ចុងម៉ោង អ៊ុយរុយហ្គាយ ធ្វើឲ្យ អេហ្ស៊ីប ខកចិត្តដោយលទ្ធផល ១-០

2018-06-15 14:04:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមបាល់ទាត់ជម្រើសជាតិអ៊ុយរុយហ្គាយទទួលបានជ័យជម្នះលើក្រុមជម្រើសជាតិអេហ្សីបនៅចុងម៉ោងតាមរយៈការតែតបាល់បញ្ចូលទីដោយកីឡាករ Jose Gimenez ដើម្បីទទួលបាន៣ពិន្ទុម្នាក់ក្នុងការប្រកួតពូល A នៃពានរង្វាន់បាល់ទាត់ពិភពលោក FIFA World Cup 2018 នៅប្រទេសរុស្ស៊ី។

ក្រុមអ៊ុយរុយហ្គាយ

ការប្រកួតនៅវគ្គទី១ ក្រុមទាំងពីរមិនអាចបំបែកពងមាន់គ្នាបានឡើយ ទោះជាមានឱកាសស៊ុតម្តងម្កាលដូចគ្នាក៏ដោយ។ អ្វីដែលគួរឲ្យកត់សំគាល់បំផុត Luis Suarez ស៊ុតនៅមុខទីរបស់អេហ្ស៊ីប ប៉ុន្តែស៊ុតខុសគោលដៅ។ នៅវគ្គដំបូងនេះបន្ថែមត្រឹមតែ១នាទីប៉ុណ្ណោះដោយបញ្ចប់ដោយលទ្ធផល ០-០។

ចំពោះការប្រកួតវគ្គទី២ អ៊ុយរុយហ្គាយបានព្យាយាមសម្រុកខ្លាំង និងបានផ្លាស់ប្តូរសមាជិកថ្មីចូល ប៉ុន្តែនៅតែមិនអាចរកគ្រាប់បាល់បាន ខណៈអេហ្ស៊ីបបានការពារយ៉ាងល្អ។ នាទី៧២ ខ្សែបម្រើស្លាបអេហ្ស៊ីប Amr Wardia បានស៊ុតពីចម្ងាយយ៉ាងល្អ ប៉ុន្តែអ្នកចាំទីអ៊ុយរុយហ្គាយជួយសង្គ្រោះបាន។

នៅនាទី៧៣ Luis Suarez បានឱកាសល្អអូសបាល់ចូលតំបន់គ្រោះថ្នាក់ តែមិនទាន់បានស៊ុតផង អ្នកចាំទីអេហ្ស៊ី El Shenawi ចាប់បាល់បាន។ នាទីទី៨៣ Cavani ស៊ុតបាល់នៅមុខទីយ៉ាងល្អ ប៉ុន្តែអ្នកចាំទីអេហ្ស៊ីបជួយសង្គ្រោះបានទៀត ហើយជាថ្មីម្តងទៀត Cavani ស៊ុតហ្វ្រីឃីកបុករបាទីរបស់អេហ្ស៊ីប។

ការប្រកួតស្ទើរតែបញ្ចប់ដោយលទ្ធផលស្មើគ្នា០-០ ទៅហើយ ប៉ុន្តែអ៊ុយរុយហ្គាយនៅតែអាចរកបាន៣ពិន្ទុពេញតាមរយៈគ្រាប់បាល់១គ្រាប់គត់ដោយកីឡាករ Jose Gimenez តែតចូលទីអេហ្ស៊ីបនៅនាទីទី៨៩។ តាមរយៈលទ្ធផលនេះ អ៊ុយរុយហ្គាយមាន៣ពិន្ទុឈរលេខ២ ខណៈម្ចាស់ផ្ទះរុស្ស៊ីមាន៣ពិន្ទុដែរ ប៉ុន្តែឈរលេខ១ក្នុងពូល A៕