កូរ៉េខាងជើង រុះរើមេទ័ពកំពូល ៣រូប

2018-06-04 07:25:20
ចំនួនមតិ 0 | ចំនួនចែករំលែក 0

ចន្លោះមិនឃើញ

មន្ត្រីយោធាជាន់ខ្ពស់កូរ៉េខាងជើង ៣រូប ត្រូវបានផ្លាស់ប្ដូរមុខតំណែង ខណៈប្រធានាធិបតីអាមេរិក ដូណាល់ ត្រាំ និងមេដឹកនាំកូរ៉េខាងជើង គីម ជុងអ៊ុន កំពុងរៀបចំជំនួបកំពូល ដែលគ្រោងធ្វើឡើងនៅថ្ងៃទី១២ ខែមិថុនា ២០១៨ ខាងមុខនេះ។ នេះបើតាមការបញ្ជាក់របស់មន្ត្រីយោធាអាមេរិក ដោយសុំមិនបញ្ជាក់អត្តសញ្ញាណ។

លោក Kim Su-gil អតីតប្រធានគណៈកម្មាធិការបក្សពលករកូរ៉េខាងជើងប្រចាំក្រុងព្យុងយ៉ាង និងលោក គីម ជុងអ៊ុន (រូបភាព៖ KCNA)

តាមសារព័ត៌មានកូរ៉េខាងត្បូង Yonhap បញ្ជាក់ថា មន្រ្តីយោធាជាន់ខ្ពស់ទាំង ៣រូបនោះ មានដូចជា លោក Pak Yong-sik រដ្ឋមន្រ្តីក្រសួងកងទ័ពប្រជាជនកូរ៉េខាងជើង លោក Ri Myong-su អគ្គសេនាធិការសេនាធិការកងទ័ពកូរ៉េខាងជើង និងលោក Kim Jong-gak អគ្គនាយក នៃអគ្គនាយកដ្ឋានគោលនយោបាយរបស់កងទ័ពកូរ៉េខាងជើង។

សារព័ត៌មានកូរ៉េខាងត្បូងដដែលបានបញ្ជាក់ទៀតថា លោក No Kwang-chol អនុរដ្ឋមន្រ្តីទី១ នៃក្រសួងកងទ័ពប្រជាជនកូរ៉េខាងជើង បានកាន់តំណែងរដ្ឋមន្ត្រីក្រសួងកងទ័ពប្រជាជនកូរ៉េខាងជើងជំនួសលោក Pak Yong-sik។

លោក Ri Myong-su អគ្គសេនាធិការកងទ័ព ត្រូវបានជំនួសដោយលោក Ri Yong-gil ដែលជាអតីតអគ្គសេនាធិការរងកងទ័ព។ ចំណែកលោក Kim Jong-gak អគ្គនាយក នៃអគ្គនាយកដ្ឋានគោលនយោបាយរបស់កងទ័ពកូរ៉េខាងជើង ត្រូវបានជំនួសដោយលោក Kim Su-gil អតីតប្រធានគណៈកម្មាធិការបក្សពលករកូរ៉េខាងជើងប្រចាំក្រុងព្យុងយ៉ាង៕