ចាយជិត ២ ម៉ឺនដុល្លារទិញទូរសព្ទយកមកទម្លាក់ ព្រោះចង់ដឹងមួយណាមាំជាងគេ

2018-05-29 04:09:11
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមការងារ Tom's Guide បានចំណាយទឹកប្រាក់ប្រមាណ ១៨ ០០០ ដុល្លារ ដើម្បីទិញស្មាតហ្វូនស៊េរីថ្មីៗមួយចំនួនយកមកធ្វើការតេស្តទម្លាក់ ដោយចង់ដឹងថាស្មាតហ្វូនថាមានភាពរឹងមាំជាងគេ។

ការធ្វើតេស្តមានចែកចេញជាច្រើនជុំ ដោយមានតេស្តទម្លាក់ពីកម្ពស់ ១,២ ម៉ែត្រ និង ១,៨ ម៉ែត្រ ទៅលើឈើ និងដុំស៊ីម៉ង់ រួមទាំងតេស្តទម្លាក់ចូលក្នុងចានបង្គន់ទៀតផង។ លទ្ធផលនៃការធ្វើតេស្តមានដូចខាងក្រោម ៖

១. Motorola Moto Z2 Force ពិន្ទុ ៨,៥/១០

ផ្ទាំងអេក្រង់ ShatterShield របស់ Z2 Face ពិតជាមានភាពរឹងមាំ ដោយសូម្បីពេលទម្លាក់ដោយផ្កាប់មុខពីកម្ពស់ ១,៨ ម៉ែត្រ ក៏អេក្រង់គ្មានបញ្ហាអ្វីដែរ។ ភាពខូចខាតតិចតួចគឺនៅត្រង់ផ្នែកខាងក្រោម នៃតួខ្លួនអាលុយមីញ៉ូមរបស់វា។

ពេលដាក់ចូលចានបង្គន់បានប្រមាណ ២-៣ វិនាទី ស្មាតហ្វូននេះបានរលត់ ប៉ុន្តែពេលស្ងួតទៅវាក៏អាចដំណើរការឡើងវិញ ដោយមិនមានបញ្ហាអ្វីនោះទេ។

២. LG X Venture ពិន្ទុ ៦,៦/១០

ពេលទម្លាក់ពីកម្ពស់ ១,២ ម៉ែត្រ ទៅលើឈើ និងដុំស៊ីម៉ង់ ស្មាតហ្វូននេះនៅអាចទ្រាំទ្របាន។ ប៉ុន្តែពេលទម្លាក់ពីកម្ពស់ ១,៨ ម៉ែត្រ ផ្នែកខាងក្រោមជុំវិញប៊ូតុងស្រាប់តែប្រេះស្រាំ។ ពេលទម្លាក់ចូលចានបង្គន់ ធ្វើឲ្យរន្ធមីក្រូហ្វូនខូច ប៉ុន្តែអ្វីផ្សេងទៀតនៅដំណើរការធម្មតា។

៣. Apple iPhone X ពិន្ទុ ៦,២/១០

iPhone X អាចទ្រាំទ្រនឹងការទម្លាក់ពីកម្ពស់ ១,២ និង ១,៨ ម៉ែត្រនៅលើឈើបានយ៉ាងល្អ។ ប៉ុន្តែពេលទម្លាក់ពីកម្ពស់ ១,២ ម៉ែត្រលើដុំស៊ីម៉ង់ ផ្ទៃអេក្រង់ស្រាប់តែប្រេះច្រើនកន្លែង ហើយទម្លាក់ពីកម្ពស់ ១,៨ ម៉ែត្រ ប្រេះរឹតតែច្រើនកន្លែងថែមទៀត។ ពេលដាក់ចូលទឹកក្នុងចានបង្គន់ អេក្រង់ម្ដងរលត់ ម្ដងភ្លឺ ប៉ុន្តែពេលធ្វើតេស្តរួចវានៅដំណើរការបានធម្មតា។

៤. LG V30 ពិន្ទុ ៦/១០

ដូចស្មាតហ្វូនដទៃដែរ ពេលទម្លាក់លើឈើ V30 អាចទ្រាំទ្របានយ៉ាងល្អ។ ប៉ុន្តែពេលចូលដល់ការតេស្តទម្លាក់លើថ្មភ្លាម (នៅកម្ពស់ ១,២ និង ១,៨ ម៉ែត្រ) ផ្ទៃអេក្រង់បានប្រេះជាច្រើនកន្លែង។ V30 មានសមត្ថភាពធន់នឹងទឹក ហេតុនេះអាចឆ្លងផុតការតេស្តទម្លាក់ចូលចានបង្គន់បាន ប៉ុន្តែសំឡេងដែលបញ្ចេញមកហាក់មិនសូវច្បាស់ដូចមុន។

៥. Galaxy S9 ពិន្ទុ ៦/១០

Galaxy S9 អាចទ្រាំទ្រនឹងការទម្លាក់លើឈើបាន ប៉ុន្តែពេលចាប់ផ្ដើមទម្លាក់លើដុំស៊ីម៉ង់នៅកម្ពស់ ១,២ ម៉ែត្រឃើញមានស្នាមប្រេះលើអេក្រង់។ តេស្តទម្លាក់តទៀតនៅកម្ពស់ ១,៨ ម៉ែត្រ ឃើញមានប្រេះកាន់តែច្រើនកន្លែងលើអេក្រង់ ជាពិសេសនៅគែមជុំវិញ។ ពេលទម្លាក់ចូលក្នុងទឹក Galaxy S9 មិនមានរងបញ្ហាអ្វីនោះទេ។

៦. Motorola Moto G5 Plus ពិន្ទុ ៥,១/១០

ពេលទម្លាក់លើឈើ Motor G5 Plus នៅទ្រាំទ្របាន ហើយពេលទម្លាក់លើស៊ីម៉ង់កម្ពស់ ១,២ ម៉ែត្រ មានខូចខាតបន្តិចបន្តួចប៉ុណ្ណោះ។ យ៉ាងណាក្ដីពេលទម្លាក់លើស៊ីម៉ង់ពីកម្ពស់ ១,២ ម៉ែត្រ អេក្រង់បែកប្រេះស្រាំលៀនចេញមកក្រៅតែម្ដង។

៧. iPhone 8 ពិន្ទុ ៤,៩/១០

អត់មានខូចខាតត្រង់ណាបន្តិច ពេលទម្លាក់នៅលើឈើ។ ប៉ុន្តែពេលទម្លាក់លើស៊ីម៉ង់កម្ពស់ ១,២ ម៉ែត្រ ចាប់ផ្ដើមឃើញមានស្នាមប្រេះកញ្ចក់ ហើយប្រេះកាន់តែធ្ងន់ធ្ងរពេលទម្លាក់នៅកម្ពស់ ១,៨ ម៉ែត្រ។

៨. Galaxy Note8 ពិន្ទុ ៤,៣/១០

ដូចស្មាតហ្វូនដទៃទៀត ដោយ Note8 អាច ឆ្លងផុតការទម្លាក់នៅលើឈើដោយគ្មានបញ្ហា។ ប៉ុន្តែឈានដល់ការទម្លាក់លើស៊ីម៉ង់ពីកម្ពស់ ១,២ ម៉ែត្រអេក្រង់ចាប់ផ្ដើមប្រេះស្រាំ។ ពេលទម្លាក់ដោយបែរមុខចំស៊ីម៉ង់នៅកម្ពស់ ១,៨ ម៉ែត្រ អេក្រង់ចាប់ផ្ដើមមានបញ្ហា ធ្វើឲ្យខូច Touch ចុចលែងដើរតែម្ដង។

៩. OnePlus 5T ពិន្ទុ ៤,៣/១០

ពេលទម្លាក់នៅលើឈើមិនឃើញមានកន្លែងណាខូចខាតឡើយសម្រាប់ OnePlus 5T។ ពេលចាប់ផ្ដើមទម្លាក់លើស៊ីម៉ង់នៅកម្ពស់ ១,២ ម៉ែត្រ ឃើញមានស្នាមប្រេះអេក្រង់ ហើយប្រេះរឹតតែខ្លាំងពេលទម្លាក់នៅកម្ពស់ ១,៨ ម៉ែត្រ រហូតធ្វើឲ្យទូរសព្ទខូចប្រើលែងកើត។

១០. Huawei Mate 10 Pro ពិន្ទុ ៤,៣/១០

ទម្លាក់នៅកម្ពស់ ១,២ ម៉ែត្រលើស៊ីម៉ង់ ធ្វើឲ្យ Touch របស់អេក្រង់មានបញ្ហា និងមានស្នាមប្រេះច្រើនកន្លែង។ ពេលទម្លាក់ដោយបែរមុខចំលើស៊ីម៉ង់ពីកម្ពស់ ១,៨ ម៉ែត្រ ផ្នែកខ្លះនៃអេក្រង់បានខ្ទាតចេញ អាចឲ្យមើលឃើញគ្រឿងខាងក្នុងទៀតផង។

១១. Google Pixel 2 XL ពិន្ទុ ៤,៣/១០

ពេលទម្លាក់លើស៊ីម៉ង់កម្ពស់ ១,២ ម៉ែត្រ អេក្រង់បានប្រេះ ហើយពេលទម្លាក់ដោយបែរមុខចំនៅកម្ពស់ ១,៨ ម៉ែត្រ អេក្រង់ពាក់កណ្ដាលចេញពន្លឺភ្លើងពណ៌ស ខុសប្រក្រតីតែម្ដង។

១២. iPhone SE ពិន្ទុ ៣,៩/១០

ទម្លាក់លើឈើមិនមានបញ្ហាអ្វីនោះទេ ប៉ុន្តែពេលទម្លាក់លើស៊ីម៉ង់វិញ (កម្ពស់ ១,២ ម៉ែត្រ) គេអាចឃើញស្នាមប្រេះលើអេក្រង់ ហើយពេលទម្លាក់ដោយបែរមុខចំនៅកម្ពស់ដដែលនេះ អេក្រង់បែកប្រេះមើលលែងយល់។ ពេលទម្លាក់ពីកម្ពស់ ១,៨ ម៉ែត្រ ផ្នែកមួយដុំនៃអេក្រង់បានជ្រុះចេញតែម្ដង៕

ប្រភព៖ engadget ប្រែសម្រួល៖ សុខហេង