៥សន្លឹក បង្ហាញពីការងារប្រចាំថ្ងៃ នៃអ្នកប្រកបរបរតម្បាញ អ្នកខេត្តបន្ទាយមានជ័យ

2018-05-28 04:31:24
ចំនួនមតិ 0 | ចំនួនចែករំលែក 0

ចន្លោះមិនឃើញ

របរតម្បាញសូត្រ របស់អ្នកស្រុកភ្នំស្រុក ខេត្តបន្ទាយមានជ័យ ជាមុខរបរកេរដូនតា យូរលង់ណាស់មកហើយ ដែលបានបន្ដរហូតមកដល់សព្វថ្ងៃនេះ។ ខាងក្រោមនេះ គឺជាការរៀបរាប់ត្រួសៗ អំពីការធ្វើតម្បាញសូត្រ អមដោយរូបភាពស្រស់ស្អាត។

១. អ្នកស្រី ដាំ មុំ អាយុ៣៥ឆ្នាំ ម្ចាស់សិប្បកម្មតម្បាញសូត្រ នៅភូមិប៉ោយចារ ឃុំប៉ោយចារ ស្រុកភ្នំស្រុក ខេត្តបន្ទាយមានជ័យ។ អ្នកស្រី បានចាប់ផ្ដើមចងក្រងក្រុមស្ត្រីអ្នកត្បាញ និងបង្កើតជាសិប្បកម្មតម្បាញសូត្រ ផ្គត់ផ្គង់ឱ្យសមាគម និងអតិថិជនផ្សេងៗ ក្នុងអំឡុងឆ្នាំ ២០០៨ ឬ ២០០៩។

២. លោកយាយ ទៀប ហម វ័យ ជិត៧០ឆ្នាំ បុគ្គលិករបស់អ្នកស្រី ដាំ មុំ កំពុងរ៉ (រវៃ)សូត្រ បញ្ចូលទៅក្នុងបំពង់អំបោះ។ បន្ទាប់ពីគេជ្រលក់ពណ៌ និងឱ្យបាយរួចហើយ ( ការឱ្យបាយសូត្រ គឺគេយកសូត្រដែលជ្រលក់ពណ៌រួចហើយ ទៅត្រាំនឹងបបរអង្ករដំណើប។ ការធ្វើយ៉ាងដូច្នេះ គឺដើម្បីកុំឱ្យសូត្ររីកមាឌ នៅពេលត្បាញ)។ បន្ទាប់ពី រ៉ សូត្រ ចូលក្នុងបំពង់រួចហើយ គេយកសូត្រនោះទៅអន្ទង។

៣. កញ្ញា សាវៀក បុគ្គលិករបស់អ្នកស្រី ដាំ មុំ កំពុងអន្ទងផ្ទៃសូត្រ នៅក្រោមផ្ទះរបស់គាត់ បន្ទាប់ពីរ៉ចូលបំពង់រួចហើយ។ សូត្រដែលអន្ទងរួចហើយ ត្រូវមូរចូលរ៉ូឡូកី។ បន្ទាប់មក ត្រូវយកទៅចាក់ចូលធ្មេញដែកហើយរើសម៉ូត និង ត្បាញ។

៤. បុគ្គលិកអ្នកស្រី ដាំ មុំ កំពុងត្បាញសំពត់ហូលនៅក្រោមផ្ទះរបស់អ្នកស្រី។ ការត្បាញនេះ មិនកំណត់ម៉ោង ឬ ពេលវេលាច្បាស់លាស់ដូចកម្មកររោងចក្រនោះទេ។ កាលណាទំនេរពីការងារផ្ទះ បុគ្គលិកក៏មកត្បាញ។ បុគ្គលិកខ្លះដែលខំប្រឹងប្រែង អាចត្បាញរហូតដល់យប់ក៏មាន។ អ្នកស្រី ដាំ មុំ អាចដើរពិនិត្យមើល ឬផ្តល់ប្រឹក្សា ពេលណាបុគ្គលិកជួបការលំបាក។

៥. សិប្បកម្មតម្បាញសូត្ររបស់អ្នកស្រី ដាំ មុំ មានផលិតផលដែលផលិតពីសសៃអំបោះ និងសូត្រ។ ផលិតផលទាំងនោះ មានដូចជា ភួយដណ្តប់ ក្រមាបង់ក កន្សែង ក្រណាត់សូត្រ... ។ ផលិតផលទាំងនេះ មានលក់នៅស្ទើរគ្រប់ខេត្តក្នុងប្រទេសកម្ពុជា ប៉ុន្តែទីផ្សារដែលធំជាងគេ គឺ ខេត្តសៀមរាប និង រាជធានីភ្នំពេញ។

សូមចុចអាន៖ របរតម្បាញសូត្ររបស់អ្នកស្រុក ភ្នំស្រុក ប្រឈមការបាត់បង់

អត្ថបទ៖ ក្រុមការងារផ្លូវទៅស្រុក