មិនដល់មួយខែផង កម្ពុជាទទួលបានតួនាទីធំៗពីរនៅអង្គការសហប្រជាជាតិ
- 2018-06-14 02:18:47
- ចំនួនមតិ 0 | ចំនួនចែករំលែក 0
មិនដល់មួយខែផង កម្ពុជាទទួលបានតួនាទីធំៗពីរនៅអង្គការសហប្រជាជាតិ
ចន្លោះមិនឃើញ
កម្ពុជាបានជាប់ឆ្នោតជាក្រុមប្រឹក្សាសេដ្ឋកិច្ចនិងសង្គមរបស់អង្គការសហប្រជាជាតិសម្រាប់អាណត្តិមួយឆ្នាំ២០១៩ ដែលនេះជា «ជោគជ័យ»ថ្មីមួយទៀតរបស់កម្ពុជា ខណៈប៉ុន្មានថ្ងៃមុនកម្ពុជាក៏ត្រូវបានជ្រើសតាំងជាអនុប្រធានសម័យប្រជុំលើកទី៧៣របស់អង្គការសហប្រជាជាតិ។
សេចក្តីប្រកាសព័ត៌មានមួយរបស់ក្រសួងការបរទេសកម្ពុជា ដែលផ្តល់ឲ្យក្រុមអ្នកសារព័ត៌មាននៅព្រឹកនេះ បានលើកឡើងថានៅថ្ងៃទី១៣ ខែមិថុនា ឆ្នាំ២០១៨ កម្ពុជាត្រូវបានប្រទេស១៨៣ លើ១៨៨បោះឆ្នោតជ្រើសតាំងជាក្រុមប្រឹក្សាសេដ្ឋកិច្ច និងសង្គម (ECOSOC) របស់អង្គការសហប្រជាជាតិក្នុងអាណត្តិមួយឆ្នាំ២០១៩ នៅសាលមហាសន្និបាតនៃទីស្នាក់ការអង្គការសហប្រជាជាតិនៅទីក្រុងញ៉ូយក សហរដ្ឋអាមេរិក។
ក្រុមប្រឹក្សាសេដ្ឋកិច្ច និងសង្គម (ECOSOC)គឺជាផ្នែកមួយរបស់អង្គការសហប្រជាជាតិក្នុងការរួមចំណែកធ្វើឲ្យមានការអភិវឌ្ឍប្រកបដោយចីរភាពសម្រាប់ពិភពលោក ដោយក្នុងនោះមានទិសដៅសំខាន់បីគឺសេដ្ឋកិច្ច សង្គម និងបរិស្ថាន។នេះបើតាមព័ត៌មាននៅលើវែបសាយ ECOSOC។
ជាមួយគ្នានោះដែរកាលពីថ្ងៃទី៥ ខែមិថុនា ឆ្នាំ២០១៨ កម្ពុជាក៏ត្រូវបានជ្រើសតាំងធ្វើជាអនុប្រធាននៃសម័យប្រជុំលើកទី៧៣ របស់មហាសន្និបាតអង្គការសហប្រជាជាតិអាណត្តិខែកញ្ញា ឆ្នាំ២០១៨ ដល់ខែកញ្ញា ឆ្នាំ២០១៩ រួមជាមួយប្រទេស១៥ផ្សេងទៀត និងសមាជិកអចិន្ត្រៃទាំងប្រាំនៃក្រុមប្រឹក្សាសន្តិសុខអង្គការសហប្រជាជាតិ។
ក្នុងសេចក្តីប្រកាសព័ត៌មានសរសេរបន្តថា៖ «នេះជាជោគជ័យដ៏ធំធេងថ្មីមួយទៀតរបស់ព្រះរាជាណាចក្រកម្ពុជា ក្នុងការលើកស្ទួយកិត្តិយស និងកិត្យានុភាពជាតិលើឆានអន្តរជាតិ»៕
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
