ក្រុមហង្សក្រហម Liverpool នឹងធ្វើដំណើរទៅប្រកួតជាមួយក្រុម Real Madrid នៅ​ថ្ងៃ​នេះ។ ក្រុម​របស់​លោក Jurgen Klopp ធ្វើដំណើរទៅកាន់ទីក្រុង Kiev ដើម្បី​ព្យាយាម​រារាំង​ក្រុម Real Madrid មិន​ឱ្យ​ឈ្នះ​ពាន​ Champions League៤​លើក​ជាប់ៗ​គ្នា។

ខាង​ក្រោម​នេះ​គឺ​ជា​អ្នក​ជំនាញ​វិភាគ​បាល់​ទាត់​៤​រូប​​របស់​ទូរទស្សន៍ Sky Sports ទស្សន៍ទាយ​លទ្ធផល​ឈ្នះ​ចាញ់​របស់​ក្រុម​ទាំង​២៖ ​​

១ លោក Phil Thompson

លោក​ថា ​Real Madrid នឹង​បង្ហាញ​ទម្រង់​លេង​ស្រដៀង​គ្នា​ពេល​ប៉ះ​ Liverpool មិន​​ដឹង​ត្រូវ​ចង​ឡាន​ក្រុង​យ៉ាង​ម៉េច ពោល​គឺ​​ប្រឹង​ប្រយុទ្ធ​ខ្លាំង​តែ​បំបែក​ក្បួន​​ហង្ស​ក្រហម​មិន​បែក ជា​ហេតុ​នាំ​ឲ្យ​ Livepool វាយ​បក​វិញ។

​Thompson និយាយ​ថា​ក្រុម​ទាំង​២​ខ្សោយ​ខ្សែ​ការពារ​ដូច​គ្នា។ Sergio Ramos មាន​គុណវិបត្តិ​មួយ​គឺ​រត់​យឺត។ ល្បឿន​យឺត​នេះ​ហើយ ដែល​ធ្វើ​ឲ្យ​​​ខ្សែ​ការពារ​រូប​នេះ បាន​កាត​លឿង និង កាត​ក្រហម​​ជា​ហូរហែ​នៅ​ពេល​ព្យាយាម​បិទ​ខ្សែ​ប្រយុទ្ធ។

Thompson ទាយ​ថា Liverpool ឈ្នះ ដោយ​ Salah, Mane, Firmino និង Bale ជា​អ្នក​រក​គ្រាប់​បាល់​បាន។

២ លោក Charlie Nicholas

លោក​ជឿ​ថា​បទពិសោធន៍​លេង​ជោកជាំ​​នៅ Champions League មិន​អាច​ឲ្យ Real ឈ្នះ​ Liverpool បាន​នោះ​ទេ។ James Milner និង Jordan Henderson ពិត​ជា​អាច​រារាំង​ខ្សែ​បម្រើ​កណ្តាល​របស់​ក្លិប Real Madrid។ ប្រសិនបើ Lucas Vazquez ទៅ​បំពេញ​តួនាទី​នៅ​ស្លាប​ស្តាំ​របស់​ Dani Carvajal ដូច​កាល​លេង​ជាមួយ Bayern អីចឹង Vazquez នឹង​ត្រូវ​ជាប់​គាំង​ទៀត​ហើយ។

Charlie ទាយ​ថា Liverpool នឹងទទួលជ័យជម្នះ។ Mane នឹង​ជា​អ្នក​រក​គ្រាប់​បាល់​ដំបូង​គេ។ ក្រុម​ទាំង​២​នឹង​មាន​បាល់​ទាត់​ចេញ​ពី​ជ្រុង​ច្រើន​ៗ​ដូច​គ្នា លើស​ពី​៥​ដង។

៣ លោក Matt Le Tissier

ខ្សែ​ប្រយុទ្ធ​៣​រូប​ខាង​លើ​របស់ Liverpool នឹង​បង្ក​កង្វល់​ច្រើន​ដល់​ខ្សែ​ការពារ​ Real។ លោក Le Tissier មើល​ឃើញ​ពី​ចំណុច​ខ្សោយ​របស់ Real ដូច​លោក Klopp ដែរ​គឺ​នៅ​ត្រង់​កីឡាករ Marcelo ដែល​ចូល​ចិត្ត​ឡើង​ប្រយុទ្ធ ហើយ​នេះ​ជា​អ្វី​ដែល​ខ្សែ​ប្រយុទ្ធ​មុត​ស្រួច​របស់​ហង្ស​ក្រហម​អាច​កេង​ផល​ចំណេញ​បាន។

អ្នក​ជំនាញ​របស់​ទូរទស្សន៍ Sky Sports ខាង​លើ​មើល​ឃើញ​ថា Alexander-Arnold នឹង​ធ្វើ​បាន​ល្អ ដូច​កាល​បិទ Leroy Sane ដែល​ជា​ខ្សែប្រយុទ្ធ​ដ៏​ល្អ​បំផុត​លើ​លោក​មិន​ឲ្យ​កម្រើក​រួច។

Le Tissier ទាយ​ថា Liverpool នឹង​ឈ្នះ ដោយ​ក្រុម​ទាំង​២​នឹង​ទាត់​បញ្ចូល​ទី​ដូច​គ្នា ខណៈ​ដែល Firmino, Salah និង Mane សុទ្ធ​តែ​អាច​រក​គ្រាប់​បាន។

៤ លោក Paul Merson

មាន​តែ​លោក Merson តែ​មួយ​គត់​ដែល​មើល​ខុស​ពី​​អ្នក​ជំនាញ​៣​នាក់​ខាង​លើ។ លោក Merson របស់​ទូរទស្សន៍ Sky Sports ដែល​តែងតែ​ទាយ​លទ្ធផល​នៅ Premiere League រៀងរាល់​សប្តាហ៍​មិន​សូវ​ខុស​ លោក​​ជឿ​ថា​វា​នឹង​ក្លាយ​ទៅ​ជា​ការ​ប្រកួត​ដ៏​ស្វិតស្វាញ និង ដ៏​គួរ​ឲ្យ​ភ្ញាក់ផ្អើល។ Merson និយាយ​ថា Salah និង Ronaldo នឹង​មិន​អាច​រក​គ្រាប់​បាល់​បាន​ឡើយ ហើយ អ្នក​ដែល​ស៊ុត​បញ្ចូល​ទី​ឲ្យ Real ឈ្នះ​គឺ Benzema។

Merson ទាយ​ថា Real Madrid ឈ្នះ ៣-២ ហើយ Benzema គឺ​ជា​អ្នក​រក​គ្រាប់​បាល់​ដំបូង។

ប្រភព៖ Sky Sports   ប្រែ​សម្រួល៖ សុខ លាងហ៊ត