៣ឆ្នាំហើយដែលក្រុមហ៊ុនធានារ៉ាប់រងមួយនេះ ជ្រោមជ្រែងវិស័យអប់រំ STEM

2018-06-07 05:04:51
ចំនួនមតិ 0 | ចំនួនចែករំលែក 0

ចន្លោះមិនឃើញ

បច្ចុប្បន្នវិស័យអប់រំផ្នែក វិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា ឬ STEM មានសារៈសំខាន់កាន់តែខ្លាំងឡើងៗនៅកម្ពុជា តាមរយៈការអភិវឌ្ឍន៍ និងការលូតលាស់សេដ្ឋកិច្ចរបស់ប្រទេស។ ក្នុងនោះ ក្រុមហ៊ុនធានារ៉ាប់រង Prudential កម្ពុជា មានមោទនភាពយ៉ាងខ្លាំងដែលខ្លួនបានជ្រោមជ្រែងដល់វិស័យអប់រំទាំងនេះ ក្នុងអំឡុងពេល៣ឆ្នាំកន្លងមក។

នាយកប្រតិបត្តិក្រុមហ៊ុន Prudential កម្ពុជា លោក David Nutman បានថ្លែងថា៖ "វាពិតជាមានសារៈសំខាន់ណាស់សម្រាប់សិស្សានុសិស្ស ដែលពួកគាត់គួរយល់ដឹងពីមូលដ្ឋានគ្រឹះនៃមុខវិជ្ជា STEM តាំងពីក្មេងៗ ដើម្បីចាប់យកឱកាសសម្រាប់លូតលាស់ និងរីកចម្រើន ខណៈប្រទេសកំពុងបន្តអភិវឌ្ឍខាងវិស័យបច្ចេកវិទ្យា និងឌីជីថល។ នេះជាការលើកទឹកចិត្តមួយដែលក្រសួងអប់រំបានផ្ដល់កិច្ចខិតខំប្រឹងប្រែងជាច្រើន ដើម្បីផ្សព្វផ្សាយ លើកកម្ពស់វិស័យអប់រំ STEM ក៏ដូចជាការទទួលបានការជ្រោមជ្រែងពីខាងវិស័យឯកជន ដែលមានទស្សនៈវិស័យដូចគ្នា”។

អស់រយៈពេល៣ឆ្នាំ ដែល Prudential បានរៀបចំកម្មវិធីផ្ដល់គុណប្រយោជន៍ដល់វិស័យអប់រំជាច្រើនរួមមាន ការរៀបចំកម្មវធី STEP នៅមជ្ឈមណ្ឌលកម្សាន្ត Kids City ភ្នំពេញ ដោយទាក់ទាញបានសិស្ស-គ្រូបង្រៀន មកពីខេត្តបាត់ដំបង និងសៀមរាបចំនួន ១១២ ០០០ នាក់ និងការគាំទ្រដល់ព្រឹត្តិការណ៍ទិវាវិទ្យាសាស្ត្រពិភពលោក ប្រចាំឆ្នាំ២០១៥ ហើយបានសម្រេចជាប្រយោជន៍ដល់គ្រូបង្រៀន មន្ត្រីអប់រំ និងសិស្សជិត ៦ ០០០ នាក់។

ជាមួយគ្នានោះ កម្មវិធី "គំនិតផ្ដួចផ្ដើមការវិនិយោគក្នុងសហគមន៍" ដែលមានការគាំទ្រពីក្រសួងអប់រំ យុវជន និងកីឡា បានផ្ដល់អត្ថប្រយោជន៍ដល់សិស្ស និងគ្រូបង្រៀនជាង ២០០,០០០ នាក់ នៅតាមសាលាផ្សេងៗគ្នា នៅពាសពេញផ្ទៃប្រទេស។

បន្ថែមលើការគាំទ្រដល់វិស័យអប់រំដូចដែលបានរៀបរាប់ ក្រុមហ៊ុនក៏មានតួនាទីយ៉ាងសកម្មក្នុងការផ្សព្វផ្សាយ និងលើកកម្ពស់ផ្នែកសុខភាព សុវត្ថិភាពចរាចរណ៍ផ្លូវគោក និងការអប់រំក្នុងប្រទេស។

ជាក់ស្ដែង ថ្មីៗនេះក្រុមហ៊ុន Prudential កម្ពុជា បានប្រារព្ធខួប៥ឆ្នាំនៃប្រតិបត្តិការខ្លួនក្នុងប្រទេសកម្ពុជា ហើយកំពុងបន្តស្វែងរកវិធីសាស្ត្រផ្សេងៗ ដើម្បីជួយគាំទ្រដល់ការអភិវឌ្ឍន៍ប្រទេសនេះ រួមទាំងផ្ដល់សេវាធានារ៉ាប់រងអាយុជីវិត ដើម្បីបំពេញតាមតម្រូវការដល់ប្រជាជនគ្រប់រូប៕

អត្ថបទ៖ សុខណា

ពាក្យទាក់ទង