E-Sports កម្ពុជាទៅប្រកួតជម្រុះនៅវៀតណាមដើម្បីរកកៅអី Asian Games

2018-05-31 07:17:29
ចំនួនមតិ 0 | ចំនួនចែករំលែក 0

ចន្លោះមិនឃើញ

សហព័ន្ធកីឡាអេឡិចត្រូនិកកម្ពុជា (E-Sports) នឹងបញ្ជូនក្រុមកីឡាអេឡិចត្រូនិករបស់ខ្លួនលើវិញ្ញាសា League of Legends ទៅប្រកួតជម្រុះនៅប្រទេសវៀតណាមដើម្បីស្វែងរកកៅអីធ្វើដំណើរទៅប្រកួតក្នុងព្រឹត្តិការណ៍កីឡាទ្វីបអាស៊ី Asian Games នៅប្រទេសឥណ្ឌូណេស៊ីនាពេលខាងមុខនេះ។

លោក លន់ សាមឌី អគ្គលេខាធិការសហព័ន្ធដឹកនាំកីឡាករប្រជុំ

សហព័ន្ធកីឡាអេឡិចត្រូនិកកម្ពុជាបានឲ្យដឹងថា នឹងបញ្ជូនក្រុមកីឡាករ League of Legends មួយក្រុមដែលមានសមាជិក៦នាក់ និងថ្នាក់ដឹកនាំម្នាក់ចូលរួមប្រកួតវគ្គជម្រុះនៅប្រទេសវៀតណាម។ ការប្រកួតជម្រុះនៅប្រទេសវៀតណាមនេះដើម្បីស្វែងរកកៅអីចូលរួមប្រកួតក្នុងព្រឹត្តិការណ៍កីឡាធំប្រចាំទ្វីបអាស៊ីគឺ Asian Games ឆ្នាំ២០១៨នៅប្រទេសឥណ្ឌូណេស៊ី។

ក្រុមប្រឹក្សាអូឡាំពិកអាស៊ី សហព័ន្ធកីឡាអេឡិចត្រូនិកអន្តរជាតិ និងគណៈកម្មាធិការរៀបចំការប្រកួតកីឡាទ្វីបនៅឥណ្ឌូណេស៊ីបានសម្រេចដាក់ប្រភេទកីឡាអេឡិចត្រូនិក ឬ E-Sports ជាកីឡាចូលរួមប្រកួតសម្តែងផ្លូវការ។ នេះព្រឹត្តិការណ៍ប្រវត្តិសាស្ត្រលើកដំបូងដែលកីឡាអេឡិចត្រូនិកសម័យទំនើបត្រូវបានអនុញ្ញាតឲ្យបង្ហាញខ្លួនជាផ្លូវការក្នុងព្រឹត្តិការណ៍ធំបំផុតដែលមាន៤ឆ្នាំម្តង។ សហព័ន្ធកីឡាអេឡិចត្រូនិកអន្តរជាតិបានប្រកាសថា កីឡា E-Sports នឹងមាន៦វិញ្ញាសាដែលត្រូវបានដាក់ឲ្យប្រកួតសម្តែង។

វាជាការចូលរួមប្រកួតសម្តែងដែលមិនជាប្រភេទកីឡាដណ្តើមយកមេដាយឡើយ។ យ៉ាងណា កីឡាទ្វីបអាស៊ីឆ្នាំ២០២២ដែលចិនទទួលធ្វើម្ចាស់ផ្ទះបានប្រកាសថា កីឡា E-Sports នឹងក្លាយជាកីឡាពិតប្រាកដដែលប្រកួតដណ្តើមមេដាយដូចកីឡាផ្សេងៗទៀតដែរ។

វិញ្ញាសាទាំង៦ដែលត្រូវប្រកួតបង្ហាញ

គណៈប្រតិភូ និងក្រុមកីឡា E-Sports កម្ពុជានឹងចេញដំណើរតាមជើងយន្តហោះនៅថ្ងៃទី៤ ខែមិថុនា ខាងមុខនេះ និងគ្រោងត្រឡប់មកវិញនាថ្ងៃទី៧ ខែមិថុនា ឆ្នាំ២០១៨។ ប្រសិនបើកម្ពុជាទទួលបានកៅអីពីការប្រកួតវគ្គជម្រុះនេះ នឹងមានសិទ្ធិធ្វើដំណើរទៅចូលរួមប្រកួតកីឡាទ្វីបអាស៊ីដែលប្រទេសឥណ្ឌូណេស៊ីធ្វើម្ចាស់ផ្ទះពីថ្ងៃទី១៨ ខែសីហា ដល់ថ្ងៃទី២ ខែកញ្ញា ឆ្នាំ២០១៨៕