកួតស្វែងក្រុម E-Sport: LOL តំណាងកម្ពុជាទៅសិង្ហបុរីចាប់ផ្តើមស្អែក

2018-05-25 08:33:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រកួតកីឡាជើងឯកកីឡាអេឡិចត្រូនិកលើវិញ្ញាសា League Of Legends (LOL) វគ្គជម្រុះស្វែងរកក្រុមខ្លាំងតំណាងកម្ពុជាចេញទៅប្រកួតនៅប្រទេសសិង្ហបុរីចាប់ផ្តើមថ្ងៃសៅរ៍ ទី២៦ ខែឧសភា ចុងសប្តាហ៍នេះហើយ។

បន្ទាប់ពីបានស្វែងករឃើញក្រុមដែលបានចុះឈ្មោះចូលរួមប្រកួត ពេលនេះគណៈកម្មការរៀបចំការប្រកួតរបស់សហព័ន្ធកីឡាអេឡិចត្រូនិកកម្ពុជាបានដាក់ចេញកាលបរិច្ឆេទ និងចាប់គូប្រកួតរួចរាល់ហើយ។ ក្រុមចំនួន២៣ត្រូវប្រកួតប្រជែងគ្នាដើម្បីស្វែងរកក្រុមខ្លាំងឈ្នះកៅអីឆ្ពោះទៅប្រកួតជុំផ្តាច់ព្រ័ត្រនៅប្រទេសសិង្ហបុរីដែលជាព្រឹត្តិការណ៍ធំដំបូងបង្អស់នៅតំបន់អាស៊ានសម្រាប់វិញ្ញាសា LOL នេះ។

ការប្រកួតត្រូវធ្វើឡើងពីរដំណាក់កាលគឺដំណាក់កាលប្រកួតជម្រុះស្វែងរកក្រុមតំណាងឲ្យប្រទេសនីមួយៗ និងដំណាក់កាលទី២ប្រកួតជុំផ្តាច់ព្រ័ត្រនៅប្រទេសសិង្ហបុរីដែលប្រជុំដោយក្រុមខ្លាំងៗតំណាងប្រទេស១០ប្រចាំតំបន់អាស៊ាន។ ប្រទេសដែលចូលរួមមាន ថៃ វៀតណាម សិង្ហបុរី ម៉ាឡេស៊ី ឥណ្ឌូណេស៊ី ហ្វីលីពីន កម្ពុជា ឡាវ មីយ៉ាន់ម៉ា និងប្រ៊ុយណេ ។

អត្ថប្រយោជន៍

រង្វាន់វគ្គជម្រុះតំណាងប្រទេស៖ ក្រុមលេខ១ បាន៥០០០ RP និងទទួលបានការឧបត្ថម្ភទាំងអស់សម្រាប់ធ្វើដំណើរទៅប្រកួតជុំផ្តាច់ព្រ័ត្រនៅសិង្ហបុរី។
រង្វាន់ជើងឯកប្រចាំព្រឹត្តិការណ៍៖ ក្រុមលេខ១ ទទួលបានកុំព្យូទ័រម៉ាក Razer Blade HD 256GB ចំនួន ៦គ្រឿង ដែលមានម៉ៅ ក្តារចុច និងកាសពាក់ត្រចៀក។ កុំព្យូទ័រ១គ្រឿងតម្លៃ២០០០ដុល្លារ ដូច្នេះ៦គ្រឿងតម្លៃសរុប១២០០០ដុល្លារអាមេរិក។
ក្រុមទាំង១០មកពី១០ប្រទេសទទួលបានការឧបត្ថម្ភទាំងអស់ក្នុងការធ្វើដំណើរកម្សាន្តទៅកាន់តំបន់ទេសចរណ៍លំដាប់ពិភពលោកជាច្រើននៅប្រទេសសិង្ហបុរី និងចូលរួមក្នុងព្រឹត្តិការណ៍ប្រគំតន្ត្រីដែលមានតារាចម្រៀងល្បីៗលំដាប់ពិភពលោកចូលរួមសម្តែង។

ព្រឹត្តិការណ៍ LOL E-Sports ដ៏ធំលើកដំបូងនៅអាស៊ាននេះទទួលបានការគាំទ្រពីក្រសួងវប្បធម៌ សហគមន៍ និងយុវជនរបស់ប្រទេសសិង្ហបុរី និងមានការឧបត្ថម្ភគាំទ្រពីក្រុមហ៊ុនឯកជនជាច្រើន។ ជាមួយគ្នាសហព័ន្ធកីឡាអេឡិចត្រូនិកកម្ពុជាក៏បានសហការដើម្បីរៀបចំការប្រកួតជម្រុះនៅកម្ពុជាដើម្បីស្វែងរកក្រុមតំណាងកម្ពុជាទៅចូលរួមប្រកួត។

តាមដានទាំងអស់គ្នាថាតើក្រុមមួយណាជាជើងខ្លាំងតំណាងឲ្យកម្ពុជាចេញទៅប្រកួតជាមួយក្រុមផ្សេងៗទៀតនៅអាស៊ាន?