ច្រៀងយូរហើយ ទើប មាស សុខសោភា ទម្លាយចង់សម្តែងជាតួអង្គមួយខ្លាំងបំផុត

2018-06-01 02:59:13
ចំនួនមតិ 0 | ចំនួនចែករំលែក 0

ចន្លោះមិនឃើញ

បើមានឱកាសសម្ដែងភាពយន្ត តារាចម្រៀង មាស សុខសោភា ប្រាប់ថា ចង់សម្ដែងជាតួអង្គកំប្លែងលេងសើច អ្នកទស្សនាមើលហើយសើចសប្បាយចិត្តតែម្ដង។

មូលហេតុនេះ ក៏ព្រោះម្ចាស់បទ "មេឃកំពុងភ្លៀងហើយ" គិតថា ត្រូវនឹងអត្តចរិតផ្ទាល់របស់អ្នកនាង ជាមនុស្សចូលចិត្តលេងសើច និងចង់ឲ្យមនុស្សជុំវិញរីករាយ។ តារាចម្រៀងរូបនេះប្រាប់ថា បើឲ្យទៅសម្ដែងជាតួកម្សត់ គឺទៅមិនរួចទេ ព្រោះអ្នកនាងមិនពូកែយំ។

កន្លងមក តារាចម្រៀងទទួលបានប្រជាប្រិយភាពទាំងក្នុង និងក្រៅប្រទេសធ្លាប់បានប្រកាសថា ចង់ងាកមកបន្ថែមបទពិសោធន៍សម្ដែងភាពយន្តម្ដង បន្ទាប់ពីចំណាយពេលយូរឆ្នាំលើវិស័យចម្រៀង។ មានផលិតករជាច្រើនបានទាក់ទងមកតារាកើតឆ្នាំ ១៩៨៤ បន្តបន្ទាប់ តែអ្នកនាង មាស សុខសោភា មិនទាន់យល់ព្រមទទួលសំណើថតរឿងនៅឡើយនោះទេ ដោយសម្អាងលើហេតុផលមិនទាន់មានពេលគ្រប់គ្រាន់។ សូម្បីការកំណត់ពេលជាក់លាក់ណាមួយដើម្បីថត ក៏តារាចម្រៀងគ្មានកុងត្រានៅផលិតកម្មថោនមិនទាន់អាចកំណត់បានដែរ។

ថ្មីៗនេះ គេសង្កេតឃើញតារាចម្រៀងល្បីៗជាច្រើន បានងាកមកចាប់អាជីពសម្ដែង បន្ថែមលើមុខរបរចម្រៀងរបស់ខ្លួន ដើម្បីបំពេញចំណីចក្ខុប្លែកមួយសម្រាប់អ្នកគាំទ្រ ក្នុងនោះដូចជា អ្នកនាង សុគន្ធ និសា លោក ឆន សុវណ្ណរាជ អ្នកនាងពេជ្រ សោភា កញ្ញា រ៉េត ស៊ូហ្សាណា លោក Step រួមទាំងតារាចម្រៀងជាច្រើនទៀត៕

អត្ថបទ៖ លឹម សុនា