Karius បង្ហាញសាររំជួលចិត្ត ក្រោយកំហុសដ៏ធ្ងន់នៅ Champions League
- 2018-05-28 23:09:00
- ចំនួនមតិ 0 | ចំនួនចែករំលែក 0
Karius បង្ហាញសាររំជួលចិត្ត ក្រោយកំហុសដ៏ធ្ងន់នៅ Champions League
ចន្លោះមិនឃើញ
Karius បានសូមទោសក្រោយចាញ់ការប្រកួតនៅ Champions League នាទីក្រុងគៀវយប់មិញ ដោយបានបង្កើតកំហុសធំៗ២ដង ហើយ ថាការចាញ់របស់ក្រុម គឺជាការទទួលខុសត្រូវទាំងស្រុងរបស់ខ្លួន។
ក្រុម Real Madrid បានឈ្នះពានរង្វាន់ក្របខ័ណ្ឌ Champions League ៣លើកជាប់ៗគ្នា ក្រោយ Gareth Bale បានស៊ុតបញ្ចូលទី២គ្រាប់ បញ្ចប់ការប្រកួតដោយលទ្ធផល ៣-១។
កំហុសរបស់អ្នកចាំទីអាឡឺម៉ង់ Karius បានជះឥទ្ធិពលយ៉ាងធ្ងន់ធ្ងរ ដោយបានបោះបាល់ទៅចំជើង Karim Benzema បំប៉ោងសំណាញ់ទីគ្រាប់ទី១ និង ធ្វេសប្រហែសទះបាល់ Bale ផ្លាតនៅគ្រាប់ទី៣ ធ្វើឲ្យក្រុមហង្សក្រហមបានត្រឹមសម្រក់ទឹកភ្នែកបន្ទាប់ពីចិញ្ចឹមចិត្ត១ទសវត្សឡើងដល់វគ្គផ្ដាច់ព្រ័ត្រ។
ក្រោយចប់ការប្រកួត Karius បានប្រាប់ talkSPORT ថា៖
“ប្រសិនបើមានពេលវេលាត្រលប់ ខ្ញុំនឹង[មិនឲ្យរឿងនោះកើតឡើងឡើយ]។ ខ្ញុំចង់សូមទោសចំពោះអ្នករាល់គ្នា ចំពោះក្រុម ខ្ញុំធ្វើឲ្យពួកគេចាញ់"។
“វាពិតជាពិបាកនឹងទទួលណាស់ ប៉ុន្តែនេះគឺជាជីវិតអ្នកចាំទី។ ខ្ញុំលែងមានអារម្មណ៍អីអស់ហើយ នៅពេលនេះ។ ថ្ងៃនេះខ្ញុំធ្វើឲ្យក្រុមរបស់ខ្ញុំចាញ់។ ខ្ញុំមានអារម្មណ៍សោកស្តាយខ្លាំងណាស់សម្រាប់អ្នករាល់គ្នា និង សម្រាប់ក្លឹបទាំងមូល"។ Karius បាននិយាយ។
ជាក់ស្តែងកាលពីយប់មិញ បន្ទាប់ពីចប់ការប្រកួត អ្នកដែលយំយូរជាងគេគឺអ្នកចាំទីនេះឯង។ សូម្បីតែពេលឡើងទៅទទួលមេដាយប្រាក់ Karius ត្រឹមក្តាប់រង្វាន់ក្នុងដៃមិនខ្ចីយកទៅពាក់នឹងកដូចកីឡាករដទៃឡើយ៕