ណែនាំឲ្យស្គាល់ មេរោគសាហាវទាំង ៤ ហ៊ានតែប្រហែស ដឹងតែខ្ទេចមិនខាន

2018-06-05 09:05:35
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅពេលដែលអ្នកប្រើកុំព្យូទ័រ ចង់ដោត Flash Drive ឬក៏អ្នកប្រើប្រាស់ទូរសព្ទចង់ផ្ញើទិន្នន័យឲ្យគ្នាតាមប្រព័ន្ធ Bluetooth រឿងដែលអ្នកប្រើប្រាស់ភាគច្រើនមុនគេ គឺរឿងឆ្លងមេរោគ (Malware) នេះតែម្ដង។

តាមពិត វានៅមានវិធីច្រើនទៀត ដែលជាមួលហេតុធ្វើឲ្យឧបករណ៍ប្រើប្រាស់របស់អ្នកឆ្លងមេរោគ ទាំងនោះបាន ដូចជាការបើកមើលសារដែលមានផ្ទុកកូដមេរោគ ការទាញយកកម្មវិធីនានាពីប្រភពមិនច្បាស់លាស់ជាដើម។

យ៉ាងណាមិញ កូដមិនល្អទាំងនោះមិនមែនមានតែ មេរោគ ដែលអ្នកហៅថា Virus តែម៉្យាងនោះទេ។ ខាងក្រោមនេះ ជាកូដទាំង ៤ ប្រភេទដែលជនទុច្ចរិតប្រើដើម្បីគ្រប់គ្រង និងទាញយកទិន្នន័យរបស់យើងមកប្រើប្រាស់៖

១. Virus

ដោយវាមានឈ្មោះថា Virus ជាភាសាខ្មែរមានន័យថាមេរោគនោះ ជាប្រភេទកូដមេរោគ (Malware) ដែលសាមញ្ញបំផុត ដែលមនុស្សភាគច្រើនតែងជួបប្រទះ។ វាភ្ជាប់ខ្លួនវាទៅនឹងកម្មវិធីនានា ហើយវានឹងឆ្លងទៅគ្រប់កុំព្យូទ័រដែលវាបានប្រាស្រ័យទាក់ទង។ Virus នឹងមិនអភិវឌ្ឍខ្លួនវាឡើយ ប្រសិនបើអ្នកប្រើប្រាស់មិនបានចុចដំឡើងកម្មវិធីដែលផ្ទុកវា (.exe file)។ ប៉ុន្តែ បើអ្នកបានចុចលើកម្មវិធីដែលមានផ្ទុក Virus នោះហើយ វានឹងចាប់ផ្ដើមបំបែកខ្លួន និងធ្វើសកម្មភាពលុកលុយចូលទៅក្នុងប្រព័ន្ធកុំព្យូទ័រ។ លទ្ធផលចំពោះកុំព្យូទ័រដែលត្រូវបានលុកលុយដោយ Virus អាចមានដូចជាការដើរយឺតជាងមុន ខូចកម្មវិធី បើកលែងកើត និងអាចឲ្យកុំព្យូទ័រប្រើប្រាស់លែងបាន (DOS Attack)។

២. Worm

កូដមេរោគប្រភេទ Worm អាចបំបែកខ្លួនបានដូចជា Virus ដែរ តែវាមានសមត្ថភាពបំបែកខ្លួនដោយឯកឯងមិនចាំបាច់ត្រូវតែឲ្យអ្នកប្រើប្រាស់ចុចលើកម្មវិធីណាមួយឡើយ។ វានឹងស្វែងរកចំណុចខ្សោយនៅក្នុងប្រព័ន្ធកុំព្យូទ័រ ឬក៏ប្រើប្រាស់ព័ត៌មានក្លែងក្លាយណាមួយមកបោកបញ្ឆោតអ្នកប្រើប្រាស់ឲ្យផ្ដល់ដំណើរការឲ្យវាបានពេញលេញ។ មិនត្រឹមតែប៉ុណ្ណោះ នៅពេលដែល Worm ជ្រៀតចូលក្នុងកុំព្យូទ័ររបស់អ្នកហើយ វានឹងប្រើប្រាស់ប្រព័ន្ធបញ្ជូនទិន្នន័យ និងព័ត៌មានដើម្បីឆ្លងកាត់ទៅក្នុងប្រព័ន្ធទាំងមូលដោយមិនឲ្យអ្នកប្រើប្រាស់ដឹងឡើយ។

៣. Trojan

Trojan ជាកូដមេរោគដ៏មានគ្រោះថ្នាក់មួយ ព្រោះវាស្ថិតនៅក្រោមទម្រង់ជាកម្មវិធី ដែលមានភាពត្រឹមត្រូវ ធ្វើឲ្យអ្នកប្រើប្រាស់ច្រឡំហើយត្រូវឆ្លង Trojan ចូលក្នុងកុំព្យូទ័រខ្លួន។ វាមានសមត្ថភាព អាចរំខានអ្នកប្រើប្រាស់ដោយវាអាចលោតផ្ទាំងនានាដោយខ្លួនឯង បំផ្លាញឬលួចយកទិន្នន័យអ្នកប្រើប្រាស់ ហើយចុងក្រោយវាក៏អាចបើកផ្លូវឲ្យ Hacker លួចចូលក្នុងកុំព្យូទ័ររបស់យើងបាន។

៤. Bot

Bot ជាប្រភេទកូដមេរោគ ដែលគេអាចប្រើប្រាស់ក្នុងផ្លូវល្អផង និងក្នុងផ្លូវអាក្រក់ផង។ ក្នុងផ្លូវល្អ គេអាចប្រើ Bot ដើម្បីវាយលុយកុំព្យូទ័រមួយ ហើយទាញវាយកមកគ្រប់គ្រងក្រោមម៉ាស៊ីនមេវិញ។ បើនិយាយពីរឿងមិនល្អវិញ Bot មានសមត្ថភាពខ្លាំងដោយវាមិនត្រឹមតែអាចបំបែកខ្លួនដោយខ្លួនឯងដូច Worm ទេ តែវាអាចលួចលេខសម្ងាត់ លេខគណនីហិរញ្ញវត្ថុ ព័ត៌មានផ្ទាល់ខ្លួន ចាប់យកការឆ្លងឆ្លើយ និងបើកផ្លូវឲ្យ Hacker ចូលលុកលុយកុំព្យូទ័រថែមទៀតផង។

ចុចអាន៖

ប្រភព៖ cisco ប្រែសម្រួល៖ ផាត សុវត្ថិ