Revenge Team ឈ្នះជើងឯក LOL តំណាងកម្ពុជាទៅប្រកួតនៅសិង្ហបុរី
- 2018-06-03 13:22:45
- ចំនួនមតិ 0 | ចំនួនចែករំលែក 0
Revenge Team ឈ្នះជើងឯក LOL តំណាងកម្ពុជាទៅប្រកួតនៅសិង្ហបុរី
ចន្លោះមិនឃើញ
ការប្រកួតកីឡាអេឡិចត្រូនិកលើវិញ្ញាសា League Of Legends បានស្វែងរកឃើញក្រុមខ្លាំងហើយដែលត្រូវបានបញ្ចប់ការប្រកួតល្ងាចមិញនេះក្រោមអធិបតីភាពរបស់ឯកឧត្តម ជា ច័ន្ទបរិបូណ៍ អនុប្រធានសហព័ន្ធកីឡាអេឡិចត្រូនិកកម្ពុជា។
សហព័ន្ធកីឡាអេឡិចត្រូនិកកម្ពុជាបានបញ្ចប់ការប្រកួតជម្រុះស្វែងរកក្រុមខ្លាំងនៅកម្ពុជាដោយជោគជ័យ។ ក្រុមបានចុះឈ្មោះចូលរួមប្រកួតចំនួន២៣ក្រុមដែលធ្វើការប្រកួតកាលពីថ្ងៃទី២៦ និង២៧ ខែឧសភាដើម្បីយក៨ក្រុមមកប្រកួតនៅថ្ងៃទី២ និងទី៣ ខែមិថុនា ឆ្នាំ២០១៨។
បន្ទាប់ពីបញ្ចប់ការប្រកួត ក្រុមខ្លាំង Revenge Team ទទួលបានចំណាត់ថ្នាក់លេខ១ បន្ទាប់ពីបានយកឈ្នះក្រុម Team Spirit ដោយលទ្ធផល ២-០ នៅវគ្គផ្តាច់ព្រ័ត្រ។ ក្រុមនេះនឹងតំណាងឲ្យកម្ពុជាចូលរួមប្រកួតក្នុងព្រឹត្តិការណ៍ធំអន្តរជាតិធំលើកដំបូងប្រចាំអាស៊ាននៅសិង្ហបុរី។ ការប្រកួតនៅសិង្ហបុរីមាន១០ក្រុមដែលសុទ្ធតែខ្លាំងៗតំណាងឲ្យប្រទេស១០នៅអាស៊ានចូលរួមប្រកួតគឺម្ចាស់ផ្ទះសិង្ហបុរី កម្ពុជា ថៃ វៀតណាម ម៉ាឡេស៊ី ឥណ្ឌូណេស៊ី ហ្វីលីពីន ឡាវ មីយ៉ាន់ម៉ា និងប្រ៊ុយណេ។
ព្រឹត្តិការណ៍ Hyperplay ដែលរៀបចំនៅប្រទេសសិង្ហបុរី ក្រុមជើងឯកទទួលបានរង្វាន់កុំព្យូទ័រម៉ាក Razer Blade HD 256GB ចំនួន ៦គ្រឿង ដែលមានម៉ៅ ក្តារចុច និងកាសពាក់ត្រចៀក។ កុំព្យូទ័រ១គ្រឿងៗតម្លៃ២០០០ដុល្លារ ដូច្នេះ៦គ្រឿងតម្លៃសរុប១២០០០ដុល្លារអាមេរិក។ ក្រុមទាំង១០នឹងទទួលបានការឧបត្ថម្ភធ្វើដំណើរកម្សាន្តទៅកាន់តំបន់ទេសចរណ៍លំដាប់ពិភពលោកជាច្រើននៅប្រទេសសិង្ហបុរី។ ព្រឹត្តិការណ៍ LOL E-Sports នេះនឹងមានការប្រគំតន្ត្រីដ៏អស្ចារ្យដែលមានតារាចម្រៀង និងឌីជេលំដាប់ពិភពលោកចូលរួមសម្តែងជាច្រើនលើកទៀតផង។
ព្រឹត្តិការណ៍ Hyperplay ជាមហោស្រពតន្ត្រី និងការប្រកួតកីឡាអេឡិចត្រូនិកលើកដំបូងនៅតំបន់អាស៊ានដែលនឹងរៀបចំថ្ងៃទី៤-៥ ខែសីហា ឆ្នាំ២០១៨នៅកីឡដ្ឋាន Indoor Stadium ដែលជាផ្នែកមួយរបស់ប្រទេសសិង្ហបុរីក្នុងនាមជាប្រធានអាស៊ានឆ្នាំនេះ។ តាមរយៈកម្មវិធី Hyperplay យុវជននៅក្នុងតំបន់នឹងបានជួបជុំគ្នាដើម្បីគោលបំណងរួមគ្នា ប្រកួតជាមួយគ្នា ស្វែងយល់ពីគ្នា និងកសាងសហគមន៍អាស៊ានតែមួយឲ្យកាន់តែខ្លាំងក្លា។
បើចាប់អារម្មណ៍ លោកអ្នកអាចចូលរួមក្នុងព្រឹត្តិការណ៍ក៏បាន ចូលមើលវិបសាយ Hyperplay ឬតាមរយៈសហព័ន្ធកីឡាអេឡិចត្រូនិកកម្ពុជាក៏បាន៕