EZECOM ប៉ះក្រុមហ៊ុនខ្សែកាបខ្នាតធំមួយនេះ ដឹងតែ Internet រត់ខ្លាំងម៉ាអេមម៉ង

2018-06-08 04:05:35
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុន EZECOM ដែលជាក្រុមហ៊ុនសេវាអ៊ីនធឺណិតឈានមុខគេនៅកម្ពុជា និងក្រុមហ៊ុន LXT Networks ដែលជាអ្នកឯកទេសផ្គត់ផ្គង់ខ្នាតធំ នូវបណ្តាញខ្សែកាបលើដីក្នុងតំបន់អាស៊ាន បានប្រកាសចាប់ដៃគូសហការជាយុទ្ធសាស្ត្រ ដើម្បីផ្តល់ដំណោះស្រាយរួមគ្នា ដែលនឹងតភ្ជាប់ប្រទេសប្រាំគឺ កម្ពុជា ឡាវ មីយ៉ាន់ម៉ា វៀតណាម និងថៃ។

តាមរយៈភាពជាដៃគូនេះក្រុមហ៊ុន EZECOM និង LXT Networks នឹងផ្តល់ជូនអតិថិជនទាំងក្នុងនិងក្រៅប្រទេសរបស់ខ្លួន នូវការតភ្ជាប់ដោយផ្ទាល់និងឥតអាក់ តាមខ្សែពិសេសៗជាច្រើនមានដូចជា ប្រព័ន្ធខ្សែកាបបាតសមុទ្រ MCT និង AAG ជាដើម។ បន្ថែមពីនេះ ក្រុមហ៊ុនទាំងពីរក៏នឹងមានលទ្ធភាពបំពេញតម្រូវការ និងលក្ខខណ្ឌតម្រូវក្នុងការតភ្ជាប់របស់ប្រតិបត្តិករនានា ដែលកំពុងប្រកួតប្រជែងបម្រើសេវាកម្ម នៅក្នុងទីផ្សារកំពុងអភិវឌ្ឍទាំងប្រាំ គឺ មីយ៉ាន់ម៉ា ឡាវ កម្ពុជា វៀតណាម និងថៃ។

លោក Paul Blanche-Horgan អគ្គនាយកក្រុមហ៊ុន EZECOM បានឲ្យដឹងថា៖ "ពួកយើងបានប្រាស់បណ្តាញប្រព័ន្ធរបស់ LXT Networks គឺប្រព័ន្ធខ្សែកាបបាតសមុទ្រដ៏ធំទូលាយក្នុងតំបន់អាស៊ី ដែលកំពុងត្រូវបានធ្វើប្រតិបត្តិការដោយក្រុមហ៊ុនរួមទុនរបស់ LXT Networks ឈ្មោះ StrataNet ។ StrataNet កាន់កាប់ចំណែកទំហំច្រើនក្នុងប្រព័ន្ធខ្សែកាបបាតសមុទ្រមួយចំនួនគឺ SJC, APCN2, AAG, APG, ASE និង JUS ផងដែរ"។

ចំណែក លោក Tom Sastararuchi នាយកប្រតិបត្តិក្រុមហ៊ុន LXT Networks បានមានប្រសាសន៍ថា “ភាពជាដៃគូជាមួយក្រុមហ៊ុន EZECOM ពង្រីកគុណតម្លៃនៃការវិនិយោគរបស់ StrataNet ដែលជាភាគហ៊ុនិករបស់យើង ក៏ដូចជាជំរុញការបង្កើតបណ្តាញខ្សែកាបអុបទិកប្រកបដោយភាពច្នៃប្រឌិត និងភាពបត់បែន នៅទូទាំងតំបន់អាស៊ីអាគ្នេយ៍"។

អត្ថបទ៖ ថា ម៉ាលីដា

ពាក្យទាក់ទង