Sane ចេញមតិជាសាធារណៈលើកដំបូង ក្រោយត្រូវបានផាត់ចេញពីក្រុមជម្រើសជាតិ

2018-06-05 12:08:56
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយមិនបានជាប់ក្នុងបញ្ជីឈ្មោះកីឡាករ ២៣ រូបដែលនឹងត្រូវលេង World Cup នៅរុស្ស៊ីខាងមុខ ខ្សែស្លាប Leroy Sane ត្រូវបានសង្កេតឃើញថាមិនបានមានការប្រតិកម្មភ្លាមៗនោះទេ ប៉ុន្តែបានបញ្ចេញមតិរបស់ខ្លួននៅក្រោមរូបថតមួយបង្ហោះដោយមិត្តរួមក្រុម Kyle Walker។

កាលពីល្ងាចម្សិលមិញ ខ្សែការពារស្លាប Manchester City កីឡាករ Kyle Walker បានបង្ហោះរូបថតមួយក្នុង Instagram ដោយបានសរសេរថា៖ "នៅពេលដែលអ្នកដឹងថា Leroy Sane នឹងមិនបានចូលរួម ក្នុង World Cup"។ ខ្សែការពារអង់គ្លេសទំនងសំដៅទៅលើ ការសម្រេចចិត្តរបស់គ្រូបង្វឹកជម្រើសជាតិអាល្លឺម៉ង់ Joachim Low ក្នុងការកាត់ឈ្មោះ Sane ពីបញ្ជីឈ្មោះកីឡាករទាំង ២៣ រូបដែលនឹងត្រូវទៅរុស្ស៊ីដើម្បីទៅលេងព្រឹត្តិការណ៍ប្រកួតបាល់ទាត់ដ៏ធំមួយនេះ។

មួយសន្ទុះធំក្រោយមក ខ្សែស្លាប Sane បានចូលទៅបញ្ចេញយោបល់បែបកំប្លែងខាងក្រោមរូបភាពនោះ ដោយបាននិយាយថា Walker “សំណាង" ហើយដែលមិនបានលេងប៉ះខ្លួន។

សូមបញ្ជាក់ផងដែរថា កាលពីរសៀលថ្ងៃម្សិលមិញ ខ្សែស្លាបវ័យក្មេង Sane ត្រូវបានប្រកាសថាមិនបានទៅលេង World Cup ខាងមុខឡើយ ដោយមិនបានជាប់ក្នុងឈ្មោះបញ្ជីកីឡាករទាំង ២៣ រូបរបស់ក្រុមជម្រើសជាតិអាល្លឺម៉ង់។ បើតាមគ្រូបង្វឹក Low ថ្លែងកាលពីម្សិលមិញ លោកបានហៅការសម្រេចចិត្តនេះគឺជា "ការសម្រេចចិត្តដ៏សែនប្រកៀកប្រកិត" ដោយលោកបានជ្រើសយកខ្សែស្លាប Julian Brandt របស់ Bayer Leverkusen ជាជាងកីឡាករឡើងជើង Manchester City។ លោក Low មិនបានបញ្ជាក់ឡើយពីមូលហេតុនៃការជ្រើសបែបនេះ ប៉ុន្តែបើតាមការចុះផ្សាយរបស់សារព័ត៌មានមួយចំនួន បានលើកឡើងថា Brandt មាន"ទម្រង់លេងបែបការពារ" ជាង Sane ។

នាពេលអម្បាញ់មិញនេះ កីឡាករ Sane បានបង្ហោះសារក្នុង Instagram របស់ខ្លួន ដើម្បីអរគុណអ្នកគាំទ្រចំពោះការផ្ដល់កម្លាំងចិត្ត។ ក្នុងសារដដែល ខ្សែស្លាបវ័យ ២២ ឆ្នាំ ក៏បានសម្ដែង "ការអាក់អន់ស្រពន់ចិត្ត" ដែលមិនបានចូលលេង World Cup លើកនេះ ប៉ុន្តែបានសន្យាថានឹង "ខំប្រឹងប្រែងបន្ត" ដើម្បីអាចត្រលប់មកជួយក្រុមជម្រើសជាតិនាពេលខាងមុខ។ កីឡាករអាល្លឺម៉ង់ក៏បានជូនពរក្រុមជម្រើសជាតិខ្លួនឲ្យមានសំណាងល្អក្នុងកម្មវិធីប្រកួតដ៏ធំខាងមុខ៕